1 A Elisaia eto, Iehova ena hereva a kamonaia. Iehova na ini e gwau tomamu: Kerukeru, hari ina hora sisivana, flaoa namo-hereana bosea ta eiava bali bosea rua na Samaria ikoukouna ai bae hoi, davadia na sekele tamona.* 2 Bena tuari biaguna, imana ai hanua pavapavana e hetao kau tauna, ese Dirava ena tau e hamaoroa, eto, Iehova sibona ese gaba-mauru bema kara guba ai, ina kara bema vara diba a? A Elisaia eto, Oi sibomu matamu amo ba itaia, to basio ania.

3 Lepra taudia hahani na hanua ikoukouna ai nonoho, bena e hereva heheni, eto, Iniseni ai ta helaimu ela bona baita mase anina be dahaka? 4 Bema baitato “Hanua lalonai aita raka vareai”, to doe na hanua lalonai, bena unuseni ai baita mase; a iniseni ai baitama helai danu baita mase. Benaini, Suria taudia edia taruha aitala; idia ese bema hamaurida, baita noho; eiava bema alada, baita mase mo. 5 Taunabunai, dina kerekerena ai e tore isi, taruha bae lao henia totona; a Suria taudia edia taruha isena ai e kau negana ai, tau ta asie davaria unuseni ai. 6 Badina be Ḡaubada ese kariota bona hosi bona tuari oreana badana reḡedia e havara Suria taudia taiadia ai; taunabunai idia ese e hereva heheni, eto, A kamonai, Israel pavapavana ese Hiti taudia edia pavapava bona Aigupto pavapavadia vada e vatudia, bae tuari henida totona. 7 Taunabunai, idia na dina kerekerena ai e heau oho, edia kalaga, edia hosi, edia doniki e rakatanidia, taruha lalona ḡaudia miadia ai e laputani, mauridia e tahu. 8 Hari lepra taudia na taruha isena ai e kau, bena kalaga ta ai e raka vareai, e aniani, e inuinu, bena silver bona gold bona dabua e hua lao, e hunidia. Bena e lou lao, ma kalaga ta ai e raka vareai, ḡau haida ma e hua lao, e hunidia.

9 Bena idia na e hereva heheni, eto, Ita na asita kara maoromu. Ina dina na hari namona dinana; bema basita herevalaia, baita noho hedavauhe ela bona daba, na mata-hakanina ese baine lasida tao. Taunabunai aitala, hanua pavapavana ena ruma taudia baita hamaorodia. 10 Taunabunai, idia na hanua ela, hanua ikoukoudia igimadia taudia e boi henidia, e hamaorodia, eto, Suria taudia edia taruha ala, unuseni ai tau ta asia itaia bona ere ta asia kamonai, a hosi bona doniki mo hehemata, bona kalaga mai ḡaudia ida mo mimia. 11 Bena ikoukou igimadia taudia e boi lao, hanua pavapavana ena ruma taudia ediai e hehari piu. 12 Bena hanua pavapavana na hanuaboi ai e tore isi, ena hesiai taudia e hamaorodia, eto, Aina hamaoromui, Suria taudia ese ita ihadikada dalana na ede e hegaeḡaelaia toma. Dibadia ita na e hitolodamu; taunabunai idia na taruha vada e rakalania, tano paka ai e komumu, e tomamu “Hanua amo bae raka lasi negana ai baita abidia mauri, bona hanua lalonai baita didi vareai”. 13 Bena ena hesiai tauna ta eto, Mani emu kara tatau haida a siaidia, doini mimia hosidia ima bae abidia, badina be dibada doini iniseni ai e nohomu taudia na Israel hutuma vada e mase taudia heḡereḡeredia ai baela. Mani aita siaidia, bae itaia. 14 Taunabunai, hosi-gui taudia rarua e abidia; bena hanua pavapavana ese e siaidia, Suria taudia edia tuari oreana murina amo baela. Ia na eto, Aola, a ha itadia. 15 Taunabunai raruosi na idia muridia amo ela, ela bona Ioridane sinavaina; bena e itaia, dala idoinai dabua bona kohu e hepetapetalai, Suria taudia ese heaudia ai e nege ḡaudia. Bena e siaidia taudia na e lou, hanua pavapavana e hamaorolaia.

16 Bena hanua taudia na e raka lasi, Suria taudia edia taruha ela, edia kohu e abi ore. Taunabunai, flaoa namo-hereana bosea ta e hoia, davana na sekele tamona, bona bali bosea rua danu e hoi, davana na sekele tamona, Iehova ena hereva heḡereḡerena. 17 Hanua pavapavana ese tuari biaguna, imana ai e hetao kau tauna, na vada e siaia, ikoukou baine naria; bena hanua taudia ese e moia taotao, ikoukou raka-lasina ai; bena ia na e mase, Dirava ena tau ena hereva, hanua pavapavana ia dekena ela negana ai e gwauraia herevana, heḡereḡerena. 18 Badina be Dirava ena tau ese hanua pavapavana e hamaoroa, eto “Kerukeru, hari ina hora sisivana, bali bosea rua eiava flaoa namo-hereana bosea ta na Samaria ikoukouna ai bae hoi, davadia na sekele tamona” negana ai 19 hari tuari biaguna ese Dirava ena tau e haere henia, eto “Iehova sibona ese gaba-mauru bema kara guba ai, ina kara bema vara diba a?”. Una negana ai Dirava ena tau eto “Oi sibomu matamu amo ba itaia, to basio ania”. 20 Benaini, unu e vara toma ienai, badina be hanua taudia ese ikoukou raka-lasina ai e moia taotao, bena e