21
Jesús guoy búsan discíipulommeu áu yeu machiriak
1 Chúkula Jesús júchi ä discíipulommeu áu yeu machiriak, Tiberia bahue mayoachi. Ínëli yeu siika:
2 Náhuim aaney, jü Símon Peero, Toomas jü Guoguörï tíame, Natanael pueblo Caná Galiléa buiärapo joome, jume Zebedeota üusim, éntok huate guoyika ä disciipulohuam.
3 Símon Peero ínel ámeu jiaahua:
—Kúchumne buíj báare.
Bempo éntok ínel ä yómmiak:
—Ítapo két émomak kat báare.
Huanärim canoapo jämuka sájjak. Të huäri tukaarit kaitam buíssek.
4 Béja matchuu bíchaa, Jesús ámeu yepsak, jum bahue mayoachi. Ä disciipulohuam éntok kaa ä täyay, ä Jesústukaïhui.
5 Huanäi ínel ámeu jiaahua:
—Uusim, ¿jachem jita jípure buä mátchik?
—Ëe —tim áu jiaahua.
6 Huanäi ínel ámeu jiaahua:
—Canoata báta bétanem jítërim jímma; huanärem kúchum buíjnake.
Huanärim áman am jímmaaka, kara yeu am huíkkey, yún kúchum bem játiakä béchïbo.
7 Huanäi hua disciipulo Jesústa nákeïhui, Perotau ínel jiaahua:
—¡Jü Señor!
Símon Peero, Señorta jíay ä jíkkajaka, ä sánkohua huikojtek, bueïtuk áu ä úhuaalatukay. Huanäi bäau áu jímmak.
8 Huanäi jume huate discíipulom canoamak yeu yájjak, jítërim kúchummea tápunik huík sákaka; bueïtuk kaa mékkatukay jum bahue mayoahui, jíba tua cien meetrotukay.
9 Buíahuim kóm chépteka óbam téuhuak, éntok huépü kúchuta áma béppa tekta, éntok páanim áma órekame.
10 Huanäi Jesús ínel ámeu jiaahua:
—Jume kúchum enchim buísekähuem äbo huéria.
11 Huanäi jü Símon Peero áma jämuka jume jítërim buíau yeu huíkkek, ciento cincuenta áma báij buere kúchummaki; të am juebenamtuk junne, jume jítërim kaa síutek.
12 Huanäi Jesús ínel ámeu jiaahua:
—Äbem sájaka jïbuä.
Jume discíipulom bem át guómtia béchïbo, kaabe ä temajek ä jábétukaïhui, jünéaka ä Señortukaïhui.
13 Huanäi Jesús áman sika jume páanim nüka am miikak. Alë bénasi kúchuta kétchi.
14 Ïri béja jü bájikuntuka huéiyey, juka Jesústa ä discíipulommeu áu yeu ä machiriähui, kókkolam násuk jíabitesulataka.
“In kabaramë suaya”
15 Huanäi jïbuäsukam jü Jesús Símon Perotau ínel jiaahua:
—Símon, Jonásta üusi, ¿jache empo chë nee nákke, ímëi béppa?
Huanäi ínel ä yómmiak:
—Jeehui, Señor; émpë jüneiya enchi ín nákëhui.
Jesús éntok ínel áu jiaahua:
—In kabaramë suaya.
16 Júchi éntok guosa huëpo ínel áu jiaahua:
—Símon, Jonásta üusi, ¿jache nee nákke?
Peero éntok ínel ä yómmiak:
—Jeehui, Señor, empo jüneiya nee enchi nákëhui.
Huanäi ínel áu jiaahua:
—In kabaramë suaya.
17 Bájikun huëpo ínel áu jiaahua:
—Símon, Jonásta üusi, ¿jache nee nákke?
Huanäi jü Peero kaa al‑lëiak, báisi junëli áu ä jíakä béchïbo. Huanäi ínel ä yómmiak:
—Señor, émpë sïmeta jüneria; émpë jüneiya enchi ín nákëhui.
Jesús éntok ínel áu jiaahua:
—In kabaramë suaya.
18 Tua lútüriapone ínel emou jiaahua: Jübua yötuke empo emo sásankotuay, éntoke em huée bárëu bíchaa sisimey; të béja ölatuka, em mámamë rutuktianake, éntok täbuika enchi sánkotuanake, éntok kaa em huée bárëu bíchaa enchi huériunake.
19 Ínëli nokaka ä jüneetebok, jáchin mukuka Diosta ä úttilnakëïhui. Íkäi noksuka ínel jiaahua:
—¡Ino sáukë huéiye!
Huä disciipulo chë nákhuame
20 Jü Peero, amáu remteka, juka disciipulota Jesústa chë nákëu bitchak, áme sáu huémta, hua áman tukaapo jïbuähuay át huijjüteka kátekäihui, ínel áu jíakäihui: “Señor, ¿jábesu hua enchi nénkinakeme?”
21 Peero ä bíchaka Jesústau ínel jiaahua:
—Señor, ¿ïsu? ¿Jítasu áu huéenake jäni?
22 Jesús éntok ínel ä yómmiak:
—Ínapo ínel éätek, áapörik tahuanakeu júchi ín yepsäu tájti, ¿jitasë áma täru? Émpë ino sáu huéiye.
23 Huanäi ïri noki chíbejtek jume hermaanom násuku, huákäi disciipulota kaa muknakëïhui. Të Jesús kaa junëli jiau báarey jiöbe, ál‑la ínel jiaahuak: “Ínapo ínel éätek áapörik tahuanakeu júchi ín yepsäu tájti, ¿jítasë áma täru?”
24 Ïri ájäria jü disciipulo íäri bétana nokakame, éntok íäri bétana jïojtekame; éntokte jüneiya, ä nokihua lútüriatukähui.
25 Jesús huatek juebenak yáuhuak. Huámëi hueuhuëpulaka nátepua jïojtetukätek, ínenne éiya, jamak ím ániapo júnem kaa beeki éiyey, huame librom jïojterim. Júnentunake.