26
Isarianunkanira Jeso iragakagantakenkanira
(Mr 14.1-2; Ir 22.1-2; Jn 11.45-53)
1 Yagatakera Jeso yogotagaigakerira irogamereegi ikantaigiri:
2 —Viroegi pogoigaketari pitenivati kutagiteri agantakemparira Pasekoa. Iroro iragakagantantakenkani Kañotasanotakaririra Matsigenka inkentakotagantakenkanira.
3 Impo yapatoitaigaka ivampatuireku Kaipashi maganiro itinkamiegi saseroroteegi, gotagantaigirorira itsirinkakotanakerira Moiseshi intiegiri itinkamiegi jorioegi. Yogari Kaipashi inti itinkamisanorira saseroroteegi.
4 Ario kara ikemavakagaigaka iramatavinaigakerira Jeso iragakagantaigakerira irogakagantaigakerira.
5 Kantankicha ikantaigake:
—Antari avisanakera Pasekoa ario agakagantaigakeri. Maikari maika gatata agakagantaigiri ganiri ikisakoiganakari maganiro patoventaiganakaririra.
Isagutantunkanira Jeso kasankaari
(Mr 14.3-9; Jn 12.1-8)
6 Impogini iatanake Jeso Vetaniaku inkamosoterira Sumo ikantaganirira Vesegavetankicharira.
7 Antari inakera ivankoku opokashitakeri tsinane amakotapaake kasankaari punatasanotacharira. Ogari opiaatantakarira onti ovetsikantunkani aravasetero, shatekaamatakatyo kara. Ipitaigakera Jeso isekatavageigakara irorori aiñonitapaakari otintsanorenkakotakero osagutantakarira igitoku.
8 Yogari irogamereegi iroro ineaigavakerora ogatyo ikenaigake ikisaiganaka iniavakagaiganakara ikantaigi:
—¿Antari gara aparaatagantiri?
9 ¡Matsi tera ogote opunavagetaratyo tovai kara! Ariometyo ompimantakenkanime agantakenkanira koriki impaigakenkanira kogakovageigacharira.
10 Kantankicha Jeso irorotyo ikemaigavakerira ikantaigutarityo:
—Atsi arionenityo, gara pikisaigiro, pairotari okametitake okañotakenara maika osagutakenara.
11 Yogari kogakovageigacharira kantakatari pintentaigaemparira, kantankicha narori gatanika pikantakani pitentaigana.
12 Ogari oga tsinane ontitari osaguvitakena kasankaari inkitaitaenara impogini nonkamakera.
13 Maika nonkamantasanoigakempi tyarika kara inkenkitsatakotakenkani Tasorintsi tyara ikanta yogavisaakotantira ario onkañotagakenkani oga tsinane onkenkitsatakotaenkani tyara okantakena osagutakenara kameti osuretakotaenkaniniri irorori.
Jorashi ikogakera iragakagantakerira Jeso
(Mr 14.10-11; Ir 22.3-6)
14 Impo yogari irogamere Jeso paitacharira Jorashi Ishikariote iatake ikamosoigutirira itinkamiegi saseroroteegi
15 ikantaigapaakeri:
—¿Aka tovaini koriki pimpunaigakena nagakagantaigakempirira Jeso?
Iriroegi ipaigakeri koriki 30 imenta.
16 Impo iatai ovashi isuretanaka tyarikatyo inkantakeri iragakagantakerira.
Jeso isekatagaiganaarira irogamereegi
(Mr 14.12-21; Ir 22.7-18; Jn 13.21-30)
17 Impo aganakara vieseta ogantaganirira pan terira onkonogempa opoegantarira yogari irogamereegi Jeso yaiñoniiganakari ikantaigiri:
—¿Tyara kara pikogake novetsikaigakerora magatiro kameti asekataigakempara paita?
18 Irirori ikantaigiri:
—Piaige Jerosarenku ivankoku pashini matsigenka pinkantaigapaakeri: ‘Yogari Gotagantatsirira ikanti: Ataketari omonkaratapaaka nopokashitakerira, irorotari nokogantakarira nosekatagavageiganakemparira nogamereegi pivankoku nosuretakoigaemparora Pasekoa.’
19 Ovashi iaigake yovetsikaigakerora magatiro itsatagageigakerora ikantaigavakeririra Jeso.
20 Impo ochapinienkatanakera yogari Jeso itentaigakari irogamereegi ipitaigakera mesaku
21 isekatavageigakara. Impo ikantaigiri:
—Maika nonkamantasanoigakempi, paniro viroegi pagakagantakena paita.
22 Yogari irogamereegi ogatyo ikenaigake ikenkisureaiganaka ikantaiganakera paniropage:
—Notinkami, ¿naro gakagantakempine?
23 Ikanti Jeso:
—Inti gakagantakenane tsiantakotakenarira maika peratoku.
24 Ontitari ontsataganakempara okantakerira Itsirinkakagantakerira Tasorintsi iniakotakerira Kañotasanotakaririra Matsigenka, kantankicha ¡maikaniroro iratsipereavagetake yoga gakagantakerinerira! Gamerakari itimi okyara.
25 Iniamatanaketyo Jorashi gakagantakerineririra ikanti:
—Gotagantatsirira, ¿naro gakagantakempine?
Ikantiri irirori:
—Virotari kantankitsi.
Jeso ikotagakerora pan ipaigakerira irogamereegi
(Mr 14.22-25; Ir 22.19-23; 1 Ko 11.23-26)
26 Impo panikyara iragataiganae isekataigakara inoshikakero Jeso pan yapagotakero iniakeri Tasorintsi ikanti: “Apa, noshineventakempi pipakenarora oka pan.” Impo ikotagakero ipaigakerira irogamereegi ikantaigiri:
—Okari oka pan kañomataka ontinirikatyo novatsa. Nero gaigemparo.
27 Impo osamanitanakera irorokya inoshikakotake vino, iniairi aikiro Tasorintsi ikanti: “Apa, noshineventakempi pipakenarora oka vino.” Impo ipakoigakeri irogamereegi ikantaigiri:
—Okari oka vino kañomataka ontinirikatyo noriraa. Nero viikaigemparo.
28 Antari nonkamaventaigakerira maganiro ovoatanake noriraa. Irorotari maika irogavisaakotantaigakenkanirira maganiro kematsaigakenanerira ganiri ikenkiimatairo Tasorintsi ikañovageigara.
29 Maika nonkamantasanoigakempi gara noviikumataaro vino. Antari impogini irapatoitaigakerira Apa maganiro kematsaigiririra impegakempara Igoveenkariegite, ario pinkante nontentaigakempi aviikaigakemparora vino okyaakyarira.
Jeso ikamantakerira Perero interatakotakerira
(Mr 14.26-31; Ir 22.31-34; Jn 13.36-38)
30 Impo yagataiganakera imatikaventaigakerira Tasorintsi ikonteiganake itonkoaiganakera iaigakera Orivoshiku.
31 Impo ikantaigiri Jeso:
—Maika maganiro viroegi pintsarogaiganake paita pokaiganakena piaigakera parikoti. Ariotari okantakeri Itsirinkakagantakerira Tasorintsi okanti:
‘Impogini nogakeri sentiririra ovisha.
Yogari ovisha ogatyo inkenaigake irishigaviovageiganake.’
32 Kantankicha impogini nanianaera naketyo ivaiganakempine noatakera Garireaku.
33 Inianake Perero ikantiri:
—Intsarogaigavetanakempatyo maganiro iokaigavetanakempityo, kantankicha narori garatyo nokumatimpi.
34 Kantankicha Jeso ikantiri:
—Nonkamantasanotakempi, paita tekyara irinie atava pinteratakotakena mavati.
35 Iniitanaatyo Perero ikanti:
—Intagarora intentagantaitenara irogaitakenara irogaitenatatyo, kantankicha garatyo noteratakotumatimpi.
Ario ikañoigakero maganiro ikantaigakera.
Jeso iniakerira Tasorintsi Jetsemaniku
(Mr 14.32-42; Ir 22.39-46)
36 Impogini iaigake Jetsemaniku. Iroro yogonkeigapaakara yogari Jeso ikantaigiri irogamereegi:
—Pitaigeta aka, narori noateta anta noniakerira Apa.
37 Intagani itentaiganaka Perero intiegiri itomiegi Severeo. Irirori ikenkisureavagetanakatyo kara yovankinavagetanaka.
38 Osamanitanakera ikantaigiri:
—Nokenkisureavagetanakatyo kara panikya agavagetanakena. Pitaigeta viroegi aka pintentaigakenara pinkireaventaigakenara.
39 Irirori iatake antakona anta yompatakasetapaaka inianakerira Iriri ikanti: “Apaa, nokogavetaka pogavisaakotaenara ganiri natsipereavageti, kantankicha impatyora viro.”
40 Impo yagatanakera iniakerira iatai inkaaraku inaigakera irogamereegi ineaigapaakeri magasevageigake. Ikantapaakeri Perero:
—¿Matsi tera pagaveaigumate samanikonara pinkireaigake?
41 Kireaige gara pimagaigi. Niaventaigempa ganiri pikañovageiga. Viroegi pikogaigavetakaniroro pinkematsatasanoigakerira Tasorintsi, kantankicha tera pishintsitashiigero posante terira onkametite.
42 Osamanitanaira ipiganaa aikiro iniairi Iriri ikantiri: “Apaa, gatanika pikantatigironika ganiri natsipereavageti, ariotyo onkañotakempa maika ontsatagakempara pikogakerira viro.”
43 Impo ipigavetaa ineaigapairi magasevageigaityo aikiro, avisaiganakeritari ivochokine tera ineakoigavakempa imagantaiganaarira.
44 Iokaiganairi ipigutanaara aikiro iniairira Iriri, okiiro ikantairi inkaaratirira ikantakeririra.
45 Impo yagatanakera iniairira ipiganaa inaigakera irogamereegi ikantaigapaakeri:
—¿Ogaa, magaiganatsivi pishigopireaiganachavi? Gapaaka iragakagantakenkanira Kañotasanotakaririra Matsigenka irogaigakerira kañovageigacharira.
46 Maikari maika tinajaiganake, tsame, mataka pokapaake gakagantakenanerira.
Yaganunkanira Jeso
(Mr 14.43-50; Ir 22.47-53; Jn 18.2-11)
47 Tekyara iragate Jeso iniavagetakera ipokapaake Jorashi itentaigapaakari tovaini matsigenkaegi yamashiigapaakeri savuri ontiri inchakii. Intiegi tigankaigakeri itinkamiegi saseroroteegi intiegiri itinkamiegi jorioegi.
48 Yogari Jorashi gakagantakerineririra Jeso yogotagaigakeri okyara ikantaigiri: “Agonkeigapaakemparika pineaige tyanirika noatashitake nasaraanatapaakemparira, irirotari pikogaigakerira, pagaiganakerira.”
49 Impo iroro yogonketapaakara inakera irirori ikantapaakeri:
—¡Gotagantatsirira!, ¿aiñovi?
Impo yasaraanatakari.
50 Yogari Jeso ikantiri:
—Jeeje, aiñona. Maika aityotari pipokashitakerira atsi nani kañotero.
Impo yogari tentaigakaririra Jorashi yaiñoniigapaakari Jeso inoshikaigapaakeri yairikaigakerira.
51 Kantankicha aiño paniro itentakarira Jeso inoshikamatanaketyo isavurite iserogempitatutarityo ironampiria itinkamisanorira saseroroteegi.
52 Kantankicha Jeso ikantaigiri:
—Atsi arionenityo, piataero pisavurite. Tyanirika ventarorira isavurite ontityo irogantakenkani savuri.
53 ¿Matsi tera pogote narora kogankitsine nonkantakerityo Apa intigankakera isaankariite intovaigavagetaketyo kara impugamentaiganakenara?
54 Kantankicha ariomera nonkañotagakerome maika, ¿ario tyara onkantakempara ontsataganakempara Itsirinkakagantakerira irirori pairani okamantakotakenara nantsipereavagetakera?
55 Impo ishonkashiigari ikantaigiri itentaigakarira Jorashi:
—¿Matsi naro koshinti nerotyo pamashiigakenara savuri ontiri inchakii pagaiganakenara? Omirinkatari kutagiteri notentaigakempi viroegi anta ivankoku Tasorintsi nogotagantavagetakera tera ario pagaigena,
56 kantankicha okañotantanakarira maika onti ontsatagagetanakerora ikamantakoigakenara pairani kamantantaigatsirira itsirinkakoigakenara okyara.
Impo ishigavioigamatanakatyo maganiro irogamereegi iokaiganakeri Jeso paniro.
Yamanunkanira Jeso yapatoitaigakara itinkamipage jorioegi
(Mr 14.53-65; Ir 22.54-55, 63-71; Jn 18.12-14, 19-24)
57 Yogaegiri gaigakeririra Jeso yamaiganakeri ivankoku Kaipashi. Irirori inti itinkamisanorira saseroroteegi. Ario inaigake kara gotagantaigirorira itsirinkakotanakerira Moiseshi intiegiri aikiro itinkamiegi jorioegi yapatoitaigakara.
58 Impo yogari Perero intaina inapaake yogiatapaakerira Jeso. Antari yagapaakerora pampatuiku ineaigapaakeri soraroegi pirinitaigake kara. Iriroegi intiegi sentaigirorira ivanko Tasorintsi. Ovashi ipirinitapaake irirori kameti ineakotakeriniri Jeso tyarikara inkantakenkani.
59 Yogari itinkamiegi saseroroteegi itentaigakari itinkamiegi jorioegi ikaemakagantaigakeri pashini tsoeventaigakemparineririra kameti ontimakeniri onkenantakemparira irogakagantaigakerira.
60 Ipokaigavetapaakatyo tovaini tsoeventaigakaririra, kantankicha irorokya ikantaigi irorokya ikantaigi, nerotyo tyampa inkantaigakeri. Impo ipokaigamatapaaketyo piteni kantaigankitsirira
61 ikantaigi:
—Naroegi nokemaigakeri ikantakera: ‘Naro nagaveake nogimamerinkakerora ivanko Tasorintsi impo novetsikaero, omavatakotanakempa kutagiteri nagataero.’
62 Impo ikavirimatanakatyo Kaipashi ikantiri Jeso:
—¿Tera tyara pinkantumate?, pikemaigakeritari ikantanaigakempira. Maika ¿tyara pinkantera viro?
63 Kantankicha irirori ikemisantanaketyo, teratyo tyara inkantumate. Osamanitanakera imatutaarityo aikiro ikantiri:
—Maika nonkantakempi kañomataka irironirika kantakempi Tasorintsi ikantakanirira itimi, atsi kamantena ¿arisanotyo vinti Ikogakagakerira Tasorintsi impegakempara Nogoveenkariegite? ¿Viro Itomi Tasorintsi?
64 Iniamatanaketyo Jeso ikantiri:
—Jeeje, naroniroro katinka pogakero, kantankicha maika nonkantaigakempi impogini pineaigakeri Kañotasanotakaririra Matsigenka impirinitakera inampinaku irakosanoriraku Tasorintsi Gaveavagetatsirira. Aikiro pineaigavakeri iripokaera inkenantapaemparora menkori.
65 Ogatyo ikenake ikisamatanakatyo Kaipashi itisaraitarotyo imanchaki tseerererere ikanti:
—¡Yokari yoka onti ikañotagumanatakari Tasorintsi! Iroroventi maika intagatityo akaemakagantaigi pashini iripokaigakera inkamantaigakaera ikañotakerora maika, matakaniroro pikemaigakeri tsikyata viroegi ikantakera.
66 Maika ¿tyara pinkantaige viroegi?
Iriroegi ikantaigi:
—Kantetyo inkamakera, tsikyatatari ikañotagantaka irirori.
67 Impo itoanaigakeri ivoroku, itaataaigakeri togn togn, aikiro pashinikya patosanaigakeri ivoroku
68 ikantaigakerira:
—Irorotari vintira Ikogakagakerira Tasorintsi impegakempara Igoveenkariegite jorioegi, ¡atsi gotenityo tyani taakempi!
Perero iteratakotakerira Jeso
(Mr 14.66-72; Ir 22.56-62; Jn 18.15-18, 25-27)
69 Yogari Perero aiñokya inake anta parikoti pampatuiku. Impo okenapaake paniro nampiriantsi okantiri:
—Viro aikiro pitentavagetari Jeso Garireakunirira.
70 Kantankicha yogari Perero ikemamampeganakatyo ikantiro:
—¿Jaa? ¿Tyara pikanti? Tera nonkeme tyarika pikanti.
Ikemaigakeri maganiro naigankitsirira kara.
71 Impo iavetakara anta sotsimoroku oneitaarityo aikiro pashini nampiriantsi okantaigiri naigankitsirira kara okanti:
—Yogari yoga inti itentavagetarira Jeso Nasarekunirira.
72 Kantankicha irirori ikantutaarotyo aikiro ikanti:
—¡Teratyo noneimateri yoga piniakotakerira! Ineakenatari Tasorintsi tera ario nontsoegumatempa.
73 Choeni osamanitanakera yaiñoniigapaakari naigankitsirira kara ikantaigiri:
—Arisanoniroro pitentavagetari nokemaigavaimpitari piniakera.
74 Yogari Perero ikantutaatyo aikiro:
—¡Nokantakeniroro teratyo noneimateri! Arisanotyo nokantake, ineakenatari Tasorintsi tera ario nontsoegumatempa. Antari ontirika notsoegaka inkisashitakenatyo, tera noneimaterinika piniakoigakerira maika.
Irorotyo ikantakera maika, iniamatanaketyo atava ovashi
75 isurematanakarotyo Perero ikantakeririra Jeso inkaara ikantiri: “Paita tekyara iriniimate atava pinteratakotakena mavati.” Ikaviritapanuta iataira ogatyo ikenake iragamatanakatyo jiii jiii jiii, ikaemavavagetaketyo kara.