ጌኤዦ ማፃኣፖ ኔሄሚያ ማፃኣፖ 9

ዒስራዔኤሌ ዴራ ጎሞ ቡኡፄሢ

1 ዬኖ ዓጊኖኮ ላማታሚ ዖይዳሳ ዓቦና ዒስራዔኤሌ ዴራ ፔቴይዳ ቡኪንቴኔ፤ ዔያታ ዒማና ፔኤኮ ጎሞ ዛሎ ዻቤያ ማዒፆ ዔርዛኒ ሲዬ ፓቲሌ ማይንቲ፥ ፔኤኮ ቶኦኮይዳ ዓጪ ዋሂ፥ ሙዖ ሃሾ ዳምቦዋ ኩንሤኔ፤ 2 ዔያታ ፔና ሜሌ ዴሮይዳፓ ዱማሴኔ፤ ዬያይዴስካፓ ቢያሢ ዴዔ ቤዛፓ ዔቃዖ ዔያቶና ዔያቶኮ ቤርታኣ ዓዶንሢና ማዼ ጎሞ ቢያ ቡኡፄኔ። 3 ዔያታ ዔቄ ቤዞማካ ዓኣንቴ ሃይሦ ሳኣቴ ጉቤ ናንጊና ናንጋ ጎዳ ማዔ ዔያቶ ፆኦዛሢኮ ዎጎ ማፃኣፓ ዔያቶም ናባቢንቴኔ፤ ጊንሣ ሃሣ ዒማ ዔያታ ኔጌማጉዴያ ኔጊ ፔኤኮ ጎሞ ቡኡፂ ቡኡፂ ናንጊና ናንጋ ጎዳ ማዔ ፔ ፆኦዛሢም ዚጌኔ።

4 ዒኢካ ሌዊ ዓሶም ዔቆንዶ ዼጌ ቤሲ ኮሾናያ ዓኣኔ፤ ዬኖ ቤዞይዳ፦ ዒያሱ፥ ባኒ፥ ቃድሚዔኤሌ፥ ሼባኒያ፥ ቡኒ፥ ሼሬቢያ፥ ባኒንታ ኬናኒንታ ዔቃዖ ናንጊና ናንጋ ጎዳ ማዔ ዔያቶኮ ፆኦዛሢ ዼግ ጌዔ ዑኡሲና ሺኢቄኔ።

5 ሃሣ ዒያሱ፥ ቃድሚዔኤሌ፥ ባኒ፥ ሃሻቤኒያ፥ ሼሬቢያ፥ ሆዲያ፥ ሼባኒያንታ ፔታህያ ጌይንታ ሌዊ ዓሶንሢ፦

«ዒንሢ ዔቂጋፓ ናንጊና ናንጋ ጎዳ

ዒንሢኮ ፆኦዛሢ ጋላቱዋቴ፤

ጋላታና ዓንጆናኮ ቢያ ዑሣ

ዒ ዼግ ዼጊ ጎዖንጎ! ጎውዋቴ» ጌዔኔ።

ቡኡፃ ሺኢጲሢ

6 ዬካፓ ዒስራዔኤሌ ዴራ ሂዚ ጌይ ሺኢቄኔ፦

«ናንጊና ናንጋ ጎዳሢዮ! ኔኤኒ ሌሊ ፆኦሲኬ፤

ጫሪንጮንታ

ጫሪንጮኮ ጫሪንጮ ዦኦጋሢንታ

ሳዖና ዒኢካ ዓኣ ባኮ ቢያ

ባዞንታ ዬያቶይዳ ዓኣ ባኮ ቢያ

ኔ ማዤኔ፤ ቢያሢም ሼምፔ ኔ ዒንጌኔ፤

ጫሪንጮ ማዢንታ ኔኤም ዚጋኔ።

7 ባብሎኔይዳ ዑሬ ጌይንታ ካታሜሎይዳፓ

ዓብራሜ ዶኦሪ ሃይካ ዔኪ ሙኬሢ

ሱንፆዋ ዒዛኮ ‹ዓብራሃሜ› ጌይ ጌሤሢ

ኔኤኒ ናንጊና ናንጋ ጎዳ ፆኦሲኬ። +

8 ዒዚ ኔኤም ጉሙርቂንቴያ ማዔሢ ኔ ዛጊ

ዒዛና ዎላ ኔ ጫኣቄኔ፤

ካኣናኔ ዓሳ፥ ሂኢታ ዓሳ፥

ዓሞራ ዓሳ፥ ፔርዛ ዓሳ፥

ዒያቡሳ ዓሶንታ ጌርጌሳ ዓሶንታ

ናንጋ ካኣናኔ ዓጮ

ዒዛኮ ዜርፆም ናንጊ ዓጪ ማሂ

ዒንጋኒ ኔ ዒዛም ጫኣቄኔ፤

ኔኤኒ ጉሙርቂንታያታሢሮ

ኔ ጫኣቁሞ ኔኤኒ ዶዲ ካፔኔ።»+

9 «ኔኤኒ ኑኡኮ ቤርታኣ ዓዶንሢ ጊብፄይዳ

ሄሌ ሜታሢ ዛጌኔ፤

ሃሣ ዞቄ ባዞ ኮይላ ዓኣዖ

ዔያቶ ኔ ማኣዶም ዔያታ ኔና ሺኢቄሢ ኔ ዋይዜኔ። +

10 ጊብፄ ካኣቲዳ

ዒዛኮ ቢታንታ ዓኣ ዓሶና ዓጮናይዳ

ናንጋ ዴሮ ቢያይዳ

ዲቃሣያ ማዔ ኔ ዎልቆና ማዺንታ ባኮ ፔጋሲ ኔ ዻዌኔ።

ዬያ ኔ ማዼሢ ዔያታ ኑኡኮ ቤርታኣ ዓዶንሢ

ዎማይዲ ሄርቂ ዎይሤቴያ ኔ ዛጌሢሮኬ፤

ዬያ ኔ ማዺፆና ሃኖ ሄላንዳኣና

ዼኤፑማ ኔኤኮ ዔርቴያ ማዔኔ። +

11 ባዞ ዋኣፆ ኔ ዔያቶኮ ቤርታ ላምዖ ፓቄም

ዔያታ ፃኣዺ ሳዓና ፒንቄኔ፤

ሹቺ ባዞ ዋኣፆይዳ ኬኤሪንታሢጉዲ

ዔያቶ ዳውሳዞንሢ

ባዞ ዋኣፆ ዔቶይዳ ዔኪ ኔ ዓጌኔ። +

12 ሮኦሮ ኔ ዔያቶ ፒዝ ጌይ ዔቄ ሻኣሬና ካኣሌሤኔ፤

ዋንቶ ጎይፆ ዔያቶኮ ኔ ፒዝ ጌዒ ዔቄ ታሚና ፖዔኔ፤ +

13 ጫሪንጫፓ ሲና ዹኮይዳ ኔ ኬዲ

ዴሮና ኔኤኮ ኔ ጌስቴኔ፤

ፒዜ ማዔ ዎጎና ዳምቦና

ኮሺ ማዔ ዳምቦና ዓይሢፆና ኔ ዔያቶም ዒንጌኔ።

14 ኔኤኮ ዱማዼ ሃውሾ ኬሎ ዔያቶ ኔ ዔርዜኔ፤

ኔ ዓይላሢ ሙሴ ዛሎና

ኔ ዓይሢፆ፥ ኔ ዳምቦንታ ኔኤኮ ዎጎንታ ኔ ዔያቶም ዒንጌኔ።» +

15 «ዔያታ ናይዻዛ ጫሪንጫፓ ሙኡዚ ኔ ዔያቶም ዒንጌኔ፤

ዔኤታ ዼኤቢንታዛ ላላፓ ዋኣሢ ኔ ዔያቶም ኬሴኔ፤

ኔ ዔያቶም ዒንጋኒ ጫኣቄ ዓጮ

ዔያታ ፔ ዴማ ማሃንዳጉዲ ኔ ዔያቶ ዓይሤኔ። +

16 ጋዓንቴ ኑኡኮ ቤርታኣ ዓዶንሢ ዖቶርቃያና ዋይዚ ዒፃ ዓሲ ማዔኔ፤

ኔ ዎጎና ናንጊፆዋ ዔያታ ዒፄኔ፤ +

17 ዔያታ ዓይሢንታያ ማዒባኣሴ።

ኔ ዎልቆና ኔ ዔያቶ ባኣካ ማዼ ባኮ ቢያ ዔያታ ዋሌኔ፤

ዋይዞ ዒፂ ዶዳያ ማዒ

ጊብፄ ዓይሉሞ ባንሢ ዔያቶ ዔኪ ዓኣዻንዳ

ሱኡጌ ዔያታ ዶኦሬኔ።

ኔኤኒ ጋዓንቴ ናሹሞ ኩሜያ

ዻጋዻኒ ሩኡሩዋያ ዓቶም ጋዓያ

ኮሺ፥ ሃሣ ዓቶም ጋዓ ፆኦሲ ማዔሢሮ ዔያቶ ኔ ሃሺባኣሴ። +

18 ናኣሪ ማሊሲ ካኣሽኮ ባኣዚ ፔኤም ዔያታ ኮሺ

‹ጊብፄ ዓጫፓ ዔኪ ኑና ኬሴ ጎዳ ሃያኬ› ጌዔኔ፤

ዬያ ሌሊቱዋንቴ ዴኤሢ ጫሺ ኔና ዔያታ ጫሽኬኔ፤ +

19 ጋዓንቴ ማኣሪፃ ኔኤኮ ዼኤፒታሢሮ

ዬያ ዓሳ ናንጉዋ ዳውሎይዳ

ዔያታ ባይቃንዳጉዲ ኔ ዔያቶ ሃሺባኣሴ፤

ሮኦሮና ዋንቶና ዔያቶ ዔኪ ዓኣዻንዳ

ሻኣሮ ሃሣ ጊንሣ ታሞ ፖዖ ኔ ዔያቶፓ ሺኢሺባኣሴ።

20 ዔያቶ ዔርዛንዳ ኔኤኮ ሚጪንታ ዓያኖ ኔ ዔያቶም ዒንጌኔ፤

ዔያታ ሙዓንዳ ማና፥ ሃሣ ዔያታ ዑሽካንዳ ዋኣሢያ ኔ ዔያቶም ዒንጌኔ።

21 ዖይዲታሚ ሌዔ ጉቤ ዓሳ ናንጉዋ ዳውላ ዔያታ ሃንታኣና ኔ ዔያቶ ማኣዴኔ፤

ዔያቶም ኮይሳ ዓይጎ ባኣዚያ ቢያ ኔ ዔያቶ ላኣጊባኣሴ፤

ማኣዓሢ ዔያቶኮ ዳርዒ ጋፒባኣሴ፤

ቶካኣ ዔያቶኮ ኪፂባኣሴ።»

22 «ዔያታ ሜሌ ዴሮ ዓጮንታ ካኣቶንታ ዖሊ ባሺ

ዔያቶ ሳዖኮ ዛጶ ማዓ ዓጮ ዓርቃንዳጉዲ ኔ ማሄኔ፤

ሃሴቦኦኔ ካኣቲ ሲሆኔ ዓጮ

ባኣሳኣኔ ካኣቲ ዓጌ ዓጮዋ ዖሊ ዔያታ ዓርቄኔ፤ +

23 ሚርጉማ ጫሪንጮ ዉጫሢጉዲ ማዔ ናይ ዔያቶም ኔ ዒንጌኔ፤

ዔያቶኮ ቤርታኣ ዓዶንሢም ዒንጋኒ ኔ ጫኣቄ ዓጮ

ዖሎና ዔያታ ባሺ ዓርቃንዳጉዲ ኔ ማሄኔ። +

24 ናኣታ ዔያቶኮ ዖሎና ባሺ ካኣናኔ ዓጮ ዓርቄኔ፤

ዔያቶኮ ቤርታ ማዒ ዒኢካ ናንጋ ዴሮ ዖሎና ኔ ባሼኔ፤

ካኣቶንታ ዬኖ ካኣናኔ ዓጮ ዴሮናይዳ

ዔያታ ኮዔ ባኣዚ ቢያ ማዻንዳጉዲ ዎልቄ ኔ ዔያቶም ዒንጌኔ። +

25 ኬልቂ ዲርቆና ካታሞና

ዬኖ ማሎ ዓጬሎ

ኮሺ ባኣዚና ቢያ ኩሜ ማኣሮ

ቦኦኪንቴ ዋኣፆ ዔቶንታ ዎይኖ ቱኮ ቤዞንታ

ሪሚቶንታ ሜሌ ዓኣፖ ዓኣፓ ሚርጌ ሚፆዋ

ቢያ ዔያታ ዔኬኔ፤

ሙዒ ሚሽኪ ዑፆ ፔኤኮ ዔያታ ዲጪሴኔ፤

ኔ ኮሹሞና ኔ ዔያቶም ዒንጌ ባኮና ቢያ ዔያታ ዎዛዼኔ።» +

26 «ጋዓንቴ ኔ ዴራ ኔኤም ዋይዞ ዒፂ

ኔ ቃኣሎም ዓይሢንቲፆዋ ዒፄኔ፤

ኔ ዎጎም ዔያታ ዋይዞ ዒፂ ዙሎ ፔኤኮ ሺርሼኔ፤

ኔ ባንሢ ዔያታ ማዓንዳጉዲ ላቲ

ዔያቶ ዔርዜ ኔ ማሊፆ ኬኤዛዞንሢ ዔያታ ዎዼኔ፤

ሃሣ ቢያ ዎዴ ኔና ዔያታ ፑርታ ጫሺ ጫሽኬኔ፤

27 ዬያሮ ሞርካ ዖሎና ዔያቶ ባሺ

ዔያቶ ዎይሣንዳጉዲ ዓኣሢ ኔ ዔያቶ ዒንጌኔ፤

ሞርካ ዔያቶ ሄርቂ ዎይሤኔ።

ዔያቶ ሜቴ ዎዶና ማኣዶ ዴንቃኒ

ኔ ባንሢ ዔያታ ዒላቴኔ፤

ኔኤኒያ ጫሪንጫ ዓኣዖ ዔያቶም ዋይዜኔ፤

ኔኤኮ ዼኤፖ ማኣሪፆይዳፓ ዔቄያና

ዔያቶ ሞርካፓ ዔያቶ ዓውሳንዳ ሱኡጌ ኔ ዔያቶም ዳኬኔ።

28 ጋዓንቴ ኮሺ ዔያቶም ማዔ ዎዶና

ጊንሣ ዔያታ ጎሜ ማዼኔ፤

ዬያሮ ዖሎና ዔያቶ ባሻንዳ ሞርኮም ኔ ዔያቶ ሃሼኔ፤

ሞርካኣ ዔያቶ ዎይሤኔ፤

ኔ ዔያቶ ማኣዳንዳጉዲ

ጊንሣ ኔና ዔያታ ዖኦጬ ዎዶና

ኔኤኒ ጫሪንጫ ዓኣዖ ዔያቶም ዋይዜኔ፤

ኔኤኮ ሚጪንቶ ዼኤፑማፓ ዔቄያና

ቢያ ዎዴ ኔ ዔያቶ ዓውሴኔ። +

29 ዔያታ ኔ ዎጎ ባንሢ ማዓንዳጉዲ

ኔ ዔያቶም ላቴኔ፤

ጋዓንቴ ዔያታ ፔ ዖቶርሙሞና ዓይሢፆ ኔኤሲ ቦሄኔ፤

ማዺ ዔያታ ኩንሤቶ ሼምፔ ዔያቶም ዒንጋንዳ

ኔ ዎጎ ዻቢ ጎሜ ዔያታ ማዼኔ።

ዒኔ ባይቂሢና ዓኣፖ ካሮ ዔያታ ፔኤኮ ሺርሼኔ፤

ዋይዚ ዒፃያ ማዒ ዶዲፆና ዋይዙዋኣያ ማዔኔ። +

30 ሚርጌ ሌዔ ኔ ዔያቶ ጊቤኔ፤

ዔያቶ ዔርዛንዳጉዲ ኔ ማሊፆ ኬኤዛዞንሢ

ኔኤኮ ዓያኖና ኔ ዔያቶም ዔቂሴኔ፤

ጋዓንቴ ዔያታ ኔኤም ዋይዚባኣሴ፤

ዬያሮ ዔያቶኮ ዓሺኖ ማዔ ሜሌ ዴራ ዖሎና ዔያቶ ባሻንዳጉዲ

ዓኣሢ ኔ ዔያቶ ዒንጌኔ። +

31 ጊንሣ ኔኤኮ ማኣሪፆ ዼኤፑማፓ ዔቄያና

ኔ ዔያቶ ሃሺባኣሴ፤

ኔኤኒ ኮሺ፥ ሃሣ ዓቶም ጋዓ ፆኦሲታሢሮ

ኔ ዔያቶ ባይዚባኣሴ።»

32 «ኔኤኮ ጫኣቁሞንታ ናንጊና ናንጋ ናሹሞ ካፓ

ዼኤፖ ዎልቆና ዒጊቻ ኑ ፆኦዛሢዮ!

ኑጊዳ፥ ኑ ካኣቶይዳ፥ ኑ ሱኡጎይዳ፥

ኑ ቄኤሶይዳ፥ ኔ ማሊፆ ኑም ኬኤዛዞንሢዳ፥

ኑኡኮ ቤርታኣ ማዖንሢንታ ዬያጉዲ ኔ ዴሮ ጉቤሢዳ

ዓሶኦሬ ካኣቶይዳፓ ዴንዲ ሃኖ ሄላንዳኣና

ኑና ሄሌ ሜታሢ ቢያ ማሌ። +

33 ኔ ኑጊዳ ዎጋኒ ማሊ ማዼ ባካ ፒዜኬ፤

ኑኡኒ ዻቢንቲ ማዼያ ማዔቴያ ኔኤኒ ኔኤኮ ጉሙርቂንቲፆና ዶዴ ቤዛኬ።

34 ኑኡኮ ቤርታኣ ዓዶንሢንታ ካኣቶንታ

ኑኡኮ ሱኡጎንታ ቄኤሶንታ

ኔ ዎጎ ዔያታ ካፒባኣሴ፤

ኔ ዔያቶ ዓይሤ ዓይሢፆንታ ላቲፆዋ ዔያታ ዋይዚባኣሴ።

35 ዔያቶኮ ካኣቶና ኔ ዔያቶም ዒንጌ ዓንጆና

ኔ ዔያቶም ዒንጌ ዳልጎና ማሎ ዓጮናይዳ

ዔያታ ዎዛዺ ናንጋ ዎዶናታዖ

ኔና ዔያታ ካኣሽኪባኣሴ፤

ዔያቶኮ ጎማፓኣ ዔያታ ማዒባኣሴ።

36 ዬያሮ ኔኤኒ ኑ ዓዶንሢም ዓኣፖ ዔያታ ሙዓንዳጉዲና

ኮሺ ባኣዚና ዔያታ ዎዛዻንዳጉዲ

ኔ ዔያቶም ዒንጌ ሳዔሎይዳ

ሃይሾ፥ ኑ ሃኖ ካራሚ ማዔኔ።

37 ኑ ጎሜ ማዼሢሮ ኔ ዖዪ

ኑና ዎይሣንዳጉዲ ኔ ማሄ

ኔኤኒ ዔቂሴ ካኣቶም

ዓጬሎኮ ዓንጆ ዔያቶም ኑ ጊኢሪፆይዳኬ፤

ዔያታ ኑኡና ኑ ቆልሞናይዳ

ዔያቶም ኮሽኬ ባኣዚ ቢያ ማዺ ኩንሣኔ፤

ዬያይዳፓ ዔቄያና ኑ ዼኤፒ ሜቶይዳኬ።»

ዴራ ጊኢጊ ዎላ ቱኬ ባኮ

38 ማዺንቴ ባኮ ቢያ ኑኡኒ ዔኤዔያ ማዒፆ ፃኣፒ ጌሣኒ ኑ ጌስቴኔ፤ ዬኖ ኑኡኮ ፃኣፒ ጌሦናዞይዳ ኑኡኮ ሱኡጎንታ ሌዊ ዓሶንታ ቄኤሶንታ ፔኤኮ ዱማሲ ዔርዛ ማላቶ ዓይሤኔ።

+ 9:7 ማዢ. ማፃ 11፡31—12፡1፤ 17፡5። + 9:8 ማዢ. ማፃ 15፡18-21። + 9:9 ኬሲ. ማፃ 3፡7፤ 14፡10-12። + 9:10 ኬሲ. ማፃ 7፡8—12፡32። + 9:11 ኬሲ. ማፃ 14፡21-29፤ 15፡4-5። + 9:12 ኬሲ. ማፃ 13፡21-22። + 9:14 ኬሲ. ማፃ 19፡18—23፡33። + 9:15 ኬሲ. ማፃ 16፡4-15፤ 17፡1-7፤ ላሚ. ዎማ 1፡21። + 9:16 ፓይ. ማፃ 14፡1-4፤ ላሚ. ዎማ 1፡26-33። + 9:17 ኬሲ. ማፃ 34፡6፤ ፓይ. ማፃ 14፡18። + 9:18 ኬሲ. ማፃ 32፡1-4። + 9:22 ፓይ. ማፃ 21፡21-35። + 9:23 ማዢ. ማፃ 15፡5፤ 22፡17፤ ዒያ. 3፡14-17። + 9:24 ዒያ. 11፡23። + 9:25 ላሚ. ዎማ 6፡10-11። + 9:28 ሱኡጎ. ማፃ 2፡11-16። + 9:29 ሌዊ. ዓኬ 18፡5። + 9:30 2ካኣቶ. ማ 17፡13-18፤ 2ፆኦሲ. ዓሃኬ 36፡15-16። + 9:32 2ካኣቶ. ማ 15፡19፤29፤ 17፡3-6፤ ዒዝ. 4፡2፤ 10።