140
ዓይኑሞ ሱኡጋሢ ዓይሣ ጎይፆ ዓይናዺንታ ዳውቴ ዓይኑሞ
ፆኦሲ ማኣዳንዳጉዲ ሺኢቂንታ ሺኢጲሢ
1 ናንጊና ናንጋ ጎዳሢዮ! ፑርቶ ዓሶፓ ታና ዓውሴ፤
ጌኖ ማዻ ዓሶ ኩጫፓኣ ታና ቶሊሴ።
2 ዔያቶኮ ዒና ፑርታ ማዾንዳያ ማሊ ቱካኔ፤
ቢያ ዎዴ ዑራ ሌሊ ዔያታ ማዣኔ።
3 ዔያቶኮ ዒንዲርዛ ፑርታ ሾኦሺጉዲ ዻዻዓያኬ፤
ዔያታ ዻንጋፓ ኬሳ ባካ ዶርባ ሾኦሺ ማርዜኬ።
4 ናንጊና ናንጋ ጎዳሢዮ! ፑርቶ ዓሶ ኩጫፓ ታና ዓውሴ፤
ታኣኮ ቶኮ ቡኡዳኒ ማላ ጌኖ ዓሶፓ ቶሊሴ።
5 ዖቶሮ ዓሳ ፒሮ ታኣም ዓኣቺ ፒሬኔ፤
ፒሮ ሱሲ ታና ቡኡዳኒ ዔያታ ታ ቤርታ ዋሄኔ፤
ፒራሢና ታና ዓይሣኒ ታኣኒ ሃንታ ጎይፃ ዔያታ ፒሬኔ።
6 ናንጊና ናንጋ ጎዳሢ፥ «ታኣኮ ኔኤኒ ፆኦሲኬ» ታ ጋዓኔ፤
ናንጊና ናንጋ ጎዳሢዮ! ታ ኔና ሺኢቂ ዒላታ ዒላቶ ዋይዜ።
7 ዎልቄና ዓኣያ ማዒ ታና ዓውሳ
ናንጊና ናንጋ ታ ጎዳ ማዔ ፆኦዛሢዮ!
ዖሎ ዓቦና ጊቲማ ማዒ ሂኢዣ ታና ዓይዱዋጉዲ ቃዜ።
8 ፑርቶ ዓሶም ዔያታ ኮዓ ባኮ ዒንጊፖ፤
ዔያታ ማሊ ቱካ ቱኡዞ ዔያቶም ሃኒሲፖ።
9 ታና ማንጌ ታ ሞርካ ታና ባሻንዳጉዲ ማሂፖ፤
ዔያታ ማዻኒ ማላ ጌኖ ማዾ ዔያቶ ባንሢ ሺርሼ።
10 ታሚ ቄንሢ ዔያቶ ዑፃ ኬዶም፤
ዬካፓ ዔያታ ቶሊ ኬስኩዋጉዲ ታሚዳ ዓጊንቶም፤
ኮሺ ዔታዻያ ቶርጴ ዓኣ ዔቴይዳ ኬኤሪንቶም።
11 ሉኡዙሞና ዓሲ ፑሽኪ ሃንታ ዓሲ ሳዖይዳ ናንጎፓ፤
ጌኔ ማዻ ፑርቶ ዓሶ ፑርታ ባኣዚ ኬሚ ባባይዞም።
12 ናንጊና ናንጋ ጎዳሢዮ! ማንቆ ዓሶም ፒዜ ዎጌ ኔ ዎጋሢንታ
ሄርቂንቲ ዎይሢፆና ሜታዻ ዓሶ ዛሎ ኔ ሞኦታሢ ታ ዔራኔ።
13 ኮዦ ዓሳ ጎኔና ኔና ጋላታኔ፤
ኔ ዓኣ ቤዞይዳ ኔኤና ዎላ ዶዲ ዔያታ ናንጋንዳኔ።