10
1 Hahedua herevadia dikadia e gwauraimu taudia madi ihabaidia;
itorena taudia hahehisi herevadia e tore louloumu, madi ihabaidia!
2 E dabumu taudia edia amo hahemaoro ḡoevaḡoeva e lao ahumu,
bona ogoḡami taudia egu bese lalonai ahudia korikori e dadimu;
edia dadidadi ḡaudia na vabu,
bona damudia na ihareha.
3 Dika davana iabina dinana ai dahaka ba karaia?
Lai gubana dauha amo bainema negana ai dahaka ba karaia?
Daika ba heau henia baine kahamu totona?
Emu taḡa be edeseni ai ba rakatania?
4 Dala ta lasi, to e abidia mauri taudia bogaragidiai ba raki,
eiava e aladia mase taudia bogaragidiai ba moru.
Ina idoinai vada e vara, to ena badu do se keru,
ia imana na doini e hetoi roromu.
Asuria na Iehova ena gahi
5 A! Asuria na egu badu auna,
egu badu-ḡaraḡara gahina.
6 Dirava se matauraiamu besena ihadikana totona na siaia laomu;
na haganiamu, na badu henidiamu taudia na baine hadikadia.
Baine dadidadi, kohu momo baine dadi;
baine moimoilaidia, ariara kopukopuna na heto.
7 A unu se laloa tomamu,
ena lalo-hadai na dia unuheto;
a ena ura be hahebua-tari,
bese diaḡau baine butudia tao.
8 Badina be ia na e tomu:
Egu tuari lohiadia iboudiai na dia papavapava a?
9 Kalano na Karakemisi ida vada e heḡereḡere,
bona Hamat na Arapada ida vada e heḡereḡere,
bona Samaria na Damasko ida vada e heḡereḡere, ani?
10 Imagu ese kaivakuku ibadinadia basileiadia vada e toi roro henidia,
edia dirava laulaudia, e koro ḡaudia, na Ierusalem bona Samaria edia e hereadiava gabudia;
11 matona, Samaria bona ena dirava laulaudia vada na kara henidia heḡereḡerena ai,
Ierusalem mai ena kaivakuku ida basina kara henidia a?
12 Ḡaubada ese ena ḡaukara idoinai Siona Ororona bona Ierusalem latadiai baine ha-orea murinai, ia ese Asuria pavapavana ena hekokoroku herevadiabona ena heaḡi bada-herea daidiai baine hadikaia.
13 Badina be una taue tomamu:
Lau imagu goadana amo vada na karaia, bona egu aonega amo danu;
badina be lau na lalo-parara taugu.
Bese idau-idau edia tano hetoadia vada na abidia oho,
bona edia kohu namodia vada na dadi;
bona terono ai e helaiva taudia vada na doridia dobi,
boromakau maruanena ese bema doadia dobi heḡereḡerena.
14 Imagu ese bese idau-idau edia taḡa vada e davaridia,
tau ta ese manu rumana bema davaria na heto;
bona manu hahinena ese vada e rakatanidia gatoidia na taunimanima ese e haboudiamu heḡereḡerena ai,
lau ese tanobada idoinai tagadia vada na haboudia;
ta ese hanina se hamarereamu,
eiava uduna se haḡaiamu, eiava se taimu.
15 Ira na sibona baine heaḡi, e utu-utulaiamu tauna baine dadaraia a?
Eiava iri na sibona baine heimodai, e iri-irilaiamu tauna baine dadaraia a?
Una na au ese e abia isimu tauna bema kwadi-kwadilaia,
eiava gahi, au ḡauna, ese tau, dia au ḡauna, bema abia isi na heto.
16 Taunabunai Ḡaubada, Iehova Sabaota, ese taudia ihavaroda-varodadia gorerena na
ena tuari taudia goada-hereadia bogaragidiai baine siaia;
ia hairaina henunai hururu ta baine vara,
lahi hururuna na heto.
17 Israel Diarina na lahi ai bainela;
ena Helaḡa Diravana na lahi hururu-hururuna ai bainela;
ena au ḡiniḡini bona ena ava ḡiniḡini baine aradia,
dina tamona ai baine aradia ore.
18 Ena uda bona ena tano namona hairaidia na
Iehova ese baine habuadia tari, lauma ai bona tau-anina ai;
gorere tauna e varoda-varodamu heḡereḡerena ai bainela.
19 Ena uda audia oredia bae gadoi vaitani dainai,
mero maraḡina ta ese baine hagaudia diba.
20 Una dina ai Israel kwabukwabudia bona Iakob iduhuna ena roho-mauri taudia ese idia e rahudia mase tauna enai basie tao lou, a Iehova, Israel ena Helaḡa Diravana, enai bae tao mai momokanidia ida.
21 A kwabukwabudia na bae lou mai, Iakob iduhuna kwabukwabudia, Siahu Diravana bae lou henia.
22 Badina, ena be emu bese Israel na kone mirina na heto, to kwabukwabudia mo bae lou mai. Kara maoromaoro na e hepurai dobimu, una dainai hahebua-tari na vada e hahedualaia.
23 Badina be Ḡaubada, Iehova Sabaota, ese baine haḡuḡurua vaitani, hahedua heḡereḡerena, tanobada idoinai bogaraginai.
24 Taunabunai Ḡaubada, Iehova Sabaota, na ini e gwau tomamu: Egu bese taumui e, Siona ai o nohomu taumui e, Asuria taudia ese au amo bae rahumui mase bona edia gahi na ihadikamui totona bae abidia isi, Aigupto taudia e karaia heḡereḡerena, negana ai idia garidia basio gari.
25 Badina be asi vanahana egu lalo-siahu baine ore, bona egu badu eseidia ihabua-taridia baine matamaia.
26 Bena Iehova Sabaota ese ikwadiva varona amo baine hadikadia, Midian na Oreb nadi-ginina badibadinai e rahua mase negana heḡereḡerena ai; bona ena itotohi na davara daenai baine he toi roro, bona baine abia isi, Aigupto ai e karaia heḡereḡerena.
27 Una dina ai ena maduna metauna na pagamui amo baine heabi oho, bona ena maduna auna na aiomui amo baine kwaidu oho.
Ia na Rimon amo vada e dae lao,
28 Aiata ai vada e kau;
Migron vada e rakaia hanai, Mikmasa ai ena kohu e habouamu;
29 Ororo makana amo vada e hanai,
Geba ai e taruha rani;
Rama na e heude-heudemu,
Gibea, Saulo ena hanua, vada e heau.
30 Galimi hahinemu e, a tai badabada!
Laisa e, a kamonai!
Anatoto e, a haere henia!
31 Madamena na e heaumu;
Gebimi inoholaina taudia na e heau maurimu.
32 Hari ina dina ai, ia na Nob ai baine gini,
imana baine kahua kuboro-kuboro,
Siona kekenina ena ororo baine kahu kuboro henia,
Ierusalem ororona bunai.
33 A itaia, Ḡaubada, Iehova Sabaota, ese
au rigidia baine utu oho, mai siahu herea-daena ida;
atai ḡaudia na baine utudia gari,
atai-herea ḡaudia na henu ai bae heato diho.
34 Ia ese uda audia hedoma-hedomadia na ira amo baine utudia,
bona Lebanon mai ena au hereadia ida bae moru.