9
Urana Mogu Isreldi
1 Tauna, haruanga bagula ngabaxanga li maxuna. Ngalangua te, namua na ngataga rangua Kristo. Urana Aningonoa wa etua mana hatumingagua ba haringia, binabu ngaxabia ba maxung sibuna.
2 Bungingbunginalo ayangagu sibuna saing hatumingagua mauxang sibuna
3 mana bakbagigudi, riagu Yudadi. Nabu haulidi ba dahatum haringina mana Kristo, bing murugu ba ngayunga nga bu Urana libu doa manga saing hitixiya nga sangua Kristo. Murugu sibuna manadi bila ba.
4 Ding Isreldi, Urana xapkutidi bila garandi, hatanga ralanoa nadi, saing hau haruanga xumana ranguadi. Sina hanaunaunganoa nadi, hatanga daxanganoa nadi ba disabu mana baru, saing hau haruanga xumana ba haulidi.
5 Ebraham, Aisak xaung Yekop ding mugangadingdi. Kristo ing sibuna Isrel tela. Sibiding tela. Kristo ba Urana baing. Wa etua mana axamang longgalo, saing taiti yanoa bungingbunginalo! Maxung sibuna.
6 Isreldi diyamu Urana, ne bola ahagaxa ba haruanga Urana hau ranguadi ba xung mari olang? Tegu. Namua na Isrel bakbaging longgalo Urana lipuxindi te.
7 Baing xauna, Ebraham bakbaging longgalo garang sibundi Urana maxania te. Tegu. Namua na Urana harua na Ebraham ba, “Garam xumana ngahau haruangua ranguaung manadi ba, bagula disok mana Aisak.”
8 Mana haruanga ba tabagu ba lipu gaxarea disok Ebraham garandi mana sibinoa ing ganina, adi duwa Urana garandi maxania te. Ning lipu gaxarea disok mana haruanga Urana hau, adi ba duwa Urana garang sibundi naga.
9 Ahatum muli to. Ebraham garanoa Ismael wa masup ba mana xaidapka Urana hau haruangua mana gara tela ba, “Bagula ngagoxoya ma muli mana sobakka baguli niani etuama, saing Sara bagula sep ing sibung garang luba.”
10 Ina naga mugangaroa Aisak. Axamang tela muli bing kimuya mana yau Rebeka, hayau haragaragangandi.
11-12 Ning muga mana hayau dingtang, muga mana tela libu xai kimbo doa, Rebeka xap ulek tela rangua Urana, harua ba, “Matuaua bagula tuxu kixinginoa oxatanoa mana.” Urana harua bila ba bu hatanga ba daxanganoa mogu lipudi mana baru. Wagi mana lipudi, ne namua wagi manadi bing kuboludingdi te, namua wagi manadi bing ing sibung murunganoa.
13 Bila Urana harua mana Xuanoa ba, “Yekop murugu sibuna mana, ne Iso murugu mana te.”
14 Binabu taharua baru? Bola Urana kubolung suxuyangama maring te? Tegu sibuna!
15 Namua na harua na Moses ba,
“Bagula ngausinga lipu gaxarea ngausinga,
saing bagula atigu mana lipu gaxarea atigu mana.”
16 Binabu bungina Urana mogu lipu tela, alaba sok mana lipua ba murunganoa te, kimbo sok mana lipua ba kubolunoa te. Tegu. Sok mana Urana usinganganoa ing ganina.
17 Namua na mana Xuanoa bala Pero, Isip Xaitamoxi, ba, “Ngamogung mana namua li naga, bu ngahatanga haringingagu sabanga mana axadi ngalibudi disok maung, xaung bu yagua sabanga naxuyanganoa bagula sup mala mana titi longgalo.”
18 Baing ina naga, tabagu Urana usinga lipu gaxarea bo manadi, saing libu hatumingadingdi diriba ding mana lipu gaxarea bo manadi.
19 Bola angia tela bo ba hati nga ba, “Nabu Urana libu bila ba, bing baruta su haruanga nakira mana kubolura diandi? Namua na lipu tela sanga ba xukxugia Urana murunganoa te!”
20 Ne ung lipu ing ganina, binabu ung gaxarea ubo ba uhakhaxi rangua Urana? Axa lipu tela tongtongia sanga ba hakhaxi rangua lipuxing tongtongiangama bila li te: “Utongtongia nga bila li baru?” Tegu.
21 Lipu bori tongtongianganama bagula xap titi hataing tela, saing mana ing murunganoa tongtongia tela mana oxata xai sibunam xaung tela mana oxata xaidap taining taininam. Kubolunoa maring? Wane.
22 Baing Urana xauna sanga ba libu ing murunganoa, bo? Bola bo ba hatanga ating salianoa xaung haringinganoa, ning ina lipu kubolu ragunganam, binabu ragu sibuna mana lipuadi ating salianoa wa manadi, adi daxauxau mana dahanggalang.
23 Bola libu bila ba bu hatanga ralang subingang teguama masok na adi usingadi, adi xauxaudi muga bu duwa ralania kimuya.
24 Adi wagidi ba kira baing. Ne wagi kira mana Yudadi ding ganiding te, wagi kira mana Yuda Teguamdi xauna.
25 Bila harua mana Yuda Teguamdi mana Hosea xailongina ba,
“Lipuadi ngayuadi te, bagula ngauxudi ba, ‘Lipuxigudi’,
saing lipuadi ngahatanga ba murugu sibuna manadi te, bagula ngauxudi ba, ‘Lipuadi nga murugu sibuna manadi,’ ”
26 baing xauna harua ba,
“Mana longga ngabaladi ba,
‘Ang lipuxigudi te,’
bagula ngauxudi ba ‘Urana walingama garandi.’ ”
27 Aisaya hatumia Isreldi saing wagi ba,
“Heku Isreldi xumang sibuna bila ulangulang,
hataing kaxukang sibuna ing ganina bagula Urana xapdi muli.
28 Namua na Toxoratamona bagula libu haruangang suxuyangama mana titia li,
bagula libu masup sap, sanga ba halisi te.”
29 Baing bila Aisaya harua muga ba:
“Nabu Toxoratamona Haringing Sibunama
yunga bakbagira teladi duwa te,
bing bagula taxap hanggalangiangua bila Sodamdi ba,
tasup bila Gomoradi baing.”
Isreldi Dahatum Haringin Te
30 Binabu taharua baru mana axadi ba? Namua bing Yuda Teguamdi disai daxanga te bu disok maringina Urana maxania, ning disok mana namua na dahatum haringina mana Kristo.
31 Ne Isreldi disu mana daxanga hanaunaungam bu disok maringina Urana maxania, ning dilibu sus.
32 Baruta? Namua dibagu te bing dahagaxa ba daxanga disu mana hanaunaungua bagula libudi dimaring mana kuboludingdi, ne Urana daxangang hatuminga haringinama dahatumia te. Kristo bila siang tela wa daxangia, saing Isreldi ditatuaki mana, xungdi mari.
33 Bila Aisaya bung Urana haruanganoa ba,
“Bagu ngata lipu tela mana Xaxagana Sayon bila siang tela lipudi ditatuaki mana,
bila siang tela libudi xungdi mari mana,
ne lipu gaxarea dahatum haringina mana bagula memeyading te.”