1 Penga niyan, kinità ko se menenanap mebolot minanggin lekat te dagat. Doen sempolò seka din aw pito se olo din. Doen menge korona insangkob kidoen te teg sebad-sebad te sempolò seka din. Doen ontò medaet ngadan egtompuyus te Timanem insolat kidoen te teg sebad-sebad olo din. 2 Iling te menenanap te kebenesan iningedanan liyopardo se menenanap mebolot kinità ko. Iling te benis te menenanap te kebenesan iningedanan oso se benis din. Iling te bahà te liyon se bahà din. Se tolos te nagan aw peglowan din aw pegpengibing din, yan se insalig din diyà te sìyan menenanap mebolot. 3 Nepelian se sebad olo din aw iling te nematay iyan. Meneng penga niyan, negolian, aw yan se doun te nepela se kedita te otaw te keneyonan, aw timaking dan heman kenyan. 4 Egsimbahen te otaw se nagan, so ininang din egpengolo se menenanap mebolot. Egsimbahen dan heman se menenanap mebolot, aw minikagi dan, “Wedad palos labi pa mèpiya diyà te menenanap mebolot, aw wedad heman mekedaeg kandin.”

5 Pinebeyaan te Timanem se pegpelangkaw-langkaw te menenanap mebolot aw pegpenollon din te Timanem, aw peglowan din diyà te kedita taman te kepatan teg dowa se bolan. 6 Peg-ikagi din, nenollon sikandin te Timanem, aw nenollon heman sikandin te ogpeanan te Timanem kidoen te langit, aw nenollon heman sikandin te kedita te sakop te Timanem eg-ogpà doton te langit. 7 Pinebeyaan heman te Timanem se peggira niyan diyà te menge sakop te Timanem kidoen te tanà, aw pegdaeg niyan kandan. Ininang heman iyan egpengolo te otaw lekat te kedita te ogpeanan. 8 Simbahen iyan te kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se libro insolat te Karniro inimetayan, aw insolat iyan te wedà pa inangi se keneyonan.

9 Se kedita niyo domineg te kagi ko, keilangan meg-aneng-aneng kaw te kagi ko seini. 10 Se kedita te otaw pinemallì amon dekepen, yan se metoman medakep. Se kedita heman te otaw mengibing te sondang aw mengimatay, yan se metoman imetayan te sondang. Yan se doun te keilangan tomayod te kelimahan se kedita tadon sakop te Timanem, aw keilangan somalig kidon heman diyà kandin.

11 Penga niyan, kinità ko se doma menenanap mebolot limowà lekat didalem te tanà. Doen dowa seka din iling te karniro, aw iling te kagi te nagan se kagi din. 12 Sikandin se egkeliwat te kedita te punù te tagnà menenanap mebolot, sìyan simogò kandin. Eglegesen din se kedita te otaw te keneyonan amon megsimba dan te tagnà menenanap mebolot, sìyan negolian te palì te pegkematay din. 13 Doen heman dakel kepelahan eg-inangen te ikedowa menenanap, so doen apoy indagdag din lekat te langit kinità te kedita te otaw. 14 Doen menge kepelahan impeinang te tagnà menenanap pineokit te ikedowa, aw yan se doun te nekeakal sikandin te kedita te otaw eg-ogpà kidoen te keneyonan. Migpunù heman kandan amon meg-inang dan te inotaw ipesopo te tagnà menenanap, sìyan nepelian te sondang meneng wedà kematay. 15 Penga niyan, insogò se ikedowa menenanap amon memegay te pedowan diyà te inotaw ininang. Yan se doun te nekeikagi se inotaw, aw migpunù iyan te imetayan se kedita te otaw eked pegsimba kenyan. 16 Doen heman impunù din te keilangan pengilelaan se kedita te otaw diyà te belad dan kowanan aw diyà te kilay dan, pengkey otaw nedengeg aw wedà kedengeg, pengkey meyaman aw sagkep, pengkey allang aw kenà allang. 17 Wedad otaw mekebayad aw wedad heman mekebeligyà singed aw onà dan pengilelaan te ngadan te menenanap mebolot aw bilang te ngadan din. 18 Nayan, keilangan doen kebiyasa te otaw meglebad te tegdeyanan te bilang te ngadan te menenanap sìyan, so in-eles se ngadan te otaw diyà te bilang niyan, enem gatos keneman teg enem.