4
Abrahamhuunoa Pablo noco ahuara futsa tapimani
1-2 Ascatan natian un nocon shuni Abrahamhuunoa mato yoi. ¿Diosin yononi cuscan aimun ahuun chaca soashoni sharacoin inon? Ma. Anorima. Abraham asca huaiton yoicuana, —Unfin Diosin yononi cuscan un amisiquin, —ishon yoicuana. Ascafiashu nanoricai yoimisima. Upa Diosin ahuun ointaificai ascatiroma.
3 Ahuunoa Diospan tsain cununi isca huaquin, —Abraham Upa Dios icoinra huamisi. Ascaino Upa Diosin ahuun chaca soashona a cuscara isharanon, —ishon cununi.
4-5 Non yonoaino ifoan noco cashman inainma. Noco nifishon noco inantiro. Nanscarifiai non ahuara shara huatiroma Upa Diosin noco nifinon nocon chaca noco soashonon non afu ipanon. Nonfin chaca huamisifoquin. Ascafiashon non Jesús icoinra huacun Upa Diosin noco yoishquin, —Un maton chaca soashona. Man uhuun facuhuunoashu isharanon, —ishon noco yoishquin.
6 Nannori nocon shuni David yoini. Noncai ahua shara huatiroma Upa Diosin noco unimamanon. Afin noco yoitiro, —Un min chaca mia soashona. Ascan min ua cuscara shara iquiran, —ishon noco yoiaino non unimatiro.
7 David isca huaquin yoini,
“Tsoan ahuun chacafo Upan Diosin rau huaa afanan afohuunoa shinanyamaino fasi unimatiro.
8 ¡Aicho! Upa Diosin isca huaquin yoishquin, ‘Min chaca huaa cuscan un afohuunoa afanan shinanpacunacama. Natian min chaca huamisima cuscara min itiroran,’ ishon yoiaino fasi unimacointiro,”
ishon David yoini.
9 ¿Upa Diosin Israelifo fusti unimamatiromun? Ma. Israelirifomari aton chaca soashotiro a cuscara shara imashquin. Abraham Diosin icoinra huacun ahuun chaca soashona a cuscara shara imashquin. Nannori non mato yoimisi.
10 Foshqui rupa shatuataima ahuun chaca soashoni a cuscara shara imashquin.
11 Abraham foshqui rupa shatuataima Upa Dios icoinra huaqui tau huani. Ascacun ahuun chaca soashoni a cuscara shara inon.
Ascaino chipo fari ranan finoanno Upa Diosin Abraham yononi, —Min non min yorafori foshqui rupa shatucahuun. Nan foshqui rupa shatushonfin min shinantiro isca huaquin, “Icon Upa Dios un icoinra huacun uhuun chaca ua soashona ua shara huapanaca Upan Diosin ua yoiyoniran,” —ishon Diosin Abraham shinanmani. Ascacufin tsoafo foshqui rupa shatuataima Dios icoinra huashu Abraham ahuun upa cuscara itiro. Afin foshqui rupa shatuataima Upa Dios icoinra huaquin tau huani. Ascacun ahuun chaca soashoni a cuscara shara inon.
12 Foshqui rupa shatuafori Abraham cuscara itirofoquin. Aafin foshqui rupa shatuataima Dios icoinra huaniquin. Afoanri arifi Jesús icoinra huacanashu Diospan yora itirofoquin. Ascan Abraham aton upa cuscarari itiro.
Abraham Diosin yoiyoni cuscan icoinra huashon ahuunoa fini
13 Upa Diosin Abraham yoini isca huaquin, —Min non min funafori nan maitio un mato inannon matonna inon, —ishon yoiyoni. Upa Diosin icoinra huacun aton chaca soashona a cuscara shara inonfo. Ascacufin ato yoiyoni cuscan ato inanshquin.
14 Futsafoan icoinra huayamafiashon shinanquin isca huaa, —Diosin yononi cuscan un aiton uqui unimatiro noco inanpaiyai cuscan ua inanshquiran, —ishon shinantirofo. Nanfo Diosin yoiyotiani cuscan fiaino non ipaitsi icoinra huaa.
15 Ascafiacai anorima. Diosin noco yonoyamaino tsoacai yoitima icuanamafinquin. Ascafia noco yononi cuscan apaifiaicai tsoa ascamisima. Diosin chacafoqui sinai yoitimamisifo onaintimashqui.
16 Ascan non ahuara shara huaacucai Upa Diosin noco yoiyotiani cuscan noco inainma. Non icoinra huaiton noco cashman inanshquin. Ascan nan Israelifo yononi cuscan tanaifo iyamarai nan tanaifoanmari Upa Dios icoinra huacanashu ahuun yorafo itirofo. Ato yoiyotiani cuscan cashman inanon. Abraham icoinra huani cuscan afoanri icoinra huashu ahuun funafo cuscara itirofo.
17 Nannori Diosin tsain cunushoni isca huaquin, —Manifoti min aton upa cuscara. Un mia imashquinran, —ishon Upa Diosin Abraham yoiyoni. Abraham tau huaquin Upa Dios icoinra huani. Ascan norifi non chipo icoinra huaashu nocon upa cuscara itiroquin. Upa Diosin noco oin non Abraham ahuun facufo cuscaracun. Diosin yora nacun funimatiro ninon. Icataima rufofo Upa Diosin yoiqui tau huani.
18 Ascano Abraham anifoshta afanan facu atiromafiashon Dios icoinra huaacun. —Min chipo facu yashquin. Min funafori ichaparasi cainshquiran, —ishon Upa Diosin yoiyoni cuscan icoinra huani. Ascan yora ichapafoan aton upa cuscara ica.
19 Tapini anifoshtacoin cien fari aqui caa. Ahuin Sararifi noventa fari aqui caa afananricai facu nanutiroma. Ascan man tapifiashon Diosin yoiyoni cuscan icoinra huani. Icoinra huaa cuscacai afanan amaqui ipainima.
20-21 —Un anifocoinno uhuun ahuinri yoshafofiashon Upa Diosin ua yoiyoni cuscan ua facu inantiroran, —ishon shinanni. Mimacaiquin icoinra huani. —¡Aicho! Upa Diosin, mian yoiyoni cuscan mian inanshquin. Min curushhuunshon mian yoiyoni cuscan mian ashotiroran, —ishon yoini.
22 Icoinra huaiton Upa Diosin ahuun chaca soashoni a cuscara shara inon.
23-24 Upa Diosin tsain yoini isca huaquin, —Abraham Upa Dios icoinra huani. Icoinra huahuunshon ahuun chaca soashoniran, —ishon cununi. Abraham fustihuunshocai cununima. Norifi nan icoinra huafoti noco cunushoni. Nocon Ifo Jesús naacoinfiacun Upa Diosin funimani nipanon. Nan non icoinra huaiton nocon chacari noco soashonon a cuscara shara non inon.
25 Nocon Ifo Jesús namani nocon chaca noco soashonon. Nantori funimani Upa Diosin noco rau huanon a cuscara shara non iishquin.