KOLOSI
KUIMP TEPA IK KɄⱠ
Ya Buk Ei Nga Puⱡ Ei:
Pol ndi, mon ei ropa kʉn, Got nga rapa tenda ila wamp kʉⱡ nga uⱡ ⱡawa etmʉn mbʉ, nimba mot ndupa, wote wamp mbʉ, ora ndupa Kraist nga uⱡ mbʉ, wamp mbʉ kʉn tepa pora ndurum nitim.
Ya Buk Ei, Nam Ndi Rurum:
Ya Buk ei, Pol ndi, mon rurum.
Mon Ropa Nam Ngurum:
Pol ndi, mon ei ropa, Got nga rapa tenda wamp met Kolosi kona peng titim ila ropa ngurum.
Ui Nant Ila Rurum:
Mon ei, Pol Rom kona ila kan manga pepa rurum. Ei Kraist metʉng ei kʉn, mbuldung orunga pana 60 (AD) ila kʉⱡ rurum.
Ik Ronduⱡ: Kolosi 2:9-10
Got nga numan pilpa uⱡ etʉm mbʉ pora, Kraist nga kʉng ila peka ropa morum. Wamp nga uⱡ etmin ronduⱡ mbʉ kʉn, mel nant kanmʉn mbʉ nga pora, Kraist ei wu peng mumuk ei morum. Ei nga, enim Kraist kʉn molk, numan kont ila peka rangga muⱡʉi!
IK PENG KɄⱠ
Rump
1:1-1:2 - Pol ndi, mon ropa, Kolosi wamp kʉⱡ ngurum
1:3-1:14 - Got ndi, Kolosi wamp kʉⱡ nga mondpa pili orunga etpa ronduⱡ mundrum
1:15-1:23 - Kraist elim wamp mel raⱡpa kongun itim
1:24-1:29 - Pol ndi, Kolosi wamp kʉⱡ tʉpa rʉpʉndrʉm
2:1-2:5 - Mondpa pili orunga ronduⱡ pangga, ik kol mbʉ, tʉk mana ndʉi
2:6-2:23 - Kraist kʉn rʉmp nduk molk, numan kont ei tʉmin
3:5-3:17 - Uⱡ unt nga uⱡ kont nga
3:18-3:21 - Wu amp mbʉ kʉn kangambuⱡa na mbʉ nga ik
3:22-3:25 - Kongun wu mbʉ kʉn, en enim nga wu nuim mbʉ nga man ik
4:2-4:6 - Man ik kʉⱡ
4:7-4:17 - Pol ndi, Tikikus Onesimas raⱡ tʉpa mundrum
1
Pol Ndi, Mon Ropa Kolosi Wamp Kʉⱡ Ngurum
1-2 Na Pol, Kraist Jisas nga nombuⱡa rung wu ei. Got elim nga numan ila, na tʉpa nombuⱡa rung wu mundrum. Na kʉn ana, Timoti raⱡ moⱡpʉⱡ, mon ei ropʉⱡ, enim Got nga wamp Kolosi kona ila Kraist mondʉk pʉtmin wamp kʉⱡ kʉn, mon rop ngʉnmbʉⱡ. Tʉn nga pora, Got Tipam ei ndi, enim numan kai mbʉ ngumba, moⱡpa kundi uⱡ ei nga, enim kʉn piyangga!
Got Ndi, Kolosi Wamp Kʉⱡ Nga Mondpa Pili Orunga Etpa Ronduⱡ Mundrum
3 Tʉl ndi, enim nga orunga atinga rondʉrmbʉⱡ ei kʉn, tʉl ndi, Nuim Jisas nga Tipam Got ei kʉn, angge rʉk rʉk nʉtmbʉⱡ.
4 Ei nambuⱡ emel, tʉl pʉtmbʉⱡ ei, enim nga mondpa pili orunga, Kraist Jisas kʉn tek, Got nga wamp mbʉ kʉn, wamp numan ngui uⱡ ei etmin.
5 Ik kupa, Rʉnang Ik Kai kʉⱡ, enim kʉn kuimp tepa urum ei kʉn, enim muⱡ kona ting mel mbʉ pʉtʉng ei mel nokundʉk mormin. Ei nga, enim nga mondpa pili uⱡ ei kʉn, wamp numan ngui uⱡ etʉk tek mormin ei, wi muⱡ kona Got Tipam ei ndi, enim nga mel ting mbʉ tendpa kai etpa morum mbʉ ting. Ei nga, uⱡ nʉnmʉn mbʉ etʉk mormin.
6 Rʉnang Ik Kai nga memp kai mbʉ omba pol ila oⱡnga, akup muⱡ uⱡ mbila pora, tepa ndaip nʉnʉm. Ei kʉn, enim unt ui ti puⱡ mondʉk, Got nga wamp pol tʉtʉm uⱡ ei, pilik tʉk, akup minal pep rok enmin ei mel ku.
7 Tʉl nga kongun peng rʉp wu Epapras kʉn, enim Got nga wamp ruk tʉtʉm uⱡ ei, pilik kandʉk tʉtʉng. Wu ei, Kraist nga kongun wu ronduⱡ ei, tʉl kongun etmbʉⱡ ei mel ku etʉm.
8 Enim Muⱡnga ei ndi, nimba nguⱡnga, wamp numan ngui uⱡ etmin mbʉ, wu ei ndi, tʉl kundpa nitim.
9 Wote, uⱡ puⱡ ila, enim nga ik timan mbʉ, kuimp tep pʉtmbʉⱡ ui ei kʉn, enim nga atinga rondʉp mint ormbʉl. Tʉl ndi, Got waldpʉⱡ, elim nga Muⱡnga ei ndi, enim Got nga pitim uⱡ mbʉ nga pilpa kungndi kai mat ngangga, pilpa kungʉndi orunga, etpa piral ndupa tangga! Wote, pilpa mbi ndui uⱡ ei, pilik teing nʉmbʉⱡ atinga rundurmbʉⱡ.
10 I tambuⱡa kʉn, enim Nuim ei nga numan pʉtʉm uⱡ mbʉ mel etʉk, wamp kupa mbʉ molk, rʉk rʉk Nuim ei nga numan ngurum uⱡ mbʉ itʉi! Ei nga, enim nga kongun etʉk, pek nok andurmʉn puⱡ orunga, Got nga uⱡ kai mbʉ pilik kelik etʉk, wote Got nga pitim uⱡ mbʉ, enim kʉn tepa mba ou itangga!
11-12 Tʉlndi enim nga atinga rondpʉⱡ kʉn, Got elim nga uⱡ eng nui kai ronduⱡ tetʉm mbʉ ndi, enim etpa ronduⱡ mundangga, wote enim mbun mindil uⱡ pem mbila, ronduⱡ puk molk, numan kun koma ti uⱡ mbila mint etʉk muⱡʉi! Wote ambulk palk, Got Tipam ei kʉn angge nʉi! Ei nambuⱡ emel, Got ei ndi, elim nga tʉpa mumuk rui kona rʉⱡang pi ei, enim tʉpa ngumba pilpa tʉpa kun, inditim kona ei ting.
13 Got Tipam ei ndi, tʉn wamp mbʉ pora, rumbʉⱡ mul uⱡ mbʉ nga ronduⱡ ila moⱡmina, tʉn etpa tʉpa, wote rʉp etpa mepa mba, elim nga Kangʉm nga tʉpa mumuk rui uⱡ ila mepa purum.
14 Wote, Got elim nga kangʉm ei ndi, tʉn nga uⱡ kit etmin mbʉ tinga nduⱡnga, tʉn akup wei mormun.
Kraist Elim Wamp Mel Raⱡpa Kongun Itim
15 Got ei mo ropa morum, kʉnmin ei mel, Kraist kʉndʉrmʉn. Kraist ei, Got nga kangʉm kumina ei. Got ndi, mel mbʉ pora, mim itim mbʉ nga Kraist ei, ama oⱡa orunga morum.
16 Kraist ei moⱡnga kʉn, Got ndi, muⱡ kona ila kep, ya mʉi kona ila kep, kʉni nʉkʉni mel, mel tetʉm mbʉ pora itim. Wu king, gapman muna, wu Nuim na, wote mel namba mel tetʉm mbʉ pora, Got ndi, Kraist iti nilinga itim. Ei nga mel mbʉ pora, Kraist moⱡnga mint itim ei nga mel mbʉ pora, Kraist nga tetʉm.
17 Kraist ei, kuimp tepa moⱡnga kʉn, mel mbʉ pora akil tepa itim. Ei nga, Kraist nga ronduⱡ ila mel mbʉ pora, tʉpa tenda etpa ambuⱡpa morum.
18 Rapa tenda ila wamp mbʉ nga peng ei, elim morum. Wote, elim nga kʉng kʉⱡ rapa tenda ila wamp kʉⱡ. Elim nga kangʉm kumina ei, koⱡpa kont mul uⱡ ei nga, elim puⱡ mondpa etpa, akup elim mel mbʉ tʉpa mana ndupa, elim kuimbal morum.
19 Got elim nga numan ila, elim namba uⱡ etʉm mbʉ pora, kangʉm kʉn ngumba rukʉr ndurum.
20 Got elim nga kangʉm ei moⱡnga kʉn, mʉi kona mel mbʉ pora, aldpa elim ndi rukʉr titim. Elim nga kangʉm, nde peta ila kurum uⱡ ei ndi, moⱡpa kundi uⱡ kai ei, muⱡ kona ila kep, wote ya mʉi kona ila kep, mel mbʉ pora, elim rukʉr titim.
21 Unt, enim Got kʉn ruⱡ etʉk, el rui wamp mel molk, numan kit pendʉk, uⱡ kit mbʉ etʉng.
22 Wote akup, elim nga kangʉm nde peta ila kurum uⱡ ei ndi, enim etpa elim nga wamp mbʉ randpa, elim nga kuimp keta ila wamp kun kai wingti kʉⱡ, muⱡeing nimba itim.
23 Ei nga, enim nga mondpa pili orunga, ronduⱡ pangga muⱡʉi! Enim Rʉnang Ik Kai ei, kuimp tek pilik tʉtʉng ni kʉⱡ, mel ti ndi kundpa, ekit ti nʉtangga! Na Pol, Rʉnang Ik Kai ei nga kongun kindmant wu ei moⱡʉp, ik ei nilmba, mʉi kʉmp kona mbila pora, pilik tʉnmin.
Pol Ndi, Kolosi Wamp Kʉⱡ Tʉpa Rʉpʉndrʉm
24 Akup na ndi, enim nga nʉmp mindil tʉnt uⱡ ei, numan enim. Nambuⱡ emel, na nga kʉng ei, wak rop, Kraist nga mindil nurum kʉng nit ei, tʉp rapʉndʉp etʉp, ora nduimp nʉmp it. Ei elim nga manga wingti ila wamp kʉⱡ nga, na nga kʉng orunga, mindil timp uⱡ ei ndi, Kraist nga mindil nurum kʉng ei kʉn mba, kapⱡa etangga!
25 Got elim ndi, enim molk kai mundeing nimba, na wi ropa tʉpa kindmant kongun ei tʉpa ngurum. Kongun ei, Got elim nga nombuⱡa rung ik ei neimp nimba itim.
26 Ik ei, unt kor nga ui mbila, wamp nga kuimp keta ila mo ropa titim. Akup wamp kʉⱡ nga kuimp keta ila etpa mot ndunum.
27 Got nga numan ila pʉtʉm uⱡ ei, elim nga uⱡ mo ropa titim mbʉ, elim nga wamp mbʉ kʉn, tʉpa mot ndurum. Uⱡ eng nui kai tetʉm mbʉ, wamp mbʉ nga pora tendʉtʉm. Ik mo ropa ei, Kraist ei nim kʉn rukʉr morum ei ndi, nim etpa tʉpa muⱡ kona mepa mba.
28 Ei nga, Kraist nga Rʉnang Ik Kai ei, wamp mbʉ kʉn pora nʉmp ngurmʉn. Pilpa kungʉndi numan ronduⱡ mbila, moⱡpʉn wamp mbʉ, man ngumbun mbo endpʉn itamina, wamp tenda nimba, Kraist kʉn ok tʉk tenda etʉk, ronduⱡ puk muⱡeing.
29 Uⱡ i itimp pilip kʉn, na nga ronduⱡ ei, kʉmp kʉm ruk ndup, kongun ronduⱡ mundʉp et ei, Kraist na kʉn moⱡpa, kongun elinga et.