4
Upatthani wontuniyani
Cinkhumelela vayi ikhotto nnyo ni waanaca winyu ayaayoru nwo? Cinkhuma nkhwiluni cinaana mwirutthuni mwinyu mmo. Nnakhalela nttima ca akhwinyu ni khannophwanya. Nnawiiva ni nnarama nanso khannophwanya. Makhalelo enyu ari owiiva ni waana ikhotto. Nnavekela nanso khannakhela, kontha khannovekela ratta. Nnophavela mwaphwanyaka nrihakaceleke nkhwiluni mwinyu mmo. Nyu mayooluva, khannocuwela wiira upatthanana ituniya unkhala mwiinani awe Nluku? Ule nophavela ukhala mpwana awe ituniya, neepanka mwiinani a Nluku. Atthuna nnoona wiira waari wopure cihimilyaya cowantikhiya ciiraka: Nnepa univahilyawe wiira ukhale ni hii uhaana ihace? Nanso uyo nanivaha nnema nuulupale. Phimaana cowantikhiya ciiraka:
Nluku nawaarusanana owiittottopa
nanso nawaavaha nnema oowiyeviha.*
Phimaana, mmwiiwelele Nluku. Munkhottele sotwani ni uyo phinhalawe wuutthawani. Mphiyeke wa Nluku, ni uyo phinhalawe wuuphiyerani! Anataampi, nnyaweke ni nrapiheke nrima, nyu anamirima miili. Ncukuleke ni muunleke. Mwakakhaniheke uthyaa ni wunla, utteeliya ni ucukula. 10 Mwiiyevihe wa miithoni wa Apwiya ni ayo phinhalaya uwunnuwihani.
Nhaapanane
11 Asunnaka, nhaapanane. Ule nomwaapa munnaawe atthuna unhukhumu munnaawe, noolumacera yoonanara ni nohukhumu malamulo. We wamakelaka uhukhumu malamulo, khuneettela, nanso wiyeesile ukhala mayoohukhumu. 12 Nlamuli ni hukhumu ri mmoca paahi, yoole noorya woopola nuukwanyula. Vano we, tipani oonhukhumu nkhwaa?
Wiisamiha
13 Vano nviriyane, nyu nneeresa: Ilelo atthuna meelo, ninaarwa iparasa yonese, ni ninkookhala mwakha mmoca nimweettaka nakoso nuuphwanya nhakhu. 14 Nyu khancuwenle itthu inhala wuukhumelelani meelo. Ukumi inyu uyo unookhala isiyani? Nyu nri toko itthapwe inkhuma ni ukati vakani inamwaryaca. 15 Uhiya wuulumaca commo, fatari wiira: Apwiya yatthunaka ni anivahaka ukumi, ninapanka ila ni ile. 16 Nanso, nna, nnasamela citthu cinoopuwelenyu upanka. Wiisamiha toko coo inkhala itthu yoonanara. 17 Phimaana muupuwele ratta: Ule nocuwela wiira nolamuliya upanka yooreera, pihipankaka, naakosa.
* 4:6 Ikano 3.34