3
Tepad te peglikò te Pengolo
1 Nayan kedita niyo nedekelan ko te pedowan, seini se ikedowa solat ko kenyo. Todà a simolat kenyo so megpeaneng-aneng a kenyo tepad te kebenalan tapay ko intoladà kenyo amon metòlid se aneng-aneng niyo.
2 Ibeg ko meg-aneng-aneng kaw tepad te kagi insolat te menge telekeliwat te kagi te Timanem gebii, aw tepad te insogò te Pengolo tadon migpelowà kenitadon, sìyan impetaga-taga din diyà kenyo pineokit te menge sogounun din.
3 Seini se melangkaw te kedita ipeaneng-aneng ko kenyo. Aw agpet den se temanan te keneyonan, doen menge otaw meg-inang te pengkey eden se ibeg te pedowan dan. Mebebayat dan kenyo
4 aw mikagi dan, “Eked kay pemenal te impakang i Jesu Cristo te lomikò sikandin dini te tanà. Nematay se kemonaan tadon gebii, meneng gayed onawa se keneyonan lekat te peg-inang kenyan lamig songkani.”
5 Meneng se otaw mikagi kenyan, komulu dan te kebenalan seini. Gebii te peg-inang te Timanem te kedita, olò sikandin minikagi aw yan ininang din se langit aw tanà. Ininang din se tanà diyà te tengà-tengà te dagat, aw ipegpetilles din se kedita pineokit te wayeg.
6 Wayeg heman se inlinep din te tanà gebii, aw nelemes se kedita te otaw.
7 Doen aldaw domateng te sonogen din se langit aw tanà egkitaen tadon seini. Olò sikandin mikagi aw yan mesonog. Meneng eked din iyan sonogi singed aw domateng se aldaw te peg-okom din te kedita te otaw wedà pegpesakop diyà kandin, so pegbàtan din dan te apoy.
8 Kedita niyo egkedekelan ko te pedowan, ikà niyo egkelibel kani. Diyà te aneng-aneng te Pengolo tadon, eked kenamay se sebad melalan se omay. Diyà te kandin aneng-aneng, se kenemayan te sebad melalan se omay, iling olò te sebad se aldaw.
9 Pengkey doen otaw eg-aneng-aneng te eg-enggaen te Timanem se pegtoman din te pakang, meneng kenà din eg-enggaen. Ontò medalem se pedowan din, so eked sikandin keibeg te doen otaw kebàtan. Ibeg din megselsel se kedita te otaw te salà dan.
10 Tomanen te Pengolo tadon se pakang din. Iling te pegdateng te menenakaw se peglikò te Pengolo tadon, so wedad otaw metaga-taga aw kano likò. Aw domateng se aldaw sìyan, dinegen se logo-logo, so megkewedad se langit. Mesonog heman se aldaw, aw bolan, aw menge bitoen, aw megkewedad se kedita niyan. Tomalag mesonog se tanà aw kedita te ininang dini lanto te tanà.
11 So doen aldaw domateng aw kebàtan se kedita niyan, yan keilangan ontò kaw tomaking te Timanem aw meg-inang kaw heman te metòlid amon eked kaw pekesipat.
12 Egtagad aw egpeliman kaw te aldaw te pegtoman te Timanem te pakang din. Aw domateng se aldaw sìyan, mesonog se langit aw megkewedad iyan. Metonaw heman se aldaw, aw bolan, aw kedita te bitoen tandà te keinit te apoy.
13 Meneng migpakang heman se Timanem te inangen din se kaling langit aw kaling tanà ogpaan te kedita te otaw eg-inang te metòlid, aw yan se egpelimanan tadon.
14 Nayan, kedita niyo egkedekelan ko te pedowan, dalem te pegtagad niyo te aldaw sìyan, keilangan megpekeaseb kaw menimanem amon wedad salà niyo isila te Timanem, aw amon melinaw se pedowan niyo.
15 Aw aneng-aneng niyo te iling te eg-enggaen te Pengolo tadon se peglikò din, ikà niyo egkelibel te egtagad pa sikandin amon doen pa aldaw mekelowà se otaw lekat te pelumun din. Yan heman se impetaga-taga te kedowa tadon si Pablo egkedekelan tadon te pedowan. Impetaga-taga din iyan diyà kenyo te pegsolat din kenyo, so binegayan sikandin te Timanem te kebiyasa.
16 Iling heman kenyan se ipegtoladà i Pablo diyà te kedita te solat din. Doen heman insolat din melima kelebetan, aw yan se todaen te menge otaw wedà ontò ketaga-taga te kebenalan aw wedà kelobos se pegsalig dan diyà te Timanem. Iling heman kenyan se pegtodà dan te menge doma kagi te Timanem insolat, aw yan se doun te pegbàtan din dan.
17 Meneng menge kedowa ko egkedekelan ko te pedowan, tapay kaw den netaga-taga tepad te menge otaw sìyan. Yan se doun te keilangan meg-ahà kaw amon eked kaw keekali te kebolalaw ipegtoladà te menge otaw mededaet. Peg-ahà kaw amon eked kaw kelibel te kebenalan pinemenalan niyo.
18 Keilangan gayed kaw meg-iling tepad te kèpiya ipegpemegay te Pengolo tadon si Jesu Cristo egpelowà kenitadon. Keilangan meg-iling kaw heman te kebenalan ipetaga-taga din diyà kenyo. Sikandin se iduyun seini aw lamig te wedad temanan. Metoman iyan.