53
1 Vada ta kamonai herevana na daika ese vada e abia dae?
Iehova imana na daika enai vada e hedinarai?
2 Badina be ia vairanai e vara isi, au matamatana ta na heto,
bona au ramuna ta tano kaukauna ai na heto.
Ia na asi oromana bona asi hairaina, bena baitama raraia;
bona asi raho-namona, bena baitama ura henia.
3 Taunimanima ese e dadaraia bona e rakatania,
lalo-hisihisi tauna, hisi-ani na mai dibana;
bena taunimanima ese vairadia na ena amo e huniamu tauna ta na heto e dadaraia,
bona asita lalo namo henia.
4 Momokani, ia ese eda hisi-ani vada e huahaida,
bona eda lalo-hisihisi danu;
ḡau tamona, ta helalolaia ia na vada e alaia tauna,
Dirava ese vada e rahua mase bona vada e hahisihisia tauna.
5 Ita eda kerere daidiai e haberoa,
bona ita eda kara havara daidiai e hahisihisia;
ia e dadabaia dainai ita ese maino tame abia,
bona ia berona daidiai ita ta maurimu.
6 Ita iboudai vada ta raka boio raka boio, mamoe na heheto,
ta ta ena ura dalana ena ura dalana ai vada ta raka oho;
bona Iehova ese ita iboudai eda kara dika na
ia latanai vada e ato kau.
7 E daḡedaḡe henia bona e hahisihisia,
to ia ese uduna se haḡaia;
mamoe natuna na ialana gabuna e hakaua laomu na heto,
eiava mamoe na huina iutuna taudia vairadiai e mumu na heto, ia ese uduna se haḡaia.
8 Daḡedaḡe bona hahemaoro ai e abia oho,
bena ena uru ai daika ese e laloa
ia na mauri taudia edia tano amo vada e negea daure
bona egu orea taudia edia kerere daidiai vada e alaia?
9 Ena be ia ese ala-ala karana ta se karaia,
bona hereva koikoina ta se gwauraia,
to ena mase ai idia ese kara dika taudia ida e guria,
bona taḡa tauna ida danu.
10 Ḡau tamona, Iehova ena ura dainai e haberoa;
ia ese e hagorerea.
Dika iabi-ohona boubouna ai baine hahelao negana ai,
ia ese garana do baine itadia, bona ena mauri dinadia baine hahohodia.
Iehova ena ura anina baine tubu ia imana ai;
11 ena lalo-hekwarahi anina baine itaia,
bena lalona baine heḡereḡere.
Iena aonega dainai kara maoromaoro tauna, egu hesiai tauna, ese
hutuma na kara maoromaoro taudia baine gwauraidia,
bona edia kara havara baine huahaidia.
12 Taunabunai, taunimanima badadia ida ahuna baina hari henidia,
bona goada taudia ida e dadi kohudia bae hari;
badina be ia ese maurina e bubua nege mase enai,
bona kerere taudia ida e duahia hebou;
ḡau tamona, ia ese hutuma edia kara dika e huahaidia,
bona kerere taudia daidiai e noinoi.