Kálaad Pwôl nyə́ á cilə Títus yɛ́
Isâ í dʉ́gyá nə kálaad mə Pwôl shú mə Títus yí
Títus nyə á bə váál krîstɛn á nə́ nyə a shígɛ́ bə kúl Oyúdɛn dɨ̂ (Gal 2.1-3). Bá Pwôl bwə́ á shí kyey sámbá, nyə á bul nə́mə́ sá ŋkwambʉlə mpə́dʉ́gá Pwôl bə́nɔ̂ŋ nə obúgʉla wâ Kɔrɛ̂nt (2Kr 7.6-16). Ja Pwôl mə zə́ cilə nyə kálaad ɛ́ga yí, í á bə nyə Títus njúl lɔɔm bwə́ jɔ́w nə́ Kʉrɛ̂t yí; í á bə Pwôl mə́ tə́l nə́ a ŋgə́g nə fála ŋgə kwambʉlə isâ yâ Dɔ̧ á nûŋ ŋkwamə́ nyɔɔŋg dɨ̂ (1.5).
Pwôl mə́ bwey lwó shug lʉ kálaad ná nə́mə́ mə́tɛ́ɛ́dʉ́lé mə́ cilyád (1.1-4). Kálə zə kə shwóg nə lúú áshúshwóógʉ́, a lwó kuú njɔɔnd múúd mə jə́la bə nə ndɨ́ shú nə́ bwə́ tə́lʉ́g nyə tɔ́we shwóg á Dɔ̧ yí (1.5-16). Lúú ábɛɛ̂ wúsə məcwûŋ á ŋgə́ cwîny Títus shú ísâ í dʉ́gá nə ikínda i búúd nyə́ é bá dʉ bwəma nə ndɨ́ Dɔ̧ dɨ́ yí: nə icwúcwúúl í búdûm nə icwúcwúúl í búdá (bwó buud bwə́ jəlá nə cwîny míŋgwɔɔl wá), nə məncwə́má, nə məlwaá (2.1-15). Lúú álɛ́ɛl í nyiŋgə báásʉlə ókrîstɛn isâ bwə́ jə́lá nə sá yí, nə váál bwə́ jə́lá nə cʉgə nə́ shɛɛ ŋgə kwanz mbɛ́ɛ́gí mə́ŋkɔɔmʉ́ yí (3.1-11), nə́ ndɛɛ́, a mú kə shínal kálaad nə məcwûŋ nə məbə́dá (3.12-15).
Olɔ̧́ye ɔ kálaad ɛ́ga bʉ́sə nə ŋkul lɛɛl gwág nə́ Pwôl nyə aŋgɛ̂ nə cɨ njɨ isâ í dʉ́gá nə Títus nyəmɛ́fwó yí. Isâ á ŋgə́ lás cínɔŋg yí bísə isâ í dʉ́gyá nə Dɔ̧ dɛ̂sh yí: isâ nda váál gúfʉ́gá í jəlá kyey yí, nə kuú njɔɔnd ótɔ́we ɔ shwóg, nə kuú njɔɔnd óbúgʉla bɛ̂sh.
1
Məbə́dá
1 Mə Pwôl, mə jɨ lwaá mə́ Zɛmbî, *muud lwámá mə Yésus-Krîst nə́ mə ŋkɛ́nyʉ́g mbag á sálə nə́ mifééshá mí búúd myɛ́ mí bə́g nə búgə́. Mə jɨ nə́ mə sáág nə́ buud bwə́ mpúg obʉ́bə́lɛ́ bwə́ lwó nə́ muud mə́ kənd lâm wə́ Zɛmbî wá.
2 Í bə́g ntɔ́ shú nə́ bwə́ ŋgə́g nə bwánd nə búgə́ nə́ bwə́ bá cʉgə cʉg á kandʉgə kandʉgə. Zɛmbî nyə á bwey kaag buud cʉg jɔɔŋgʉ́ shí nə gwɔ́w í nda fwo bə. Zɛmbî nyə ádɛ́ bwɛlɛ bwiiŋg ijɔ̧́ɔ̧́.
3 Ja dâŋ fwála í á wɔ́ɔ́s yí, nyə a sá nə́ buud bwə́ mpúg ŋkaagə́ nyə á kaag nyɔɔŋgʉ́. Lâŋ wɔɔŋg wə́ Cʉgye wúsʉ́ Zɛmbî nyə á yə mə sɛ́y nə́ mə ŋgə́g nə bwiiŋg yí.
4 Mə́ cilə wo kálaad ɛ́ga, wo Titus, mwân waamə̂ kɔ́ɔ́mb á búgə́ sə́ bɛ̂sh ŋgə́ *búgʉla yí. Zɛmbî Sɔ́ɔ́ŋgʉ́ bá Cʉgye wúsʉ́ Yésus-Krîst bwə́ ɔ́ sá wo mpaam, bwə́ ɔ́ sá nə́mə́ nə́ wo cʉ́gəg nə mətəla.
Titus mə́ jəlá nə táág isâ yâ Zɛmbî Kʉrɛ̂t
5 Ja mə á lʉ́gə wo nə́ wo jíg nûŋ Kʉrɛ̂t yí, í á bə shú nə́ wo shínʉ́g táág ísâ byɛ̂sh, wo tə̂l ócúmbá buud ɔ́ *Dɔ̧ mə́ Zɛmbî míŋgwə́la myɛ̂sh dɨ́ nda mə á cɨ nə́ wo sáág nə́.
6 Cúmbá muud mə́ jəlá nə bə múúd ŋgə́ cʉgə kú nə sâ á jumʉ́g yɛ́. A jəlá nə bə ŋgwûm mə mudá ŋgwûd. Bwán bɛ́ bwə́ jəlá nə bə óbúgʉla, bwə́ nda bwɛlɛ bə nə njagə́ nə́ bwə́ ŋgə bə nə intɨ́wʉ́lɨ́, ŋkí ntâg nə́ bɨ́ nə məbún.
7 Í ka jɨɨ nə́ tɔ́we shwóg mə́ dʉ fála Dɔ̧ yɛ́ bə́g kú nə sâ á jumʉ́g, nəcé a jɨ tɔ́we shwóg mə́ Zɛmbî. Nyə ajə́láyɛ́ nə bə mbií múúd í dʉ tə́dʉga nə́ nyəmɛ́fwó jɨ nə ŋkul sá sâ jɛ̂sh yí, kú bə mbií múúd í dʉ kuya mpimbə yí, kú bə ŋgulɛ məlwəg, kú bə múúd icwoomb, a nda dʉ sɔ̧́ *mwaanɛ̂ nə məcií míshʉ́d.
8 A bə́g muud mə́ dʉ mpu ŋwa ójóŋ yɛ́, a dʉ́gə́ cɛɛl ísâ í ányunywaâ, a dʉ cunal íyéésh byé, a njúl tʉ́təlí muud, a dʉ́gə́ sɔ̧́ njɨ sâ Zɛmbî mə gwág nywa yí, a dʉ mpu jwú nə lâm.
9 A jəlá nə bə múúd mə́ wá lâm njɨ́ɨ́gʉ́lá ábúgʉ́lág sə́ ŋgə́ jɨ́ɨ́gʉli yííd. Ntɔ́, nyə é bə nə ŋkul mə bándʉ́lə́ búúd nə́ bwə́ bɛ̧́g fwámɛ́ njɨ́ɨ́gʉ́lá, a lwó búúd ɔ óŋkwafad iwushí byáŋ.
Bɔ́w-bɔ̂w mínjɨ́ɨ́gʉ́lá mí jəlá nə shîn
10 Mə mpú nə́ zhwog obúgʉla bɨ́ nə məlwə̂; í bul bə nə́ ndɛɛ́ sámbá *Oyúdɛn bwə́ á magʉlə Yésus wá. Bwə́ dʉ sá míkaand kú nə wúmbʉ́lé, dʉ shɨɨg buud nə myo.
11 Í jɨɨ nə́ wo júwalʉg bwo mimpu, nəcé bwə́ ŋgə tə̂l minjɔ́w mí búúd oncindî nə́ shwuu nə ŋgə́lə jɨ́ɨ́gʉli bwo isâ bí kú jəla yí; bwə́ ŋgə jɨ́ɨ́gʉli isâ byɔɔŋgʉ́ njɨ shú nə́ bwə́ bə́g nə myə́na bɔ́w-bɔ̂w zhɨ́ɨ́ jɔɔŋgʉ́d.
12 Wúl mbyágá á Kʉrɛ̂t í á dʉ cúndə micúndə́ yí í á cɨ́ nə́: «Buud ɔ Kʉrɛ̂t bʉ́sə ja jɛ̂sh njɨ bwiiŋgʉ́lə ijɔ̧́ɔ̧́, njɨ gwɔ̧́ɔ̧́-gwɔ̧́ɔ̧́ mílâm nda oŋkweny, milʉlə́m dʉ tə́dʉga njɨ dəg.»
13 Ciyá nyə á cɨ jɔɔŋgʉ́ jɨ́ bʉ́bə́lɛ́. Nə́ ndɛɛ́, ŋkáándʉ́g nə bwo fwámɛ́ ŋkáándʉ́lə, bwə́ bə́g nə fwámɛ́ búgə́,
14 bwə́ nda kənd mílâm mbɛɛ́ míkanda mí Oyúdɛn dɨ̂, bwə́ nda bɛ̧ mə́cɛ̧ɛ̧́ mə́ búúd bwə́ ŋgə́ ban obʉ́bə́lɛ́ wá.
15 Buud bɨ́ nə́ fwɔ̧́-fwɔ̧́ wá, isâ byɛ̂sh bí nə́mə́ bwo nə́ fwɔ̧́-fwɔ̧́; njɨ, shú bɔɔŋg bɨ́ nə nyɛɛ́ wá, bwə́ ŋgə ban nə́ bwə́ abúgʉ́láyɛ́ wá, kú nə tɔɔ sâ jɨ́ bwo nə́ fwɔ̧́-fwɔ̧́, fʉg nyáŋ nyɨ́ nyɛɛ́ nə nyɛɛ́, lâm wáŋ nyɛɛ́ nə nyɛɛ́.
16 Bwə́ ŋgə cɨ nə́ bwə́ mpú Zɛmbî, njɨ isâ bwə́ ŋgə́ sá yí í njúl sâ shús. Bwə́ cúgɛ́ á cɛɛlʉ́g, bɨ́ nə məbún, bwə́ cúgɛ́ nə ŋkul bwɛlɛ sá sâ ányunywaâ.