6
1 Bena King Darauese e hahedua; bena Babulono tanona ai e hetahu, basileia pepadia e habou rumadia lalodiai.
2 Bena Ekebatana, Media basileiana ena hanua badana, Ialonai pepa ta e davaria; una pepa ai e tore herevadia bini:
Sivarai ta.
3 King Kurese ena lohia laḡanina gini-gunana lalonai, King Kurese ese hahedua herevana ta e gwauraia, eto, Dirava ena dubu Ierusalem ai herevana binai: dubu na bae haginia lou, boubou ḡaudia e hahelaḡadiamu bona ḡole-oho boubou gaudia e laohaidiamu gabuna; harana latana na kiubit tauratoi-ahui bona lababana danu kiubit tauratoi-ahui, unu bae haginia toma.
4 Nadi ere toi bona au ere ta bae kara. Davana na pavapava ena moni amo ba heni.
5 Ina danu, Dirava ena dubu ena gold bona silver ḡaudia Nebukadnesara ese Ierusalem dubuna lalona amo e abi bona Babulono e mailai ḡaudia, na bae heni lou, Ierusalem dubuna bae laohai, bena ta ta ena gabu ena gabu ai ma bae ato lou. Dirava ena dubu lalonai bavatodia.
6 Taunabunai, Tatenai, Sinavai Badana enekahana basileiana lohiana, bona Setara-bosenai, mai bamomui Sinavai Badana enekahana ai e nohomu lohiadia ida, umui na dauhai a noho.
7 Hari Dirava ena dubu ḡaukarana aine hekara; Iuda lohiadia bona tau-badadia ese hari Dirava ena dubu na gabuna korikorina ai bae haginia.
8 Ina danu na haganimuimu, ene Iuda tau-badadia na ini ba durudia toma, hari Dirava ena dubu ihagini-louna ai: davana idoinai na ene tatau ba henidia ḡuḡuru haraḡa, pavapava ena moni, hari Sinavai Badana enekahana basileiana ena heaiva ḡauna, amo.
9 Bona dahaka ai e dabumu, boromakau natudia mamaruanedia eiava mamoe mamaruanedia eiava hahinedia, ḡole-oho boubou ḡaudia guba Diravana iboulaina; bona uit bona damena bona vine ranuna bona dehoro, hahelaḡa taudia Ierusalem ai edia dabu heḡereḡeredia, na dina ta ta amo ba henidia, basio reaia;
10 bena idia ese boubou ḡaudia namodia na bae hahelaḡadia guba Diravana ena, bona bae guriḡuri, hanua pavapavana mai natuna ida edia mauri daidiai.
11 Lau na haheduamu danu, tau ta ese ina haheḡani bema ha-idaua, bena au ta iena ruma amo bae raḡaia, bona una tau na una au ai bae gwadaia uru, bena ena ruma na boromakau taḡena ihabouna gabuna ai bae halaoa.
12 Ina hereva baine ha-idaua, eiava hari Dirava ena dubu Ierusalem ai baine ḡigia dobi, pavapavana eiava besena na una gabu ai ladana vada e hanohoa Diravana ese baine hadarerea. Lau Darauese na haheduamu; ba karaia balaheni.
13 Bena King Darauese ese e siaia herevana heḡereḡerena, Tatenai, Sinavai Badana unukahana basileiana lohiana, bona Setara-bosenai, mai bamodia ida, ese King Darauese ena hahedua ḡaudia na e karadia balaheni.
14 Bena Iuda tau-badadia ese dubu e haginia, bona edia ḡaukara anina e tubu, peroveta tauna Hagai bona Sekaria Ido edia haroro herevadia daidiai. Dubu ihaginina e haḡugurua, Israel Diravana ena haheḡani bona Kurese bona Darauese bona Aratasasta, Parasa pavapavadia, edia hahedua daidiai.
15 King Darauese ena lohia laḡanina ihatauratoina ai, hua ladana Adara ena dina ihatoina ai, una dubu e haḡuḡurua.
16 Bena Israel taudia, hahelaḡa taudia bona Levi taudia bona noho-hedoa amo vada e lou taudia oredia, ese hari Dirava ena dubu ihahelaḡana karadia e kara, mai moaledia ida.
17 Idia ese boromakau mamaruanedia sinahu-ta bona mamoe mamaruanedia sinahu-rua bona mamoe natudia sinahu-hani na boubou ḡaudia ai e halaodia, hari Dirava ena dubu ihahelagana totona; bona nani mamaruanedia gwauta-rua e hahelaḡadia Israel idoinai ena kara dika boubouna ḡaudia, Israel ena iduhu gwauta-ruaosi ihaheḡereḡeredia.
18 Bena hahelaḡa taudia e hididia, edia orea ta ta ai, bona Levi taudia danu unu e karadia toma, Ierusalem ai, Dirava isiaina ilaohenina totona, Mose ena buka ai e hetore heḡereḡerena.
19 Hua gini-gunana dinana ihagwauta-hanina ai, hari noho-hedoa amo e lou taudia ese lagau-hanai ariana e karaia.
20 Badina be hahelaḡa taudia bona Levi taudia na sibodia vada e hahegoeva hebou; idia iboudiai na goḡoeva-ḡoḡoeva. Taunabunai idia ese lagau-hanai mamoedia e ala mase, noho-hedoa amo e lou taudia iboudiai edia, bona bamodia hahelaḡa taudia edia, bona idia sibodia edia.
21 Israel taudia noho-hedoa amo vada e lou ese e ani, bona idia ida e hebou bona una tano taudia edia kara mirodia vada e rakatani, Iehova, Israel Diravana, bae toma henia diho totona, taudia iboudiai danu.
22 Dina hitu lalodiai idia ese se hatubua flaoana ariana e karaia, mai moaledia ida, badina be Iehova ese vada e hamoaledia, bona Asuria pavapavana lalona vada e haloua idia ediai, taunabunai ia ese Dirava, Israel Diravana, ena dubu iḡaukaralaina ai e durudia.