36
Senakerib ena tuari
1 King Hesekia ena lohia laḡanina ihagwauta-hanina ai, Senakerib, Asuria pavapavana, ese luda hanuadia mai maḡudia iboudiai e tuari henidia bona e abidia.
2 Bena Asuria pavapavana ese Rabsake bona tuari, oreana badana ta Lakisi amo e siaidia lao, King Hesekia dekenai, Ierusalem ai. Ia na atai gohuna dadairana badibadinai e gini, Dabua-huri Tauna Ena Tano lao dalana ai.
3 Bena Eliakim Hilkia, hanua pavapavana ena ruma ireḡuna tauna, bona Sebna, toretore tauna, bona Ioa Asaf, e tore pepadia inaridia tau, tatoiosi na e raka lasi ia dekenai.
4 Bena Rabsake ese e hereva henidia, eto, Hesekia na ba hamaoroa, baoto, Pavapava badana, Asuria pavapavana, na ini e gwau tomamu: Dahaka o halahalahamu dainai so daradaramu?
5 Oi o laloamu hereva kavakavadia na tuari ihaerolaina bona igoadalaina a? Daika enai o helalo kaumu dainai vada o gwau edeede henigu?
6 A itaia, oi na Aigupto enai o helalo kaumu, a ia be siriho kwaiduna tau ta ese hetao-kau ai imana baine gwadaia uru ḡauna na heto. Farao, Aigupto pavapavana, na unuheto, ienai e helalo kaumu taudia iboudiai ediai.
7 A boma hamaorogu “Ai na Iehova, emai Dirava, enai a helalo kaumu”; matona, iena atai gabudia bona ena ihaboulaina patadia na Hesekia ese vada e abi oho, bona Iuda taudia bona Ierusalem taudia vada e hamaorodia, eto “Ina ihaboulaina patana vairanai ba toma diho”, ani?
8 Be, biagugu Asuria pavapavana ida ba gwau hamata. Ia e tomu “Lau ese hosi daha-rua baina henimu, bema oi ese gui taudia na latadiai ba hahelaidia kau diba negana ai”.
9 Aigupto edia kariota bona edia hosi-gui taudia ediai o helalo kaumu negana ai, biagugu ena hesiai taudia bogaragidia amo tuari biaguna maraḡi-maraḡina tamona ma ede ba hadarerea toma?
10 Ina danu, oi o tomamu ina gabu ituari-henina bona ihabua-tarina vada nama lalonai Iehova na dia lau ida a? Lasi, Iehova ese e haḡanigu, eto, Ina tano ba tuari henia bona ba habuaia tari.
11 Bena Eliakim bona Sebna bona Ioa ese Rabsake e hereva henia, eto, Mani emu kara emu hesiai taudia na Aram gadona ai ba hereva henimai, badina be ikamonaina mai dibamai, a Heberu gadona ai basio hereva henimai, maḡu latanai e helaimu taudia bae kamonai na garina.
12 A Rabsake ese e hamaorodia, eto, Biagugu vada e siaigu, ina hereva na umui biagumui bona umui emui ai mo baina gwaurai totona, dia unu maḡu latanai e helaimu taudia, idia na umui ida vada e ahumui vaitani sibomui tagemui bavani bona meimui ba inu taudia, ediai a?
13 Bena Rabsake na e tore isi, Heberu gadona ai e boi lolo, eto, Pavapava badana, Asuria pavapavana, ena hereva a kamonai.
14 Pavapava na ini e gwau tomamu: Hesekia ese basine koimui, badina be ia ese basine harohomui mauri diba.
15 Bona Hesekia ese Iehova enai baine hahelalomui kau, baineto “Momokani Iehova ese baine hamaurida; ina hanua na Asuria pavapavana imana ai basine atoa kau”, na basio abia dae.
16 Hesekia basio kamonai henia; badina be Asuria pavapavana na ini e gwau tomamu: umui na lau ida baita herohe maino; lau dekegu ba raka lasi mai. Bena iboumui ai na ta ta ena vine ena vine ena suke ena suke anidia baine ani, bona ena guri ena guri ranuna baine inu;
17 ela bona lau baina vasi, bena tano ta baina laohaimui, umui emui tano heḡereḡerena, uit bona vine-ranuna tanona, flaoa bona vine imeadia tanona.
18 Nahuamui ba toho, Hesekia ese baine koimui na garina, baineto “Iehova ese baine harohoda mauri”. Bese idau-idau diravadia ta ese nega ta ai ena tano na Asuria pavapavana imana amo vada e hamauria a?
19 Hamat bona Arapada diravadia be edeseni ai? Sefaravaimi diravana be edeseni ai? Samaria na imagu amo vada e hamauria a?
20 Ini tano idau-idau diravadia iboudiai bogaragidiai, daidia ese edia tano na lau imagu amo baine hamauria a? Matona, Iehova ese Ierusalem na lau imagu amo baine hamauria a?
21 A taunimanima na asi reḡereḡedia e nohova, hereva ta asie haere henia; badina be hanua pavapavana ese vada e haḡanidia, eto, Basio haere henia.
22 Bena Eliakim Hilkia, hanua pavapavana ena ruma ireḡuna tauna bona Sebna, toretore tauna, bona Ioa Asaf, e tore pepadia inaridia tau, na edia dabua e dare, bena Hesekia dekenai e raka vareai, Rabsake ena hereva e hamaorolaia.