21
Sara Hayau Aisak
1 Toxoratamona su mana haruanganoa saing libu xai mana Sara bila hau haruanga muga ba.
2 Baing Sara gamona saing hayau gara lup tela na Ebraham bungina wa konga, taxa mana bungina Urana hau haruanga muga mana ba.
3 Baing Ebraham sina yaya Aisak na gara Sara hayau ba.
4 Garanoa Aisak xaidabindi 8, baing Ebraham xuxu sangganoa bila Urana tabina.
5 Ebraham nianindi 100 bungina Sara hayau garanoa Aisak.
6 Baing Sara harua ba, “Urana hauli nga ba ngamasisi, saing lipu longgalo dilungu alali bagula dimasisi rangua nga.”
7 Saking harua ba, “Muga lipu gaxarea sanga ba bala Ebraham ba, ‘Sara bagula ta su na gara’? Ning ngahayau gara na bungina wa konga!”
Ebraham Suka Hagar Ismael Tang
8 Aisak tubu saing yunga sua, baing mana xaidapka naga Ebraham tau anginga sabanga ba dimogu.
9 Ne Sara bagu haing Isipkama Hagar garanoa, gara ba hayau na Ebraham ba, masisia Aisak.
10 Binabu harua na Ebraham ba, “Usuka haing oxata olanggama garanoa tang mala, namua na labu haing oxata olanggama garanoa ba xap xalingim telau tai! Bungina umati, garagua Aisak ing ganina bagula xap.”
11 Haruanga ba libu Ebraham hatuminga mauxang sibuna, namua na Ismael xauna garanoa.
12 Ne Urana harua na Ebraham ba, “Labu hatumingam mauxana mana garama haing oxata olanggama tanggu tai. Baraxing baraxinta Sara harua naung, bing ulibu, namua na garam xumana ngahau haruangua ranguaung manadi ba, bagula disok mana Aisak.
13 Ne bagula ngalibu haing oxata olanggam garang bakbagindi disok numanuma xauna, namua na garama xauna.”
14 Buraging buraraging sibuna baing Ebraham mesa xap anginga xaung asaxa sangganoa baxagi mana langa, saing sinadi na Hagar. Tadi yaxunia, sina garanoa na, saing soxi dingtang mala. Tang dila baing dahaxa mauli maluxuʼm long xoliana Berseba.
15 Langga wa sanggania ila sup, baing yunga gara matabu xai kaxukan tela namuya.
16 Baing ila rung hasoya monga, bila galunga ri maxaxayanganoa, namua na hatum ba, “Sanga ba ngabagu garua mati te.” Hagar rung mua la ba, baing ila rung saing ungguti tang haringina.
17 Urana lungu garua tang mua, saking Urana uleginama wagi masok ma long xaiya mana Hagar ba, “Hagar, mauxangama baru? Labu umaxuwau tai. Urana lungu garua tang mua mana longga wa mana ba.
18 Umesa. Ula uhauli ba mesa utatua atindi. Namua na bagula ngalibu garandi disok bakbak xumang sibuna.”
19 Baing Urana hatanga lang bangguming tela na. Binabu ila xu asaxa sangganoa, saing sina na garua ba nung.
20 Urana wa rangua garua saing tubu. Wa long xoliania, saing ruanginoa haring.
21 Rung mana Long Xoliana Paran, baing bauna xap haing Isipkam tela ma ba wa haininoa.
Ebraham Abimelek Tang Dahau Haruangua
22 Mana bungina baguba, Abimelek gabu lipuxing haungingamdi yanamidinga Pikol tang dila rangua Ebraham saing harua ba, “Urana wa ranguaung mana axamang longgalo ulibudi.
23 Binabu uharingia haruangama xaung Urana yanoa uharua maxung sibuna nanga ba bagula utuxu murak manga te, xaung mana garagudi te, xaung mana bakbagigudi dima kimuya te. Ulibu kubolu xaiyua nanga xaung na (lipuadi duwa mana) numanuma li uwa lobu mana ba, bila (waleu ma) ngalibu kubolu xaiyua naung ba.”
24 Baing Ebraham harua ba, “Ngaharua maxung sibuna bila ba.”
25 Sup, baing Ebraham hati Abimelek mana langing bangguming tela Abimelek lipuxing oxatamdi dituxu.
26 Ne Abimelek harua ba, “Ngaxabia (lipu) gaxarea libu te. Ubala nga nulana te. Hata sibuna li ngalungu (ba).”
27 Binabu Ebraham xap sipsipdi xaung bulmakaudi dima saing sinadi na Abimelek, saing tang dahau haruangua.
28 Ne Ebraham ta sipsip hagaxang tutubing 7 halianga.
29 Baing Abimelek xusunga Ebraham ba, “Baru namuxinta uta sipsip hagaxang tutubing 7 halianga?”
30 Haxuya ba, “Oxop sipsip hagaxang tutubing 7 bagudi li. Bila balau bagula uhatanga ba hatumingara taininau ba ngaki lang banggumina li.”
31 Binabu duxu longga ba Berseba, namua na tang dahau haruangua la ba.
32 Tang dahau haruangua Berseba laing sup, baing Abimelek gabu lipuxing haungingamdi yanamidinga Pikol tang digoxoya mala mana Pilistiadi titidinga.
33 Ebraham rang xaiya tamaris(k) (tela) Berseba, saing uxu Toxoratamona yanoa la ba, sabu mana Urana Bungingbunginaloama.
34 Baing Ebraham wa lobu bunging maxaxaya monga mana Pilistiadi titidinga.