11
Babel
1 Tanobada idoinai taunimanima iboudiai gadodia be tamona, eredia danu heḡereḡere.
2 Nega ta, mairiveina kahana amo e laolaova ai, idia ese taora ta e davaria, Sinara kahana ai, bena unuseni ai e nohova.
3 Bena idia na e hereva heheni, eto, Mani raro nadidia aita kara, aita tunu namonamo. Bena idia ese e tunu rarodia e abi, nadi ai e halao, bona rarokaka ta e abia, hekamo ḡauna ai e halaoa.
4 Bena idia ma eto, Mani hanua ta aita hadaia, bona kohoro ta danu, kohoro dorina na guba ai baine kau; unu amo harida baita hadaea, tanobada kopina ai biata loa eva-eva na garina.
5 Bena Iehova e diho, hanua bona kohoro Adam besena ese e latebaia baine itaia eto.
6 Iehova eto, Idia na bese tamona, iboudiai danu edia gado tamona; ina na idia ese eme karaia matama, gabeai ḡau ta ikarana ma bae ura, daika ese baine laodia ahu?
7 Aina diho, edia gado baina ha-idaua, bena edia hereva na basie hediba heheni.
8 Taunabunai, Iehova ese e hakarohodia rohoroho, tanobada kahadia idoidiai; edia hanua ilarebana danu e hadokoa.
9 Taunabunai, una gabu ladana e hatoa Babel; badina be unuseni ai Iehova ese taunimanima edia gado e ha-idaua, bona unu amo ia ese e hakarohodia rohoroho, tanobada kahadia idoidiai.
Abram senena
10 Sem garana bini. Sem ena mauri laḡanidia na sinahu ta negana ai, ia ese Afasad e havaraia, utu-utu badana laḡani rua vada e kororo murinai.
11 Afasad e vara murinai, Sem na laḡani sinahu-ima e mauri nohova, natuna mamaruanedia bona hahinedia e havaradia.
12 Afasad ena mauri laḡanidia na toi-ahui ima negana ai, ia ese Sela e havaraia.
13 Sela e vara murinai, Afasad na laḡani sinahu-hani dikoana toi e mauri nohova, natuna mamaruanedia bona hahinedia e havaradia.
14 Sela ena mauri laḡanidia na toi-ahui negana ai, ia ese Ebere e havaraia.
15 Ebere e vara murinai Sela na laḡani sinahu-hani dikoana toi e mauri nohova, natuna mamaruanedia bona hahinedia e havaradia.
16 Ebere ena mauri laḡanidia na toi-ahui hani negana ai, ia ese Peleg e havaraia.
17 Peleg e vara murinai, Ebere na laḡani sinahu-hani toi-ahui e mauri nohova, natuna mamaruanedia bona hahinedia e havaradia.
18 Peleg ena mauri laḡanidia na toi-ahui negana ai, ia ese Reu e havaraia.
19 Reu e vara murinai, Peleg na laḡani sinahu-rua dikoana taurahani-ta e mauri nohova, natuna mamaruanedia bona hahinedia e havaradia.
20 Reu ena mauri laḡanidia na toi-ahui rua negana ai, ia ese Serug e havaraia.
21 Serug e vara murinai, Reu na laḡani sinahu-rua e mauri nohova, natuna mamaruanedia bona hahinedia e havaradia.
22 Serug ena mauri laḡanidia na toi-ahui negana ai, ia ese Nahoro e havaraia.
23 Nahoro e vara murinai, Serug na laḡani sinahu-rua e mauri nohova, natuna mamaruanedia bona hahinedia e havaradia.
24 Nahoro ena mauri laḡanidia na ruahui taurahani-ta negana ai ia ese Tera e havaraia.
25 Tera e vara murinai, Nahoro na laḡani sinahu-ta gwauta taurahani-ta e mauri nohova, natuna mamaruanedia bona hahinedia e havaradia.
26 Tera ena mauri laḡanidia na hitu-hitu negana ai, ia ese Abram bona Nahoro bona Haran e havaradia.
27 Tera garana bini: Tera ese Abram bona Nahoro bona Haran e havaradia. Haran ese Lot e havaraia.
28 Tamana Tera do se mase negana ai, Haran e mase guna, e vara gabuna ai, Uru, Kaldea taudia edia hanua ta, unuseni ai eha mase.
29 Abram e headava; Nahoro danu e headava. Abram adavana ladana na Sarai. Nahoro adavana ladana na Milka, Haran natuna. Una Haran natuna na Milka bona Iska.
30 Sarai na e gabani.
31 Tera ese natuna Abram bona tubuna Lot, Haran natuna, bona ravana Sarai, Abram adavana, e abidia, Kaldea taudia edia hanua, Uru, amo e hakaudia lasi, Kanaan tanona baela eto. Bena gabu ta ai e kau, ladana Haran, unuseni ai e noho.
32 Tera ena mauri laḡanidia iboudiai na sinahurua dikoana ima Tera na Haran ai e mase.