2
Jü bóoda Caná Galiléa buiärapo
1 Báij taahuarim huéy, pueblo Caná Galiléa buiärapo boodatukay. Jü Jesústa áiye két áma aaney.
2 Jesús éntok ä discíipulom, kéchim áman núnuritukay, jum boodahui.
3 Juka vinota lütek, Jesústa áiye ínel áu jiaahuak:
—Kaitam vinota jípure.
4 Jesús ínel ä yómmiak:
—¿Jítasë ínomak jípure jámmut? Ketune kee jee yuuma, jü ín hora.
5 Ä áyehua éntok ínel ámeu jiaahua, huame áma sáyhuammehui:
—Sïmetem áapörik enchim yáa sáhuëu yáuhua.
6 Huämi éntok búsan téta sótörim bäam béchïbo áma mánekay, bem ä boojoriapo bénasi, bäam áma jípureka, jume judíom bem sáyhuakä pámani emo bábaksiahuäpo. Huämi huépul sótöpo ochenta o cien litrom bäam áma bekiakay.
7 Jesús ínel ámeu jiaahua:
—Ímëi sótörimem bäammea tápunia.
Huanärim jikau tájti am tápuniak.
8 Huanäi ínel ámeu jiaahua:
—Ilikkikem nüka, jü áma nésahuemtau am huéria.
Huanärim áu am tójjak.
9 Huä áma nésahueme éntok, jume bäam vinosi ayulame jihueka ä tútürek, kaa jünéaka jákun ä nütukaïhui. Të jume áma sáyhuame ál‑la jüneiyay, jume bäam jákun bem nükaihui. Huanäi juka jubemta núnuteboka,
10 ínel áu jiaahua:
—Sïme yoremem juka vino türik bácham jíjïtua; chúkula béja yünam jïlatuk, huaka kaa tua türik am jíjïtua. Të empo huaka vino chë türik ërialatukay, én tájti.
11 Jesús ímëi señaalim bát huéeme yáuhuak, jum Caná Galiléapo, éntok yeu ä machiriak juka chë yörisi machik át ayukähui. Huanäi huame ä discíipulom ä súaleka taahuak.
12 Chúkulam Capernaum pueblou kóm sájjak, Jesús éntok ä áyehua, ä sailahuam, éntok ä disciipulohuam. Huämïrim kaa jaiki táapo áma aanek.
Jesús tiöpopo jita nénkiriom yeu béebak
(Mt. 21:12-13; Mr. 11:15-18; Lc. 19:45-46)
13 Jü taahuari abe yuumay, pájcua téamta béchïbo, judíom boojoriähui. Huanäi Jesús buere joära Jerusaléniu jikau siika.
14 Huanäi jum buere tiöpou kibakeka, jume buéyesim áma nénenkame téuhuak, éntok kabaram, éntok guókohuim, éntok jume tómita nanakuliaka áma jokame.
15 Huanäi huiteri jíbebiata yáaka, tiöpopo sïmem yeu béebak, bem kabarammaki, éntok bem buéyesimmaki. Jume tómita áma nakuliame chíbela am guötiriak; mesam éntok chíbela tátabek.
16 Huanäi jume guókohuim nénkammeu ínel jiaahua:
—¡Íkärem mékka huéria, éntokem ín Áchay kári kaa mercado káapo jípure!
17 Huanäi ä discíipulom jïojtetau huáhuaatek, ínel ä jiäpo: “Em káari ín yörë béchïbo ín jiápsipo nee sasäbuania.”
18 Huanäi jume judíom ä yómmiak ínel áu jiaka:
—¿Jíta señaltasë itom bíttua, íkäi em joä béchïbo?
19 Jesús éntok ínel am yómmiak:
—Íkäi tiöpotem mójaktia; huanäine báij taahuata huéy júchi ä tóboktianake.
20 Huanäi jume judíom yauchim ínel áu jiaahua:
—Cuarenta áma búsan huásuktiriapo yáari ïri tiöpo; ¿empo éntok báij táapo emo ä tóboktianake tíiya?
21 Të áapo ä takaahua tiöpo bétana nokaka ínel jiaahuay.
22 Huäri béchïbo jume kókkolam násuk ä jíabitek, jume ä discíipulom áu huáhuaatek, íkära nokakaïhui. Huanärim juka jïojteta súaleka taahuak, éntok Jesústa nokakaïhui.
Jesús sïme yoremem jíapsi jüneria
23 Jesús Jerusalémpo aneka, judíom kabara jísobahuakä papajköpo. Huanärim juebénaka ä téhuam súsualeka taahuak, huame señaalim ä joay ä bíchaka.
24 Të Jesús kaa tua am súaleka taahuak, bueïtuk sïmem jiápsipo jüneriay,
25 éntok kaabeta ä téjhuaanakeu boobíchaïhuiy, jume yoremem bétana; bueïtuk áapo jüneiyay yoremta jiápsipo jita ayukähui.