13
Mawulla gəl à vəɗah la huma aŋa azlaməna makor kutso
1 Kə̀sàw gay aŋa azlaməna makor kutso, kà uwana azlauwana la ndzəɗa gesina kà Zəzagəla la uwana avà à atà, ŋgaha masla la uwana aɓə̀k atà à ahəŋ.
2 Kità kà, dza uwana adzadzaŋ gəl ala la huma aŋa azladza, uwaga kà adzadzaŋa gəl ala kà la tatak uwana la afik Zəzagəla afà à ahəŋ, azlauwana taɗehəŋ kiya uwanay kà tadàbiy seriya à gəl aŋatà.
3 Ama baŋa azladza, uwana taɗàh delga kà, guba aza atà kà azlaməna makor kutso aw, say azlaməna maɗàh mawisiga la uwana guba az atà pəra. Baŋa asa à akul kà guba aŋa maz akul la huma aŋatà aw kà, ɗahàw delga, kà akul aŋa mahəɗ à atà à adi.
4 Kà uwana azlauwana takoray kà, taɗehəŋ kà sləray uwana Zəzagəla afà à atà à ahàl kà mazlak ka aŋa maɗàh delga. Baŋa kadaɗahaw mawisiga kà, guba akəs akul kà atà, kà uwana ndzəɗa uwana Zəzagəla avà à atà kà, avà à atà kà deyday aw. Atà kà, azlaməna sləray aŋa Zəzagəla, kà mapəhla mapak ləv aŋa Zəzagəla ala lakəl aŋa azlauwana taɗàh mawisiga, kà maɗàh à atà seriya à gəl.
5 Tsa baŋa kiya uwanay kà, say məkəsay gay aŋa azlaməna makor kutso, kà huma yewdi pəra aw, ŋgaha la seriya uwana la abà atəɗ anu à gəl aw. Ama kə̀sàw gay aŋatà, kà uwana kasəlaw la ləv la tsəh kà, tetəvi uwaga kà asa kà à Zəzagəla babay.
6 Gay gà la uwaga à uwana, kapəlaw hadama babay. Zəzagəla aɓə̀k à azlaməna mazəɓ hadama à ahəŋ, kà atà aŋa maɗàhla sləray uwaga lela.
7 Pə̀làw à azladza uwaga gesina tatak uwana tanava à akul. Pə̀làw hadama à azlaməna mazəɓ hadama, pə̀làw duwan à azlaməna mazəɓ duwan. Kə̀sàw gay à azladza uwana la ahàl ala takor kutso lela.
Mawoy vok kà anu kà anu
8 Kadzaw à ahəŋ la goder aŋa dza la vok aw. Goder aŋkul kəla kà, say mad à huma à gay la mawoy à azladza anik la abà. Kà uwana dza uwana awoya azlaməna magay aŋha kà, anəfa mapəhay aŋa Zəzagəla lela.
9 Haɗay, Zəzagəla agòɗ à anu:
ˈKada à gəl gaw aw, kakəɗ dza aw, kada gəl aw, kakəɗa yewdi à azlatatak aŋa azladza anik à vok aw.ˈ
Azlamapəhay uwaga, la azlaanik gesina kà, tahama à abà à uwana agoɗ:
ˈWòyàŋ masla magay aŋak, bokuba uwana kawoya gəl aŋak bay.ˈ
10 Dza uwana awoya masla magay aŋha kà, aɗahalaŋ mawisiga à vok aw. Kità kà baŋa kawoya azlaməna magay aŋak kà, kanəfa mapəhay à uda gesina.
Mawul à waŋ aŋa Kristu kà nekwa
11 Wàɗàw vok à uda, tsa kasəlaw mavakay uwaga lagwa kà, tsənàwla adagay kà uwana kaslà uwana Zəzagəla adàɓəl anu aŋa tetuwa kà nekwa. Uwaga kà kərkər bokuba la mavakay uwana mədiŋ gəl à Yesu Kristu à vok dadàŋ aw.
12 Vəɗ la uwaga adà à lig, afats la uwaga atsa à afik. Lagwa kà mənəfa à sləray aŋa mələs aya aw. Mətsokw azlatatak guvəl uwana à abà, məpala guvəl la afats.
13 Məhàd lela, azlauwana taday la uɗaka la abà. Məgà azlaməna mas guzu aw, məlalìm lakəl aŋa tatak may aw, məɗahà mabila baməraka la mana mi aw, məɗahà magazlay la azladza aw, ŋgaha məkaɗà yewdi à tatak aŋa azladza anik à vok aw.
14 Mətsòkw Yesu Kristu à vok bokuba tatak guvəl gami. Kadzugwaw à azlatatak mawisiga, uwana asa à vok aŋkul kà maɗehəŋ aw.