3
የሱሳ ሙሰፕ ኣꬍዛ
1 የይ ግሾስ፥ ጾስ ጼስ ሻግንቴዝ ጌሽ እሹንꬆ፥ ኑ አማኖስ ጎዳ ግ ጼግዝ ሀዋረኔ ቄሰ ሀላቃ የሱሳ ቦኦይታ።
2 ሙሰ ጾስ ካራ ኡባይድ አማንንቴዛይ ጋርክ የሱሳካ ፋና ሹሜዝ ጾሳይስ አማንንቴዛያ።
3 ኬꬅ ኬጽዛይ ኬꬃይፕ ኣꬊ ቦንችንትዛይ ጋርክ የሱሳ ሙሰፕ ኣꬊዝ ቦንቾ ኤኮዳይስ ቤዝዛ።
4 ፐቲ ፐቲ ኬꬅስ ኬጼዝ አሲ የዛ፥ ዝን ኡባ ሀንሴዛይ ጾሰ።
5 ሙሰ ጾስ ካራ ኡባይድ አማንንቴዝ አይለ ማቂ፥ ጾሲ ቲናፕ ጎድባዛይስ ማርካ ማቄዛ።
6 ዝን ክርስቶሳ ጾስስ ናአ ጋርክ አማንንቴዛያ። ኑኒ ኤኮዳ ግ ያሻ ባይꬅ ጬቆር ናግዛ ኡፋይሳ ሚንꬂ ናግኮ ኑ ኤ ካራ።
ጾስ ዎያስ የዝ ሸምፖ
7 የይ ግሾስ፥ ጌሻ አያናይ ግዛይ ጋርክ፥
«Ꮊይኖ ይ ጾሳይ ግዛ ስእኮ
8 ሊዦ ቢታ ይ ታና ፓጬዝ ጋላስ፥
ይ ዎርዣቴዛይ ጋርክ፥
ይ ዎዝና ምንꬅፓተ።
9 ኤዛይድ ይ አድታይ ታና ፓጬዛ፤
ኦይታም ላይꬅ ታ ኦሳ በኤዛ።
10 የይ ግሾስ፥ ታ የ የለትꬃ ሴሬዛ፥
‹ኡንቲ ኡባ ዎደ ፋ ዎዛናይር ባልንትዛ፤
ታ ኦጋ ኤረካያ› ታ ዬጌዛ።
11 የይ ግሾስ፥
‹ታ ሸምፖ አቃ ኡባራካ ገላሚ› ዬጊ፥
ታኒ ታ ሴራይድ ጫቄዛ፥ ዬጌዛ» ዬግዛ።
12 ታ እሹንꬆ፥ ይንትፕ ኦ ጋንጨካ፥ ደኦ ጾሳይፕ ይንታን ሻክዛ ኢታኔ አማኖዋ ዎዝና የዛማይ ጋርክ ናግንቶይታ።
13 ይንትፕ ኦናካ ናጋራ ባልꬅን፥ ፋ ዎዝና ምንꬃማይ ጋርክ «Ꮊይኖ» ዬግንቲ ጼግንቶዳር ጋላስ ጋላስ ዎልር ዞርንቶይታ።
14 ኑ ቲና አማና ኑኒ ዉርስꬂ ሄሎዳይስ ሚንꬂ ናግኮ፥ ክርስቶሳር ፐትፕ ላቶዳ።
15 ጌሻ ማጻፋይድ፥
«Ꮊይኖ ጾስ ግዛ ይ ስእዝ ዎደ
የ ዎደ ኡንቲ ዎርዠትꬃር ሀኔዛይ ጋርክ፥
ይ ዎዝና ሚንꬅፓተ»
ዬጌዛ።
16 ጾስ ግዝባዝ ስኢ ዎርዠቴዝታይ ኦናንታራ? ሙሰ ግብጸፕ ካልꬂ ከሴዝ ኡብታ ባሳኔ?
17 ጾስ ኦይታም ላይꬅ ኦና ሴሬኔ? ናጋራ ኦꬄዝታኔ ኡ አሃይ ሊዦ ቢታ ዎꬊ አቴዝ አስታ ባሳኔ?
18 ማ ጾስ፥ «ታ ሸምፖ አቃ ኡ ገላሚ» ዬጊ ጫቄዛይ፥ ኤስ ኪትንታም እጼዝ አሳይሳፕ አትን ኦሶ?
19 ይኬ፥ ኡንቲ የ ሸምፖ አቃ ገለካ አቴዛይ አማነካ ግሾስ ማቄዛና ኑ ቦኦዳ።