51
Tauhalo herevadia Siona ena
1 Umui haheroho-mauri o ḡavaiamu taumui,
Iehova o tahuamu taumui,
a hakala henigu!
Enai e utumui nadina ba itaia,
bona enai e ḡeimui gurina danu.
2 Tamamui Abraham ba laloa,
bona e havaramui hahinena Sara danu;
badina be ia na asi besena negana ai na boiria,
bena na hanamoa, besena na hahutumaia.
3 Badina be Iehova ese Siona baine hamarumarua,
ena gabu ḡaḡaedia iboudiai baine hamarumarudia,
ena tano ḡaḡaena na Eden heḡereḡerena ai baine halaoa,
ena tano kaukauna na Iehova ena uma heḡereḡerena ai baine halaoa;
moale bona lalo-namo na ia lalonai bae davaridia,
bona hahenamo bona ane gadodia danu.
4 Egu bese taumui e, a kamonai henigu!
Egu basileia taumui e, a hakala henigu!
Badina be taravatu ta na lauegu amo baine lasi,
bona egu hahemaoro ḡoevaḡoeva na bese idau-idau edia diari ai bainela.
5 Egu haheroho-mauri na e kahi mai haraḡamu,
egu hahemauri na vada e raka lasi,
bona lau imagu amo bese idau-idau baina lohiadia.
Kone tanodia na e narigumu,
bona imagu dainai e helaromu.
6 Ba gaga dae, guba ba itaia;
ba igo diho, tanobada ba itaia;
badina be guba baine puki, kwalahu na heto,
bona tanobada baine mouka-mouka, dabua na heto,
bona inoholaina taudia na bae mase, namo na heheto;
a egu hahemauri baine hesiriu hanaihanai,
bona egu haheroho-mauri na basine doko ela bona hanaihanai.
7 Kara maoromaoro mai dibamui taumui,
egu taravatu na lalomui ai e miamu taumui,
a kamonai henigu!
Taunimanima edia gwaugwau garina basio gari,
bona edia heihi-ihirai herevadia daidiai kudoumui basie hetaha.
8 Badina be pitopito ese bae anidia ore, dabua na heto,
bona gaigai-gaigai ese bae anidia, mamoe huina na heto;
a lauegu haheroho-mauri na baine hesiriu hanaihanai,
bona egu hahemauri ela bona uru iboudiai.
9 Iehova imana e,
a helada isi, a helada isi, goada ba rioa!
A helada isi, nega gunadia ai heḡereḡerena,
sene taudia edia uru ai heḡereḡerena.
Oi ese Rahaba o utua sisi-sisi ani?
Oi ese gadobada gaigaina badana o gwadaia ani?
10 Oi ese davara o hakororoa
bona dobu gabudia ranudia danu ani?
Oi ese davara ena dobu gabudia na
vada o hamauridia taudia edia raka-hanai dalana ai o halaoa ani?
11 Iehova ese vada e davalaidia taudia na bae lou mai,
Siona baema mai anedia ida;
moale hanaihanai na tubuadia ai baine mia,
moale bona lalo-namo bae abi,
lalo-hisihisi bona ḡanaḡana bae boio.
12 Lau binai taumui ihalodia tauna.
Oi na daika, taunimanima, e masemu ḡauna, o gari heniamu?
Oi na daika, taunimanima natuna, e hekaramu rei na heto ḡauna, o gari heniamu?
13 Oi na daika, Iehova, oi ikaramu Diravana, vada o laloa boio?
Ia ese guba e idia roro, bona tanobada badidia e atodia.
Oi na daika, dina idoinai o gari louloumu,
hahehisi tauna ese ena badu dainai e hahebua tari matamamu negana ai?
Hahehisi tauna ena badu garag-ara na edeseni ai?
14 Ena maduna ese e ha-igoamu tauna bae ruhaia nege haraḡa;
ia na basine mase, guri ai basine diho,
bona ana aniani basine ore.
15 Badina be lau na Iehova, emu Dirava;
lau ese davara na haraivaraivamu,
bena hurehuredia e gurumu.
(Ia ladana na Iehova Sabaota).
16 Egu hereva na oi udumu ai vada na atodia,
bona imagu ikerukeruna ai vada na hunimu;
guba vada na idia roro,
bona tanobada badidia vada na atodia,
bona Siona vada na hamaoroa, nato
“Oi na egu bese”.
17 Ierusalem e, a helada isi,
a helada isi, a tore isi!
Iehova imana amo
ena badu keherena vada o inua;
raraga keherena nurina na
vada o inu ore.
18 Ia natuna, vada e havaradia memerodia, iboudiai bogaragidiai
ta ese ia basine hakaua;
ia natuna, vada e ubudia memerodia, iboudiai bogaragidiai
ta ese ia imana ai basine abia.
19 Ini ḡau rua na emu ai vada e vara:
daika ese taumu baine haloa?
Gaudia be hahevahu bona hahebua-tari, doe bona dare:
daika ese taumu baine haloa?
20 Oi natumu mamaruanedia vada e mase rea,
ariara ta ta iduaradia ai e hekuremu,
uda diana huo lalonai na heto;
Iehova ena badu ediai e honu honu daemu,
emu Dirava ena gwaugwau ediai e honu honu daemu.
21 Taunabunai, vada e hahisihisimui taumui e,
vada o kekero (a dia vine ranuna amo) taumui e,
ina na ba kamonai!
22 Emui Ḡaubada Iehova, emui Dirava,
ena bese ena gini-kau herevana e gwauraiamu Diravana,
ini e gwau tomamu:
A itaia, lau ese raraga keherena na
oi imamu amo vada na abia oho.
egu badu keherena na basio inua lou;
23 bena e hahisihisimuimu taudia imadia ai baina atoa.
Idia ese vada e hamaoromui, eto
“Ba goru diho, bena latamui amo baia raka hanai”;
bena umui ese dorumui na tano heḡereḡerena ai o halaoa,
bona ariara heḡereḡerena ai danu,
idia ese bae rakamui hanai totona.