18
Jesús pereesotehuak
(Mt. 26:47-56; Mr. 14:43-50; Lc. 22:47-53)
1 Jesús íkäi noksuka yeu siika, ä discíipulommaki, áman jakia Cedrón ti téhuaakau huáytana bíchaa, huam huertata órekaïpo; huämi kibakek ä discíipulommaki.
2 Éntok Judas kétchi, huatem mampo ä toijnakëïhui, áma täyay, bueïtuk Jesús juebénasi ä discíipulommak ámam náu yayajay.
3 Huanäi Judas áman yepsak, juebena sontarom huériaka, éntok tiöpopo alguacil tékilta joame. Jume pariseerom éntok tiöpopo chë nésahueme áman am bíttualatukay. Machiriaka, kúkutaka, éntok esparakam áman yájjak.
4 Të Jesús, sïmeta juka áu huéenakemta jüneriaka, bát ámeu yeu kíkteka, ínel ámeu jiaahua:
—¿Jábetasem jaria?
5 Huanärim ínel ä yómmiak:
—Juka Jesús Nazarenota.
Jesús éntok ínel ámeu jiaahua:
—Ínapone ájäria.
Judas éntok ámemak huéiyey, hua bem mámpo ä tóijnakeme.
6 “Ínapone ájäria” tä jiay, amayim sájaka buíapo huáttek.
7 Jesús júchi éntok am natemajek:
—¿Jábetasem jaria?
Bempo éntok ínel ä yómmiak:
—Juka Jesús Nazarenota.
8 Huanäi Jesús ínel am yómmiak:
—Enchimne téjhuaasula ín ájäriatukähui. Nechem jariätek, ímërem tójja; éläpom sákanake.
9 Íkäi nookak, huaka ä noki ä nokakäu chúpnakë béchïbo: “Huame em nee mákakäu, huépülak júnene kaa täruk.”
10 Huanäi jü Símon Peero, ejparam yeu huíkeka, huaka tiöpopo chë nésahuemta sáhuëu bátatana náka chúkti mámäkok. Ïri éntok Malco ti téhuaakay.
11 Huanäi Jesús Perotau ínel jiaahua:
—Em ejparamë huaka bea bóosapo kibacha. Juka vaasota ín Áchay nee mákakäu, ¿jachune kaa ä jïnake jäni?
Jesús sumo sacerdoteta mámpo tóijhuak
(Mt. 26:57-58; Mr. 14:53-54; Lc. 22:54)
12 Huanäi huame sontarom, jü tribuno yäura, éntok jume alguacilim sáhuëhui, Jesústam buíseka ä súmmak.
13 Huanärim bát huëpo Anástau yeu ä tójjak; bueïtuk ikäri Caifás ä asëbuakay. Huäri huásuktiapo Caifás sumo sacerdotetukay.
14 Jü Caifás ínel jume judío yäuchimmeu nok‑latukay, huépul yoremta muknakeu türinake tíaka, jü pueblota béchïbo.
Peero Anásta tebatpo aaney
(Mt. 26:69-70; Mr. 14:66-68; Lc. 22:55-57)
15 Huanärim Jesústa sáu kaatey, jü Símon Peero éntok senu ä disciipulo. Íkäi disciipulota éntok sumo sacerdote ä täyay. Huanäi Jesústamak ä teebat jóapo kibakek;
16 të Peero éntok päkun puertata bía aaney. Huanäi jü disciipulo sumo sacerdoteta täyäu yeu siika. Huanäi huaka jámut puertata suayamtau nokaka, juka Perota áman kibaktuak.
17 Huanäi jü puertata suayame Perotau ínel jiaahua:
—¿Émpë két jü yoremta disciipulo?
Huanäi áapo ä yómmiak:
—Ëe, kanne ájäria.
18 Ámam jäbuekay, huame áma sáyhuame éntok huame alguacilim. Náalatakam súkkähuey, bueïtuk sébiakay. Peero éntok két ámemak áma huéeka súkkähuey.
Anás juka Jesústa temajek
(Mt. 26:59-66; Mr. 14:55-64; Lc. 22:66-71)
19 Huanäi jü sumo sacerdote Jesústa temajek, ä discíipulom bétana éntok jita am majtiähui.
20 Jesús éntok ínel ä yómmiak:
—Ínapo sïmem jíkkajäpo huame géntemmeu nok‑la. Jíbane jum sinagogapo éntok tiöpopo am majtiala, jum sïme judíom náu yayájäpo. Kaitane éhuil nok‑la.
21 ¿Jatchiake nee temaje? Huame nokta jíkkaij‑lamë temaje jítasune ámeu nok‑la. Bempo jüneiya jita ín ámeu nok‑latukähui.
22 Juka Jesústa ínëli nónokak, senu alguacil áma anëhui ä chóchonak, ínel jíaka:
—¿Jachë ínel ä yómmia, juka sumo sacerdoteta?
23 Jesús éntok ínel ä yómmiak:
—Kaa türik nee nónokak, nokäe, ¿jáksu kaa türi jü ín nokakähui? Të tühuata nee nokay, ¿jatchiake nee chónna?
24 Huanäi Anás súmata, Caifás sumo sacerdotetau ä bíttuak.
Peero Jesústa kaa áu täya tíiya
(Mt. 26:71-75; Mr. 14:69-72; Lc. 22:58-62)
25 Jü Peero tájimmeu huéeka súkkähuey, huanäi nátemaijhuak:
—¿Jachë empo két ä discíipulommak huéiye?
Huanäi áapo am yómmiak:
—Ëe, kanne ájäria —tiahua.
26 Senu éntok sumo sacerdoteta sáhuëu Perota náka chúktiakäu huahuaji ínel áu jiaahua:
—¡Enchine bíchakam ténna, áman huertapo áamak enchi aneyo!
27 Peero éntok júchi kaa áu ä täya tíaka nookak. Huanäi sep jü totoröra kúkusek.
Jesús Pilaatotau yeu tóijhuak
(Mt. 27:1-2, 11-14; Mr. 15:1-5; Lc. 23:1-5)
28 Jesústam Caifásta jóapo yeu núk sájjak, palacio romaanou bíchaa. Ketune kethueytukay. Huanäi palaciohuim kaa kiímuk, bem jiöri bárë béchïbo, pájcua buähuamta buä báreka.
29 Huanäi jü Pilaato ámeu yeu sika ínel ámeu jiaahua:
—¿Jíta bétanasem ä nätua, íkä yoremta?
30 Huanärim ínel ä yómmiak:
—Íkä yoremta kaa juënak yáalatukte kaa em mámpo ä tóij éiyey.
31 Huanäi jü Pilaato ínel ámeu jiaahua:
—Emem ä huériaka, enchim ley nésahue páman ä yáuhua.
Judíom éntok ínel ä yómmiak:
—Ítapo kaita lútüriata mákki, jábeta itom mënakë béchïbo.
32 Inëlim jiaahuak, Jesústa nokakäu chúpnakë béchïbo, am jünee ïaaka jáchin ä muknakëïhui.
33 Huanäi jü Pilaato júchi palaciou kibakeka, Jesústa núnuka ínel áu jiaahua:
—¿Jachë empo jume judíommeu Rey?
34 Jesús éntok ínel ä yómmiak:
—¿Jachë empo em éäpo ínel jiaahua, o tattäbuika ino bétana ínel emou jiaula?
35 Pilaato éntok ínel ä yómmiak:
—¿Jachu ínapo judío? Huame em pueblopo joome éntok huame sacerdotem chë nésahueme ín mámpo enchi tóij‑la. ¿Jítasë yáala?
36 Jesús ä yómmiak:
—Jü reytaka ín nésahueu kaa ímï ániapo joome. Të reytaka ín nésahueu ímï ániapo jométuk, jume ín sáhuëu nássua éiyey, kaa judíom mámpo ín tóijna béchïbo. Të hua reytaka ín nésahueu kaa ímï joome.
37 Huanäi jü Pilaato ínel áu jiaahua:
—¿Huanäisu empo reytaka nésahue?
Jesús éntok ínel ä yómmiak:
—Empo reytaka nee nésahue tíiya. Ínapo íäri béchïbo yeu yoremtula, éntokne íäri béchïbo ím ániapo yebij‑la, lútüriata bétana ín noknakë béchïbo. Sïme huame lútüriat kateme ín nokim jíkkaja.
38 Huanäi Pilaato ínel áu jiaahua:
—¿Jítasa jüri lútüria?
Jesústa muknakeu bétana bette nooki at chupari
(Mt. 27:15-31; Mr. 15:6-20; Lc. 23:13-25)
Ínëli jiausuka júchi yeu siika, judíommehui. Huanäi ínel ámeu jiaahua:
—Kaita kúlpata nee át téula.
39 Të eme ínel ä boojoria, pájcuapo senuk ín búttianakëhui. ¿Jachem juka judíommeu Reyta nee búttia ïaa?
40 Huanäi júchi bemélasi sïmetaka nónokak, ínel jíaka:
—Júkäi ëe, Barrabásta ál‑la.
Jü Barrabás éntok lak‑rontukay.