28
Efraim isisiba-henina
1 Efraim ena kekero taudia kwaradia ihavavalaidia ḡaudia na hekokoroku; madi, ihabaidia!
Vine ranuna e inu kekeromu taudia edia koura namona kwarakauna, ihahairaina ḡauna na e maraimu heraherana, madi, ihabaina!
2 A itaia, Ḡaubada enai ta na mai siahuna bona mai goadana;
medu-hetarina na heto, lai-gubana mai hahebua-tari na heto,
sinavai abatana e aru goadagoadamu na heto;
ia ese tano ai baine negea dobi mai daḡedaḡena ida.
3 Efraim ena kekero taudia kwaradia ihavavalaidia heaḡina na
aedia henudiai bae moia tao;
4 Bona ia hairaina heraherana, koura namona kwarakauna ai e maraimu ḡauna,
na suke huahuana ta, huahua negana do se kau ai e mage gunamu
ḡauna, na heto;
ta ta ese e itaiamu,
bena imana ai e abiamu negana ai e ania haraḡamu.
5 Una dina ai, Iehova Sabaota na kwara-havava ḡauna mai hairaina ai bainela,
bona herahera ḡauna herea-daena danu, ena bese taudia kwabukwabudia edia;
6 hahemaoro ḡoevaḡoeva laumana ai bainela, hahemaoro tauna enai,
bona goada ai bainela, tuari na hanua ikoukouna amo e halouamu taudia ediai.
Ierusalem isisiba-henina
7 Ini danu vine ranuna dainai e laigo-laigomu,
kekero ḡauna dainai e raragamu:
hahelaḡa tauna bona peroveta tauna na kekero ḡauna dainai e laigolaigomu;
vine ranuna dainai lalodia e heḡonumu,
kekero ḡauna dainai e raragamu;
matadia e madai-madaimu,
hahemaoro ikarana ai e gwau rea gwau reamu.
8 Badina be pata iboudiai na mumuta ai e honumu,
bona asi mirona gabuna ta dia mia.
9 Ia ese aonega na daika baine hadibalaia?
Ia ese gwaukau herevana anina na daika baine hamaorolaia?
Rata vada e dadaraia memerodia a?
Sinadia kemedia amo vada e abidia oho memerodia a?
10 Badina be taidia taidia amo bae hadibadia;
sidia sidia taidia taidia amo,
iniseni ai taina, unuseni ai taina.
11 Lasi, idau mala taudia edia amo,
bona idau gado taudia edia amo,
Iehova ese ina bese baine hereva henia.
12 Ia ese vada e hamaorodia, eto
“Ina na laḡa-ani,
tau-boera taudia na laḡadia ba ha-ani;
ina na doru-heu”.
Ḡau tamona, idia na asie ura bae kamonai.
13 Taunabunai, Iehova ena hereva idia ediai na
taidia taidia amo;
sidia sidia taidia taidia amo,
iniseni ai taina, unuseni ai taina.
Idia na baela, bae hekidaera;
bae hehuari, bae he-idoa, bena bae abidia.
14 Taunabunai, umui heḡonaḡonalai taumui,
Ierusalem ai ina bese o lohiaiamu taumui,
Iehova ena hereva ba kamonai.
15 Badina be umui oto: Ai na mase ida vada a gwauhamata heheni,
bona Mase Gabuna ida vada a herohemaino;
una dainai hahedika na abata na heto baine utu utu dae neganai,
to ia na ai emai ai basine kau;
badina be koikoi na emai roho-mauri gabuna ai vada a halaoa,
bona koikoi herevadia ai vada a hemetaimu.
16 Taunabunai, Ḡaubada Iehova na ini e gwau tomamu:
A itaia, Siona ai badi ta na atoamu;
nadi ta, e tohoa nadina,
daiguni nadina ḡoeva-daena, badi nadina momokanina.
Baine abia dae tauna basine haraḡa-haraḡa.
17 Hahemaoro ḡoevaḡoeva na hahetoho varona ai baina halaoa,
bona kara maoromaoro na gini-maoro varona ai baina halaoa;
bena koikoi ai o roho maurimu gabuna na medu-hetari ese baineha-arua oho,
bona abata ese hemetai gabuna baine utua dae.
18 Bena emui gwauhamata, mase ida, baine heḡiḡi rohoroho;
bona emui herohemaino, Mase Gabuna ida, basine gini;
bena hahedika na abata na heto baine utu utu dae negana ai,
ia ese baine habubunimui.
19 Baine utu utu dae negadia iboudiai na baine abimui;
badina be daba ta ta amo baine utu utu dae,
dina ai bona hanuaboi ai danu,
bena gwaukau herevana anina idavarina na mai gari-badana.
20 Badina be mahuta ḡauna na kwadogi,
hekure tauna basine hetoi roro;
bona hetaru na iora,
hetaru tauna basine hetaru namonamo.
21 Badina be Iehova baine tore-isi, Perasimi ororona ai heḡereḡerena;
bona baine badu, Gibeon kourana ai heḡereḡerena;
ena kara ikarana totona (ena kara na idau),
ena ḡaukara ikarana totona (ena ḡaukara na idau).
22 Taunabunai, basio ḡonaḡona,
iḡuimui baine ha-aukadia na g=arina;
badina be hahebua-tari e hahedualaia herevana vada na kamonai.
Ḡaubada, Iehova Sabaota, ena amo, tano idoinai latanai.
23 Taiamui a hakiraradia, gadogu a kamonai;
a hakala, egu hereva a kamonai.
24 Hadohado totona tano e ruaiamu tauna ese e ruaia louloumu a?
Ena tano e ruaia louloumu bona e gaua louloumu a?
25 Tano kopina vada e hamanadaia negana ai,
ia ese aniani avadia e hadomu;
bona uit danu ere ta ta ai,
bona bali ena gabu korikori ai,
bona rae uma isedia ai, ani?
26 Badina be vada e hadibaia maoromaoro;
ena Dirava ese e hadibaiamu.
27 Aniani avadia na uit ikwadilaina auna amo asie kwadidiamu,
eiava rerue ava-keikeina na idia latadiai asie keia hanaimu;
a au maraḡina amo e kwadidiamu,
au severa-severana amo e kwadidiamu.
28 Flaoa ikaralaina uitina e ririamu a?
Lasi, se kwadia louloumu.
Ena rerue ava-keikeina na hosi ese ia latanai e veria hanaimu,
a se ririamu.
29 Ina danu Iehova Sabaota ena amo e maimu;
hahealo ai ia na namo herea,
bona aonega ai ia na herea dae.