10
1 ታ እሹንꬆ፥ ታ ኩንꬅ ዎዝናር ታ አሞትዛይኔ ጾሳ ዎስዛይ እስሬልታይ አቶድ ጋርከ።
2 ኡንቲ ጾስስ ምጭንትዛዝን፥ ቱማ ኤረትꬅ ꬋቦር ምጭንቶዛና ታ ማርካትዛ።
3 ኡንቲ ጾስ ጽሎትꬅ ኦገ ኤራም እጺ፥ ፋ ኣዳ ጽሎትꬅ ካሌዛፕ አትን ጾስ ጽሎትꬅ ኮየካያ።
4 አስ ኡባይ አማኖር ጽሎድ ጋርክ ክርስቶሳ ህገስ ፎሎ ማቄዛ።
አቶትꬃ ኡቢታይሲ
5 ሙሰ አስ ህገ ናጊ ኤክዝ ጽሎትꬅባዝ፥ «ህገ ናግዝ ኦንካ የ ህጋ ናጌዛይ ጋርክ ደኦ የዞዳ» ዬጌዛ።
6 ዝን አማኖር ኤክዝ ጽሎትꬅ ባጋ ጊንትንቴዛይ Ꮊያ፦ «ነ ዎዝናር፥ ‹ኦኒ ሳሎ ከዞዴ?» ዬግፐ፤ የይ ክርስቶሳ ዎꬆዳይስ።
7 ዎይ፥ «ሱለ ሳአ ኦሞ ዎꬎዳይ ኦኖ?» ጊፐ፤ የይ ክርስቶሳ ዱፎፕ ከሶዳይስ።
8 ዝን ዬጊ ጻፍንቴዝ፦ «ቃላይ ነ ካለ የዛ፤ ነ ዶና ጋንጨኔ ነ ዎዝና ጋንጨ የዛ» ኑኒ ይንትስ ኦድዝ አማኖ ቃላይ Ꮊያ።
9 «የሱሳ ጎዳ» ግ ነ ዶናር ማርካትኮኔ ጾሳይ ኤዛ Ꮊይቆፕ ደንꬄዛና ነ ዎዝናር አማንኮ፥ ነ አቶዳ።
10 አሲ ፋ ዎዝናር አማኒ ጽልዛ፤ ፋ ዶናር ማርካቲ አትዛ።
11 ማጻፋይ፥ «ኤዛ አማንዛ ኦንካ ዬላተና» ዬጌዛ።
12 ፐቲ ጾሳይ ኡቢታይ ጎዳ ማቄዝ ግሾስ አይሁድታይ ጋንጨኔ አይሁደ ባ አስ ጋንጨ ዱማትꬂ ባያ። ኤ ፋና ጼግዝ ኡባይስ ጋመ ኬሃ።
13 ጎዳ ሱንꬅ ጼግዝ ኦንካ አቶዳ።
14 የዝን፥ ኡንቲ አማነካ የዝታር ዋይዚ ኤዛ ጼጎዳይስ ዳንዳኤ? ኡ ኤባዝ ስኤካ የዝታር ዋይዚ ኤዛ አማኖዳይስ ዳንዳእኔ? ማ ኡንትስ ቃላ ኦድዝ አስ ባዝን፥ ዋይዚ ስኦዳይስ ዳንዳእኔ?
15 ኪትንቴዝ አሲ ባዝን ቃላይ ዋይዚ ኦድንቶዳይስ ዳንዳኤ? ማጻፋይድ፥ «ኡፋይስ ዎንግለ ኦድዝ አስስ ቶክታይ ዋፋ ሎእነሻ» ዬጊ ጻፍንቴዛ።
16 ዝን ኢስያሳ፥ «ጎዳዮ፥ ኑ ማርካትꬅ ኦኒ አማኔኔ?» ዬጌዛይ ጋርክ፥ ኡቢታይ ዎንግለ አማነካያ።
17 የይ ግሾስ፥ አማናይ ስሳፕ ይእዛ፤ ስስ ክርስቶሳ ቃላፕ ይእዛ።
18 ማቆዝን፥ ኡ ቃላ ስኤካ ጉሶኔ? ዋኣ ስኤዛ። ማጻፋይድ፥
«ኡ ኦዳይ ቢታ ኡባይል ስንቴዛ፥
ኡ ቃላይ ሳአ ጋጻ ሄሌዛ» ዬግንቴዛ።
19 ዝን እስሬለ አሳይ ኤረካያ ጉሶኔ? ሙሰ ቲና፥
«ታኒ ይንታን ለቂንቴዝ አሳይ ጋንጨ ቂርሶዳ፤
ማ አካኮዋ አሳይ ጋንጨ ይንታን ይሎሶዳ»
ዬጌዛ።
20 ማ ኢስያሳ፥
«ታና ኮየካ አሳይስ ታ በንቴዛ፤
ታና ኦይጨካ አሳይስ ታ ታና ቤዜዛ»
ዬጊ ያሽተካዛር ኦዴዛ።
21 ዝን ኢሳያሳ እስሬልታይ ባጋ ኦድታር፥
«ጋላስ ሙዳ ኪትንቶዋ አሳይስኔ
ታና እጽዛ አሳይስ ታ ኩሸ ሚጬዛ»
ዬጌዛ።