27
1 ዬኖ ዓቦና ናንጊና ናንጋ ጎዳ ፔኤኮ ዶዲ፥ ዼኤፒ፥ ሃሣ ዎልቄና ዓኣ ጬንቾ ዓፓሮና ሌዋታኔ ጎዖ ዶርቢንታ ሾኦዣሢ፥ ማሪንታ ቃራሢ ዎዻንዳኔ፤ ባዞይዳ ናንጋ ዼኤፖ ቦዓሢያ ቲቃንዳኔ።
2 ዒማና ኮሺ ማዔ ዎይኖ ቱኮ ጎዦ ዛሎ ዓይናዹዋቴ፤
3 ታኣኒ ናንጊና ናንጋ ጎዳ ዬያ ጎዦ ካፓንዳኔ፤ ቢያ ዎዴ ዋኣሢ ታ ዑሻንዳኔ፤ ዓይጎ ዓሲያ ፑርቲሱዋጉዲ ዋኣንቴና ሮኦሪና ታ ካፓንዳኔ።
4 ታኣኒ ዻጋዻዓኬ፤ ዬያ ጎዦ ፑርቲሳኒ ጋውዲንታ ዓንጊሢንታ ኬስካኣባሽ፥ ዖሊ ታ ዔያቶ ታሚና ሚቺባኣታቴ።
5 ዬይ ዔቦ ቱኮ ጎዣ ታ ካፓንዳያ ማዒፆ ጉሙርቄያታቴ ዒዚ ታኣኮ ላጌ ማዓንዳኔ፤ ታኣና ዎላ ኮሺ ናንጋንዳኔ።
6 ሙካ ዎዶይዳ ያይቆኦቤ ፃጲ ዳካንዳኔ፥ ዒስራዔኤሌያ ቶሺ ቡናንዳኔ፤ ዓኣፒያ ዓኣፓንዳኔ፤ ዬይ ዔያቶኮ ዓኣፓ ሳዖ ኩማንዳኔ።
7 ዒስራዔኤሌ ጳዺንቴሢ ዒዞኮ ሞርኮ ናንጊና ናንጋ ጎዳ ጳርቄ ጎይፆቱዋሴ፤ ዒዞ ሞርኮኮ ሃይቄ ዓሶጉዲ ሚርጌ ዓሲያ ዎዺንቲባኣሴ።
8 ናንጊና ናንጋ ጎዳ ፔኤኮ ዴራ ዲዒንቲ ዔውታንዳጉዲ ማሂ ሜታሴኔ፤ ዬይያ ዎልቄና ዓኣ ዓባ ኬስካ ባንፆ ዓልጋሢ ዢባሮጉዲ ፒፂ ዔኪ ዔያቶ ዳኬኔ።
9 ዒኢካ ያይቆኦቤ ናኣታ ፔ ጎሞኮ ማኣሪንቲሢ ዴንቃኒ ዳንዳዓሢ ሜሌ ዴራ ፔ ፆኦዞም ዒንጎ ባኮ ሺኢሻ ሹጮ ቦኦሪንቶ ጎይሢ ጋኣጪ፥ ዑንጆ ጩቢሾ ቤዞንታ ዓሼራ ጌይንታ ላኣሎ ፆኦዜሎ ማላቶዋ ቱጊ ባይዜቴኬ።
10 ኬልቂ ዲርቆና ካታሜላ ሻሂንቴኔ፤ ዓሲ ናንጉዋ ጉሪ ዳውሌ ማዔኔ፤ ባይ ሄንቃ ቤሲ ማዔሢሮ ዒኢካ ናኣሪ ናኣታ ሚፆኮ ካኣፖ ሙዒ ሙዒ ቃኣዓንዳኔ።
11 ዬይ ካኣፓ ሜላዖ ሜቃንዳኔ፤ ላኣላ ዬያ ሃንፂሌ ሃኣካንዳኔ፤ ማሊ ጶቂሥሢ ፓጬ ዴሬታሢሮ ማዤ ፆኦዛሢ ዔያቶ ሚጪንታዓኬ፤ ማኣሪያ ማኣራዓኬ።
12 ጎሽካሢ ዛርጎ ዓኣፖ ዲልባፓ ሺርኪ ጌኤሻሢጉዲ ዬኖ ኬሎና ዔፒራፂሴ ዎራፓ ዓርቃዖ ዴንዲ ጊብፄ ዓጮ ሄላንዳኣና ዓኣ ፔኤኮ ዴሮ፥ ዒስራዔኤሌ ዓሶ ናንጊና ናንጋ ጎዳ ፔቴይዳ ቡኩሳንዳኔ።
13 ዬኖ ዎዶና ዼኤፒ ዛዬ ዋርቂንታንዳኔ፤ ዓሶኦሬ ዓጮይዳ ባይቄዞንሢና ዳውሲንቲ ጊብፄ ዴንዲ ናንጋ ዒስራዔኤሌ ዓሳ ማዒ ሙኪ፥ ዬሩሳላሜይዳ ናንጊና ናንጋ ጎዳም ዱማዼ ዹኮ ዑፃ ዒዛም ዚጋንዳኔ።