3
Ioane Bapatiso
1 Unu dinadia ai Ioane Bapatiso e hedinaraiva, Iudea tano ḡaḡaena ai e harorova; eto,
2 A helalo kerehai, badina be guba basileiana vada eme kahira-kahira.
3 Badina be ia na peroveta tauna Isaia ese e herevalaia guna, eto,
Gado ta tano ḡaḡaena ai e boi lolomu, e tomu,
Lohiabada ena dala ba lailaia,
Ena laolao dalana ba hamaoromaoroa.
4 Ioane ena dabua na kamelo huina, ena gaba ḡauna be boromakau kopina, ana aniani na kwadi bona bada ranuna.
5 Ierusalem bona Iudea taudia iboudiai, bona Ioridane kourana hanuadia idoidiai, ia dekena ela,
6 edia dika e gwaurai hedinaraiva. Bena ia ese Ioridane sinavaina ai e bapalisodiava.
7 A Farisea taudia bona Sadukea taudia diaḡau bapatiso totona ela e itadia, bena e gwau henidia, eto, Gaigai natudia e, daika ese e hamaoromui do baine vara baduna na ba heautania?
8 Helalo-kerehai anina ba hahedinaraia.
9 Bona lalomui ai basioto “Ai tamamai na Abraham,” badina be na hamaoromuimu, Dirava na mai siahuna ini nadi amo natuna bema havaradia Abraham ena.
10 Harihari ira na au badidiai e atoamu; taunabunai huahua namodia asie dobimu audia iboudiai na be utumu, lahi ai be taho kaumu.
11 Lau be ranu amo na bapatisomuimu, helalo-kerehai toana. A lau murigu ai be maimu tauna na ena siahu ese lauegu e hereaiamu; lau na dia namo ena tamaka baina abia loaloa. Ia ese Lauma Helaḡa bona lahi amo baine bapatisomui.
12 Ena itapo na imana ai; ena uit ikwadina gabuna baine tapoa ḡoevaḡoeva, ena uit na roge ai baine haboua, a momona be se bodomu lahina ai baine dou vaitani.
Iesu e bapatisoa
13 Una negana ai Iesu na Galilea amo Ioane dekena ela, Ioane ese baine bapatisoa dainai.
14 A Ioane ese e gwaua tao, eto, Lau dekegu oma a? Oi ese lau boma bapatisogu hari namo.
15 A Iesu ese e haere henia, eto, Mani boma karaia; badina be kara maoromaoro iboudiai baita haguḡuru hari namo. Bena ia ese Iesu ena ura e karaia.
16 Iesu e bapatisoa; bena ranu amo e dae kau negana ai na guba e parara, bena ia ese Dirava ena Lauma e itaia, pune na heto e diho, ia tubuana ai e kau.
17 Bona gado ta guba amo e boi dobi, eto, Lau Natugu binai, egu lalokau; lau ese ia na lalo namo heniamu.