17
Matses icsaid chiaid, ambi Esus tantiaid chiaid, ambi natequid chiaid
(Mat 18.6-7, 21-22; Mad 9.42)
1 Aden chuishumbic abëd icquido Esusën nadopanëdash: —Icsa uanquid iquendac. Adquid Nuquin Papan comapenen cuidendac.
2 Adquid ëbi tantiabenabicquid icsa uanabicsho cuënote yuëmbocquid tëtanetanquin acte shodomboshë yacno nënepatecnëdan.
3 Aid tantiec aidpadquid icmane quequin bëdamboec tabadquin ismedeneta.
“Utsi icsasho isun: ‘Mibi icsaique. Mibi icsaid ënta,’ mimbi cac: ‘Ai, icsaobique. Ënëdnuna,’ quesho tantiash aidi icsainquio yacbimboec bëpiscudta.
4 Mibi icsamboen nash choec: ‘Icsaobique. Ënëdnuna,’ quenuc mibi icsamboen nacmaidbimboec yec bëpiscudta. Mibi padpiden icsamboen nash choaic: ‘Icsaobique. Ënëdnuna,’ queoanuc mibi icsamboen nacmaidbimboec yec bëpiscudoata. Mibi padpiden icsamboen nash padpidec choec: ‘Icsaobique. Ënu,’ queoanuc aidtedecbidi aidi icsambo yenquio yacbimboec bëpiscudoata —capanëdash Esusën abëd icquido chuiquin.
5 Adoaquien: —Nuquin Papa nadatiambocquin nabanquidquio nec, quequin tantiaquidquio ictiadquio iquebique. Adquid ëbi icme, icbo —capanëdash abëd icquidon Esus chuiquin.
6 Adoaquien: —Cuëtempi ëshë mostasa caid pistsëcquio iquec. Siac dëyucash nua yanec. Adecbidi Nuquin Papa nadatiambocquin nabanquid iquec quequin mimbi bëdiactsëc tantiapec. Aden bëdiactsëc tantiaquin Nuquin Papan nadatiambocquin naban-nabansho isun, Nuquin Papa nadatiambocquin nabanquidquio iquec, quequin tantiabenshun nëid cuëtempi caic, Cuëte mananuc tabadboedi adquiecbidi acte nantan tabadoata, quequin mimbi chiacpadec acte nantantsen abi tabadacpadecbidi tabadoaindac —quepanëdash Esus.
7 Aden chiashic Esus abi onquec: —¿Min yua mimbi neshcata cac nidshun neshcaquin nainash shubuno chosho isun: “Nëmbo tsadquin pec cho,” caquinda mimbi icpe?
8 Padenquio. “Con pete codocashun ëbi pemeshun acte menetanquin mimbitsen peshun acta,” mimbi caic.
9 Aden mimbi chiac mimbi chuiboedtedictsëqui nabanquin mimbi yuaidën naimbudec. Aden naimbudsho isash: “¿Bëdamboen mimbi naoc,” quecta mibi icpe?
10 Padenquio. Ambembi nainquio iccosh. Mimbi chiacpaden min yuan nabanosh. Adembidi Nuquin Papan chuiboedtedtsëqui nabanash Nuquin Icbo caic: “Mimbi chuiboedtedi nabampombi. Mimbi namiaid icquin ëmbi naboed ëmbi natequiduidi napombi,” quequin mimbi chuite nendac —quepanëdash Esus.
Daushumbocquido bëdamiaid
11 Adashic, Edusaden yacno nidequi nidaid Cadidia caid ënëdacno nidaid Samadia caid yacno datambëtsenec
12 shubu daëdpactsëc yacno Esus chopanëdash. Ambo choshobien daushumbocquidon 10tedishun Esus bëquedtuidpanëdash.
13 Adquido yec uano tabadquin: —Ëbitedi bëdamboen tantiaquin nadatiambocquin naban, icbo —cabededpanëdash comapenen cuënquin.
14 Adsho tantiashun Esusën: —Isadaidbo tsusiobo yacno nidshun ismetanta —capanëdash. Adoac nidanequi abitedi bëdambudnepanëdash.
15 Adoac bëdamboed abentsëc dëbidiadanec Nuquin Papan naid chiec onquec choaic
16 Esusën taëno tsadbudash: —Mimbi bëdameboc bëdambo iquebi —quepanëdash Esus caic. Aidi Samadia yacnocquid isadaidpembo nepanëdash.
17 Adoaquien: —¿Diestedidambi bëdamepo? —quepanëdash Esus dëbidiadanec choboed caic.
18 Aden chiashic iccuededquidtedi caic: —Nëidi isadaidpembo yequi dëbidiadanec choash Nuquin Papan naid chiec onquenubi ambi chiacpadomboen bëdameboed utsibo isadaidbo icquimbi Nuquin Papan naid chienquio icpec —quepanëdash Esus.
19 Aden chuishumbic: —Mimbi tantiacpadequi mibi bëdanoque. Nidtoanec nid —capanëdash Esusën daushumbo icboedi chuiquin.
Chuiquid dapabëd bëdamboec tabadte chote ushë
(Mat 24.23-28, 36-41)
20 Adshumbic: —¿Chuiquid dapa abentsëcbëd bëdamboec tabadte ushë choaid mitsipadënquio nuqui ispeque? Tantianu. Ëbi chui —capanëdash padiseyobon Esus chuiquin.
Adoaquien: —Chuiquid dapabëd bëdamboec tabadte ushë chote ismete nibëdendac.
21 Adecbidi, nëmbobi chuiquid dapa abentsëc choeque. Is, quetiapimbo matses icpec. Adecbidi, Umbo choeque. Is, quetiapimbo matses icoaic. Chuiquid dapa abentsëcbëd tabadte nëmbobi iquec caimbi —quepanëdash Esus padiseyobo abi chuimeboedo caic.
22 Aden padiseyobo chuishumbic abëd icquido Esusën nadopanëdash: —Yuecash natiamiantequid icnuc abuc Esusbëd tabadte ushë chopashun, quec ëbi iste mibi bunquimbi ëbi isenquio mimbi iquendac.
23 Adec ëbi iste bunubien: “Bëdamboec tabadte chuiquid ambo choshe. Istan,” cac abëdi nidenda. Adembidi: “Nëmbobi choshe. Isnu. Cho,” cac istanenda.
24 Nuquin Papa yacno bëdamboec tabadte ushë chonoc abu bedquetaniacbimboec uëshëmbo chënquec ëbi chosho abitedishun isbededendac.
25 Aid ushë choabicnuc ëbi natiametequid iquendac. Adembidi, chuiquid dapa nec cainquiocquin ëbi isadaidbon chieshëmbededec —quepanëdash Esus.
26 Aden chiec Esus abi onquec: —Ëndenquimboshë Noe tabadnuc matsesën icsamboen tantiaded-tantiadednëdacpadomboen ëbi choate ushë icnuc adembidi matsesën tantiadenepec.
27 Nadec tabadpampic: Nuquin Papan chiaid tantiesa cuidte ushë choec, quenquiocquin abi bunaiduidtsëqui tantiaquin nua peshun nua acbededpampic. Adembidi tantiaquin aton chido bedpampic. Adembidi tantiaquin aton champi menepampic. Aden tantiaquin nabanubien Noebëd icquido cano dapan puduedambic nua mauantequid ue dapambo sequenuc cubudquin Nuquin Papan chiaid tantiesabotedi acte mauanquin mabocac abitedi unësbunepampic —quepanëdash Esus.
28 Adec Noe tabadnuc icsamboen tantiec matses tabadaid chiashic, Esus nadpanëdash: —Adecbidi Dod caid icnuc icsamboen tantiec matses tabadpampic. Nuquin Papan chiaid tantiesa iquec abi bunaiduidtsëqui tantiaquid icoapampic. Nidaidën tabadaiduidquio tantiaquin nua peshun nua actenepampic. Adembidi tantiaquin aton na dadpen bedtenepampic. Adembidi tantiaquin aton tied nitsindenequinc, shubu uadenequinc, caquin napampic.
29 Aden nabanquin Nuquin Papan chiaid tantienquio icnubi shubu dadpen icquid Sodoma caid yacnoshon Nuquin Papan abi tantiaquid Dod cuemepampic. Adnubien tabote dëpesh pasquiacbimboecquid nëdënquetequid ue sequiacbimboec sequequidën Sodoma yacnocquidtedi Nuquin Papan chiaid tantiesabo unës uabunepampic —quepanëdash Esus.
30 Aden chiashic: —Ëbi choate ushë icnuc ëmbi chuibocpadquiec Nuquin Papan chiaid tantiesa yec abi bunaiduidtsëqui tantiaquid iquendac.
31 Shubu macano yacno dectatoash mibi tsadnuc ëbi choate ushë chosho isash budanec mitsana bednu quec shubuno puduedenquio yec cuenta. Adecbidi, tied nantan mibi icnuc aid ushë chosho isash shubu yacno mitsana bednuec nidenquio yec badedquio cuenta.
32 Mibi yacnocquidtedi unës uanushe bidiadshun isenquio yec cuenta, cac Dod cuenubien aton na tantiec aton chido aucbidi bidiadsho unës uampidpadquid iquenda.
33 Unësmane queshun ambi tantiacpadec tabadquid unësash mëyanacno tabadnubien unësmane quenquiocquin Nuquin Papa yacno tabadte tantiaquin chuiquido unësash Nuquin Papa yacnombo tabadendac.
34 Ëbi choate ushë icnuc nad iquendac: Inchëshën daëd usho Nuquin Papa yacno yuednuen abi tantiaquid bedquin abi tantiesa nianendac.
35 Adembidi, chido daëdshun macueso Nuquin Papa yacno yuednuen abi tantiaquid bedquin abi tantiesa nianoaindac.
36 Adembidi, dada daëd aton tied nantan icsho Nuquin Papa yacno yuednuen abi tantiaquid bedquin abi tantiesa nianoaindac —quepanëdash Esus.
37 Aden chuisho bëdamboen tantienquiocquin abëd icquidon: —¿Mitsimbo budpec, icbo? —capanëdash.
Adoaquien: —Unësaid yacno edeste bud-budec. Adquiecbidi Nuquin Papan chiaid tantiesa abi bunaiduidtsëqui tantiaquid yacno abi cuidtequid budendac —quepanëdash Esus abëd icquido caic.