1 Taunimanima natuna e, dare ganona ta bavabia, kwaramu inauna ḡauna ai ba halaoa, kwaramu ba naua bona aukimu huina bavabia; bena metau ihahetohona ḡauna bavabia, hui ba karoa, karoa toi. 2 Bena karoa toiosi amo karoa ta na lahi ai ba gabua, hanua bogaraginai, hanua idai-ahuna baine ore negana ai; ma karoa ta bavabia, dare amo ba tara utu-utu, hanua heḡeḡemadai ai; ma karoa ta na lai ai ba giḡia oda-oda; bena unu muridiai lau ese dare na pauana lalona amo baina veria lasi. 3 Bona unu amo danu hui haida bavabi, emu dabua gevena ai ba turidia. 4 Ma unu haida danu bavabi, lahi ai ba tahodia kau, ba gabudia; bena unu amo lahi ta baine lasi Israel besena idoinai enai.

5 Ḡaubada Iehova na ini e gwau tomamu: Ierusalem binai, bese idau-idau bogaragidiai vada na atoa, tano idau-idau ese e ḡeḡea daemu. 6 A ia ese bese idau-idau vada e hereadia egu hahedua herevadia iutudia ai, bona heḡeḡemadai tanodia vada e hereadia egu taravatu itata-utudia ai; egu hahedua herevadia vada e dadaraidia, bona egu taravatu daladia ai asie raka. 7 Taunabunai Ḡaubada Iehova na ini e gwau tomamu: Badina be umui ese e gegemui ahumu besedia na o hereadiamu, heloḡo ahuahu ai, bona egu taravatu daladia ai asio raka bona egu hahedua herevadia asio badinadia, a e gegemui ahumu besedia edia hahedua herevadia, vada o badinadia; 8 una dainai (Ḡaubada Iehova na ini e gwau tomamu) a itaia, lau ese na inai henimuimu, bona hahemaoro karadia baina kara umui bogaragimui ai, bese idau-idau vairadiai. 9 Bona emui kara dika-rohorohodia iboudiai daidiai lau ese nega gunana ta ai asina karaia bona nega gabena ta ai basina karaia lou karana ta baina kara henimui. 10 Taunabunai, umui bogaragimui ai tama ese natudia bae anidia, bona memero ese tamadia bae anidia; bona lau ese baina hahemaoro henimui, bona hahidaosi ba roho mauri na lai kahadia iboudiai baina gigimui rohoroho. 11 Ḡaubada Iehova na e tomu, Taunabunai na maurimu heḡereḡerena, umui ese egu gabu helaḡana na emui ḡau dika-hereadia bona emui kara dikarohorohodia amo vada o hamiroa dainai, momokani lau ese baina negemui daure; basina hageremui bona basina bogamui hisi. 12 Emui orea lalona amo kaha ta be dai-hanai gorerena amo bae mase bona doe amo bae ore bogaragimui ai; ma kaha ta na dare amo bae mase emui orea hegegemadai ai; ma kaha ihatoina na lau ese lai kahadia iboudiai baina ḡiḡidia rohoroho; bona idia muridiai dare na pauana amo baina veria lasi.

13 Unu amo egu badu baine ore; egu badu ḡaraḡarana amo baina kara henidia ela bona lalogu baine keru. Bena idia na bae diba lau Iehova na egu vageḡe ai vada na hereva, egu badu garagarana na latadiai baina ha-orea negana ai. 14 Ina danu: lau ese baina hadoemui, bona hesivarai ḡauna ai baina halaomui, e ḡeḡemui ahumu besedia bogaragidiai bona raka-hanai taudia iboudiai vairadiai. 15 Umui na hesivarai bona heḡonaḡonalai bona sisiba bona hahegari ḡauna ai baola, e ḡeḡemui ahumu besedia ediai, lau ese baina hahemaoro henimui mai badugu bona mai lalo-siahugu bona mai hedadaba aukadia ida negana ai. Lau Iehova vada na hereva. 16 Una negana ai egu doe dibadia amo baina tarakimui mamase, hahebua-tari dibadia, umui ihabua-tarimui totona baina kinodia; doe na baina habadaia loulou emui ai, emui mauri anianina na baina abia oho. 17 Lau ese doe bona uda boromadia baina siaidia vasi, umui ihadikamui totona; idia ese natumui na emui amo bae dadidia oho; dai-hanai gorerena bona rara ese bae daemui, bena dare na latamui ai baina siaia. Lau Iehova vada na hereva.