5
Yesu ahonvoniha ntthu ovariya ni minepa
Mt 8.28-33; Lk 8.26-34
Yahophiya nikhopela nikhwaya ntthiya, ilapo yo Yeraseno. Yesu nalapuwile ahosiceriya ni ntthu aakhuma umahiye, avariye ni nnepa woonanara. Akhala umahiye, ni khaawo oorya ummara, mena vakani untthuka ni unyolo, nlattu imaara cinci ahotthukiya ni unyolo mpaka wuntakaca unyolo ni unyakataca ikatiyato; khaawo oorya ummoniha. Mahuku othene anaweetta, uthana ni uhiyu mmarekhano ni mmyaakoni, akhuwaka ni eerakalihaka ni maluku. Amoonaka Yesu uttayi, ahotthimakaca ni ahonkhoromela ni ahokhuwa ni ncu nowirunya: Nyu nrinani ni miyano, Yesu Mwana a Nluku Ooculu. Nhikoopopihe! Ni khweeli, Yesu anamwiirela: Ukhume mwantthuni mu, nnepa woohiloka. Wahoolo ahonkoha: Ncina naa tipani? Ahaakhula: Mphwinko phi ncina naka, nlattu niri enci. 10 Ni yahonlepela ankhanyererihaka wiira ahomoliye nttetthe ule. 11 Caanalya vano ikuluwe nceresere mwaako, 12 ni minepa coonanara cahonlepela Yesu: Nnilamulele nakele nkuluweni mmwe. 13 Yesu ahorumelela, ni nenna nna minepa coonanara cahokhuma wantthuni ni cahokela nkuluweni, ni nikhoto nne nari toko ikuluwe elufu piili (2000) naheevonyera muntthiyani ni nahottittha. 14 Ahakheli yahotthawa ni yahovira alattulaka mmawaani; na atthu enci yahowa woona itthu yeeranele. 15 Waphiyaya nipuro naryawe Yesu, yahomoona ntthu avariye ni minepa coonanara noonkomile, nawanre ni nakhalanne ankhili, ni yahoova. 16 Asaahiti a ntthu oovariya ni minepa coonanara ni itthu yeranele ni ikuluwe yahottonka itthu yeranele. 17 Vano yahoonlepela Yesu wiira athame ilapo aya. 18 Yesu ahoturuwela okalawani; ni ntthu avariye ni minepa 19 Yesu khantthunihenre, nanso ahomwiirela: Urwee uwaanyaa, wamawaa ni wattonkacere citthu cothene cupankenlyaya Apwiya, ni toko ciwoonenlyaya ikiriri. 20 Ahokhuma wonwo, ni ahopacera uTekapoli itthu yampankenlyawe Yesu, na atthu othene yahotikhinaca.
Ulepela wa athumwane ntthu
Mt 9.18-19; Lk 8.40-42
21 Yesu nalapuwile ntthiya ni ikalawa, ni neemenle nceresere ntthiya wahothukumana mphwinko muulupale wa atthu. 22 Ahophiya vano muulupale o nsinakoka, eehaninya Cayro, ni umoona wawe Yesu, ahonkhoromela, 23 ni ahonlepela ankhanyererihaka: Mwanaka mwanthiyana hanle vakani ukhwa; uwe unthatele matata akhale nkumi.
Uvonihiya wa nretta
Mt 9.20-22; Lk 8.43-48
24 Yesu ahommeleela phutthariyaka ni mphwinko muulupale wamphunyereriha. 25 Vano, nthiyana mmoca awuva iphome iyakha khumi na piili, 26 ni anaweettihiya venci mmatatani mwaya mayoovoniha enci, ni arihile mihakhu cawe cothene, nanso woohiphwanya nafasi, hata iretta awe yaanavira etepacaka. 27 Neewile ca Yesu, ahotakaneela ni mphwinko, ni awaaka uttuli wawe ahonkwanya nihancu nawe; 28 aheecirela mweeco: Mena kakwanyaru cowara cawe, kimmovona. 29 Nananoru iphome yaheemela, ni ahoona mwirutthuni mwawe wiira ikwerere awe ihovona. 30 Nenna nna, Yesu, oonaka wiira ikuru awe yahokhuma mwirutthuni mwawe, ahorukunuwela mphwinko akohaka: Kikwanyile tipani? 31 Owiitthuca awe yahomwiirela: Unawoona wiira miphwinko cinawuphunyereriha miphantte cothene, ni unakoha: Akikwanyile tipani? 32 Nanso Yesu ahoweha nceresere aphavelaka umoona ntthu apankile itthu ile. 33 Vano nthiyana ahocuwela ciheeranya mwirutthuni mwawe oovaka ni athukumelaka ahokhuma ahonkhoromela Yesu ni ahonhimerya citthu cothene. 34 Ni ule ahomwiirela: Mwanaka, ukupali waa uhowoopola. Urwee ni nnema ni uvone ikwerere aa.
Wunwelelihiya wa mwanawe Cairo
Mt 9.23-26; Lk 8.49-56
35 Yesu uulumacaka ninlelo yahowa atthu akina akhumaka inupa awe muulupale o nsinakoka phwiiraka: Mwana aa hokhwa. 36 Yesu, nanso, neewile moolumo ale, ahomwiirela muulupale o nsinakoka: Uhituthuwe, ukupaliki paahi. 37 Ahaateliha othene wiira: Hikivelele ntthu, hikhanle Peturu, Yakopu ni Yohani, nhimaawe Yakopu. 38 Uphiya waya uwaanyawe muulupale o nsinakoka, Yesu aheewa ikuttho yuulupale ya atthu enci yunlaka mpani. 39 Ni akelaka, ahaahimerya: Ikuttho ila wunla nwe isiyani? Mwana uyo kakhwile, narupa paahi. 40 Nanso atthu ale yaananthyaa, Yesu ahaakumihera utaa atthu ale othene ni aakusaka athumwane na anumwane, na ale yammelenle, yahokela mpani mwataleliye mwanamwane. 41 Ni ammaraka ntata, aheera: Mwanaka kinawulamulela, wunwe. 42 Nananoru mwanamwane ahoonwa ni ahopacera weetta, ari mweeco, ni iyaakha khumi na piili. Othene yahooma mwaano. 43 Yesu ahaalepela wiira itthu ile ihicuweliye ni ntthu, ni aholamula uvahiya yoolya mwanthiyana.