12
ማይራሞና ዓኣሮኔና ሙሴ ማኪ ጌስቴ ጌኤዞ
1 ሙሴ ዒቶጲያ ዓጫፓ ኩሼ ፃጲ ማዔስኬኖ ዔኬሢሮ ማይራሞና ዓኣሮኔና ዒዛ፦
2 «ናንጊና ናንጋ ጎዳ ኬኤዜሢ ሙሴ ዛሎና ሌሊዳ? ኑ ዛሎና ኬኤዚባኣዓዳ?» ጌይ ዾንኪ ጌስቴኔ፤ ናንጊና ናንጋ ጎዳኣ ዬያ ዔያታ ጌዔሢ ዋይዜኔ።
3 ዓጮይዳ ዓኣ ዓሶይዳፓ ቢያ ባሼ ሙሴ ሼሌዔ ዓሲኬ።
4 ዒማና ኔጉዋዖ ናንጊና ናንጋ ጎዳ ሙሴንታ ዓኣሮኔንታ ማይራሞንታም፦ «ዒንሢ ሃይሣሢ ዓፒሎና ማዢንቴ፥ ፆኦሲ ዴሮና ካኣማ ማኣሮ ዬዑዋቴ» ጋዓዛ፥ ዔያታ ዓኣዼኔ።
5 ዬካፓ ናንጊና ናንጋ ጎዳ ሻኣሬና ኬዲ ዓፒሎና ማዢንቴ ማኣሮ ካራ ዔቃዖ፦ «ዓኣሮኔ! ማይራሜ!» ጌይ ዔያቶ ዔኤላዛ፥ ላምዖንሢ ዒዛ ቤርቶ ሺኢኬኔ።
6 ናንጊና ናንጋ ጎዳ ዔያቶ ኮራ፦ «ታ ዒንሢም ኬኤዛሢ ዋይዙዋቴ! ዒንሢ ባኣኮይዳ ታ ማሊሢ ኬኤዛ ዓሲ ዓኣያ ማዔቴ ታ ዔያቶም ታና ፔጋሲ ዻዋሢ ዱማ ጎይሢና ታኑሞ ዻዊ ዔርዚ፤ ጊንሣ ሃሣ ዓውቲናኣ ኬኤዚኬ።
7 ታ ዓይላሢ፥ ሙሴና ታ ጌስታሢ ጋዓንቴ ያዺዲቱዋሴ፤ ዒዚ ታ ማኣሮይዳ ጉሙርቂንታ ዓሲኬ።
8 ዬያሮ ታ ዒዛና ፔጌና ጌጌስታኣፓዓቴም ዓኣሺንቴ ጎይሢና ታ ዒዛም ኬኤዙዋሴ፤ ዒ ታና፥ ናንጊና ናንጋ ጎዳሢኮ ዓውካሮ ዛዛጋኔ፤ ሂዳዖ ዒንሢ ታ ዓይላሢ፥ ሙሴ ዎይቲ ጫርቂ ዾንካኒ ዳንዳዔይ?» ጌዔኔ።
9 ናንጊና ናንጋ ጎዳ ዻጋዺ ዔያቶ ጎሬስካፓ ዓኣዻዛ፥
10 ዓፒሎና ማዢንቴ ማኣራፓ ሻኣራ ዔቂ ዴንዴኔ፤ ዒማና ዑፃ ኬስካ ዶርዓሢ ማይራሞ ዓርቄኔ፤ ዑፃ ዒዞኮ ቢያ ቲልቢ ሻቺጉዲ ቦኦሬኔ፤ ዒዛ ያዺ ማዔሢ ዓኣሮኔ ዛጋዖ፥
11 ሙሴ ኮይላ፦ «ታ ጎዳ፥ ኑ ዔኤዪ ማዼ ጎሞ ሃያ ዔኤቢኬ ጌይ ዓርቂፖ፤
12 ማይራማ ዒንዶ ጎጶይዳ ዓኣዖ ሃይቂ፥ ዛሎ ዑፃ ሙልጌያ ማዒ ሾይንቴ፥ ቡሊሢ ማሊ ሃኣዺዲ ዓታንዳጉዲ ዛጊ ዚቲ ጌይፖ» ጌዔኔ።
13 ዬያሮ ሙሴ፦ «ናንጊና ናንጋ ጎዳሢዮ! ሃዳራ ዒዞ ፓሤ» ጌይ ፆኦሲ ባንሢ ዒላቴኔ።
14 ናንጊና ናንጋ ጎዳ ዒዛም፦ «ዒዞኮ ዓዴ ዻጋዺ ዓኣፖ ካራ ጩቴያ ማዔቴ ዒዛ ቦርሲንቴያ ማዒ ላንካይ ኬሊ ዴዓንዳያቱዋዓዳ? ዬያሮ ዒዛ ጉርዳፓ ኬስኪ ላንካይ ኬሊ ሄላንዳኣና ዓሲባኣ ቤስካ ዴዖንጎ፤ ዬካፓ ጉርዶ ዒዛ ጌላኒ ዳንዳዓኔ» ጌዔኔ።
15 ዬያሮ ማይራማ ጉርዳፓ ኬስኪ፥ ዓሲባኣ ቤስካ ፔኤሮ ዱማዺ ዴዔኔ፤ ዒዛ ዓሶ ባኣኮ ማዒ ሙካንዳያ ሄላንዳኣና ዓሳ ዬኖ ጉርዶ ሃሺ ዓኣዺባኣሴ።
16 ዬካፓ ሄፂሮቴይዳፓ ዔቂ ፓኣራኔ ቦኦሎይዳ ዓሳ ዱንኪ ዴዔኔ።