45
Tano iharina bona hahetoho
1 Tano ba haria negana ai, tano kahana ba gwauraia hidi Iehova ena, kaha helaḡana ai bainela. Ena lata na kiubit gerebu rua daha ima bona ena lababa na kiubit gerebu rua; ia na baine helaḡa ela bona hetoana idoinai.
2 Ia lalonai gabu ta baine mia, dubu helaḡana gabuna, ena lata bona ena lababa bae heḡereḡere, kiubit sinahu-ima; bona hegeḡemadai ai tano taina baine mia ḡagae, ia lababana na kiubit imahui.
3 Hari kaha helaḡana lalonai, tano ta ba hahetohoa, ena lata na kiubit gerebu-rua daha-ima bona ena lababa na kiubit gerebu-ta; ia lalonai dubu helaḡana, helaḡa herea gabuna, na baine gini.
4 Una tano na tano helaḡana ai bainela; ia na hahelaḡa taudia, dubu helaḡana ai kara helaḡadia e karamu bona Iehova isiaina ilaohenina totona e raka henia kahimu taudia edia; edia ruma gabudia tanona, bona dubu helaḡana tanona helaḡana ai bainela.
5 Ma kaha ta, ena lata na kiubit gerebu-rua daha-ima bona ena lababa na kiubit gerebu-ta na Levi taudia, dubu lalonai kara helaḡadia e karamu taudia, edia; bae ḡaunaia, bae noholaidia hanuadia unuseni ai bae hadai.
6 Vada o gwauraia hidi, kaha helaḡana ai o halaoa, tanona badibadinai, hanua tanona ba duanaia, ena lababa na kiubit daha-ima bona ena lata na kiubit gerebu-rua daha-ima; ia na Israel besena idoinai ese baine ḡaunaia.
7 Bena kaha helaḡana ohena ohena tanodia bona hanua ena kaha ohena ohena tanodia, lahara kahana ai bona laurabada kahana ai, na hanua pavapavana ese baine ḡaunaia, ena lata na iduhu ta ahuna ena lata heḡereḡerena, lahara kahana hetoana ela bona laurabada kahana hetoana.
8 Una na ia ahuna korikorina Israel ai. Bena pavapava ai baina halaodia taudia ese egu orea taudia na basie hahisihisidia lou; a tano na Israel besena taudia bae henidia, edia iduhu ta ta ai.
9 Ḡaubada Iehova na ini e gwau tomamu: Israel pavapavadia e, vadaeni! Daḡedaḡe bona hahehisi karadia ba negedia; hahemaoro ḡoevaḡoeva bona kara maoromaoro ba kara; egu orea taudia ilulu-lasidia ba hadokoa. Ḡaubada Iehova na e herevamu.
10 Hahetoho ḡaudia momokanidia bavabi, bona efa momokanina bona bata momokanina danu.
11 Efa bona bata anidia bae heḡereḡere; bata gwauta na homere ta heḡereḡerena, bona efa gwauta na homere ta heḡereḡerena. Hahetoho ḡaudia iboudiai ibadidia na homere.
12 Sekele na gera ruahui heḡereḡeredia; sekele ima be sekele anidia korikoridia inta ba heni, bona sekele gwauta be sekele anidia korikoridia gwauta ba heni. Emui mina lalonai sekele bae imahui.
Boubou bona Aria
13 Boubou ḡaudia na ini ba heni toma: uit homere ta lalona amo efa ta ba karoaia, karoa tauratoi, bena karoa ta ba heni; bona bali homere ta lalona amo efa ta ba karoaia, karoa tauratoi, bena karoa ta ba heni;
14 bona dehoro ahuna na koro ta ta lalodia amo bata ta ba karoaia, karoa gwauta, bena karoa ta ba heni. (Hari koro lalonai na bata gwauta, homere heḡereḡerena).
15 Bona mamoe sinahu-rua sinahu-rua amo mamoe ta ta ba heni; Israel iduhudia iboudiai ese unu bae heni toma. Boubou ḡaudia bunu, flaoa bouboudia bona ḡole-oho bouboudia bona maino bouboudia, edia dika iabi-ohodia ḡaudia. Ḡaubada Iehova na e herevamu.
16 Tano taudia iboudiai ese ini boubou ḡaudia na Israel pavapavana bae henia.
17 Hanua pavapavana ena ḡaukara korikori be ḡole-oho bouboudia bona flaoa bouboudia bona inuinu bouboudia ḡaudia baine heni, aria negadia ai bona hua matamatadia negadia ai bona dina helaḡadia ai, Israel besena ena aria korikoridia iboudiai negadia ai. Ia ese kara dika bouboudia bona flaoa bouboudia bona ḡole-oho bouboudia bona maino bouboudia ḡaudia baine heni, Israel besena ena kara dika iabi-ohodia ḡaudia.
18 Ḡaubada Iehova na ini e gwau tomamu: Hua gini-gunana dinana gini-gunana ai, boromakau natuna maruanena asi bebeka-bebekana ta bavabia, bena gabu helaḡana ba haḡoevaia.
19 Hahelaḡa tauna ese kara dika iabi-ohona boubou ḡauna rarana kuri ta baine abia, dubu iduaradia ihua-ihuadia bona ihaboulaina patana isena daigunina haniosi bona laloma maḡuna ikoukouna audia baine dahulaidia.
20 Hua dinana ihahituna ai danu unu ba kara toma, kara-rea eiava mata-lahui dainai vada e kara dika tauna bagunai; unu amo dubu ba haḡoevaia.
21 Hua gini-gunana dinana ihag vauta-hanina ai, lagau-hanai ariana ba karaia; dina hitu lalodiai asie hatubua flaoana bae ania.
22 Una dina ai, hanua pavapavana ese boromakau natuna maruanena ta baine heni, dika iabi-ohona boubouna ḡauna, ia bona tano taudia iboudiai daidiai.
23 Bona aria dinadia hituosi lalodiai ia ese boromakau natudia mamaruanedia hitu bona mamoe mamaruanedia asi bebeka-bebekadia hitu baine heni, Iehova ena, unu dina ta ta ai, ḡole-oho boubou ḡaudia; bona nani maruanena ta, unu dina ta ta ai, dika iabi-ohona boubouna ḡaudia.
24 Ia ese danu flaoa boubouna baine heni, efa ta ta boromakau mamaruanedia ta ta edia, bona efa ta ta mamoe mamaruanedia ta ta edia, bona dehoro hini ta ta efa ta ta ida.
25 Hua ihahituna dinana ihagwauta-imana ai, bona aria dinadia hituosi lalodiai, ia ese unu heḡereḡeredia ma baine heni, dika iabi-ohona bouboudia bona ḡole-oho bouboudia bona naoa bouboudia ḡaudia, bona dehoro danu.