9
1 Yesu ahaahimerya tho: Khweeli kinawuhimeryani wiira akina mwaala ari vava khanhala ukhwa ahinaya woona omwene wa Nluku uwaka ni ikuru caya.
Wiitatusa wa Yesu
Mt 17.1-8; Lk 9.28-36
2 Anavinre mahuku siita, Yesu ahaakusa Peturu, Yakopu ni Yohani, ni ahaaweliha veekhaya, mwaako woorekama. Ni aheetatusa wamiithoni waya.
3 Coowara cawe cahothatuwa coowarya, cootteela usilili toko khaawo mayokattha vathiva uwoorya utteeliha ciicale.
4 Ahaakhumelela Eliya wamoca ni Musa ni ooyeli yanawuulumaca ni Yesu.
5 Peturu ahomwiirela Yesu: Mwalimu oreera ukhala vava, niteke marapattha mararu, nimoca na waa, nikina na Musa nikhwawe na Eliya.
6 Kontha khayaacuwela itthu yaahimyawe nlattu yanawoova venci.
7 Ni nahokhuruwa nihutte nakhunenle ni ntthuuci, ni nahokhuma ncu nnihutteni neera: Ula mwanaka oofentiya. Yooyo mwiiwe.
8 Nenna nna, awehaka, khayamoonne tho ntthu, ari Yesu veekhawe.
9 Wakhuruwaya mmwakoni, Yesu ahaalamulela wiira ahihimerye ntthu itthu yoonyaya, mpaka wahoolo Mwanawe Pinattamu nonwelenle mwaatthu ookhwa.
10 Ale yahotthara moolumo ale, nanso yaanakohana ayayoru manaaya, 'wunwelela mwaatthu ookhwa.'
11 Ni yahonkoha yiiraka: Mayowantikha aneerelani wiira woopacera Eliya phinhala uwa?
12 Ahaakhula: Aye, Eliya, awaaka woopacera naahala weesa wanipuroni waya citthu cothene, nanso yantikhiye isiyani ya Mwanawe Pinattamu, wiira nalamuliya uhuva venci, nuunyoholiya.
13 Ni mi mweeco kinawuhimeryani: Eliya ahowa, ni yahompankela cothene catthunaya, toko caantikhiye.
Yesu ahonvoniha ntthu oowerenya icilicili
Mt 17.14-21; Lk 9.37-43
14 Naphile waryaya owiitthuca awe ahoona mphwinko muulupale wa atthu warukurenrye ayoca, ni mayowantikha anyakulihanaka na ale.
15 Amoonakaru Yesu yahotikhina ni yahotthimakaca unkoha isalama.
16 Ni ule ahaakoha ale: Nnonyakulihanani?
17 Ntthu mmoca mwa mphwinko ule, ahomwiirela: Mwalimu, kihowiihera mwanaka, rina nnepa woohuulumaca.
18 Wammaraka vale, unamphatela vathi ni ule napacera ukhuma niphooru, ucekesa miino ni phuumaka teyeye. Kihaalepela owiitthuca aa wiira yoomole ncini, nanso khayoonrye.
19 Yesu aheerela: Nyu, nloko noohikupali, kinhala ukhala ni nyu mpaka yakhani? Kinhala wuvilelani mpaka yakhani? Nkiwiihere woono.
20 Yahommwiihera. Nimoonakaru Yesu, ncini nahompukunyaa mwanhima ni ikuru, mpaka umphatela vathi, ni ahopacera uphirikyaa akhumaka niphooru mwano.
21 Yesu ahaakoha athumwane: Itthu ile inomwiiryanyaa ikhumelo yakhani. Na ale yahaakhula: Ikhumelo mwanamwane,
22 ni imaara cinci nahommonyera wamooroni ni mmasini wiira amwiive, nanso wooryaka vale upanka itthu, unoonele ikiriri, nuunikhavihere.
23 Yesu ahomwiirela: Wooryaka! Ntthu nokupali citthu cothene cinawooryanyaa.
24 Nenna nna, athumwane mwana oyo yahokhuwa: Kinakupali; nkikavihere uhikupali waka!
25 Yesu, oonaka wiira atthu enci yanawa, aholamulela nnepa woonanara ni aheerela: Nnepa wohuulumaca ni wohiwa, Mi kinawulamulela, ukhume wamwana ola, nuuhinturuwele tho.
26 Ni nnepa, ukhuwaka ni wicipulacaka ni ikuru, wahokhuma. Mwanhima ahokhala toko ookhwa, mpaka atthu enci wiira hokhwa.
27 Nanso, ammaraka ntata, Yesu ahommusa, ni ule aheemela.
28 Ukelawawe mpani, owiitthuca yahonkoka veekhawe: Nlattuni hiyano khanoonrye woomola?
29 Ahaakhula: Nloko nna ninoomoliya ni iswali ni utthuka paahi.
Yesu nahimya imaara yonapili uhuva ni ukhwa wawe
Mt 17.22-23; Lk 9.43b-45
30 Akhumaka wonwo yahottupulaniha ilapo yo Kalileya, ni Yesu khatthuna wiira acuweliye ni ntthu,
31 nlattu anavira eetthucihaka owiitthuca awe ni anaweerela: Mwanawe Pinattamu naahala urwehiya mmatatani mwaatthu anhala umwiiva, nanso, nakhwile nowowunwelela anavinre mahuku mararu.
32 Nanso ayo khayeewehile nuulumo nne, ni yanamoova unkoha.
Tipani nohala ukhala muulupale cinene?
Lk 9.49-50
33 Yahophiya uKafarnaum, ni, anari uwaani, Yesu ahaakoha: Mwavanyihanani mphironi?
34 Yahomaalaca, nlattu mphironi yanavanyihana ayayoru, wiira tipani ri muulupale mwaale.
35 Unkomaka, Yesu aheehana owiitthuca awe khumi na eeli ni ahaahimerya: Ntthu aphavelaka ukhala muulupale, eepanke mwankani mwaatthu, ni akhale nrumeyi a atthu othene.
36 Ni ankusaka mwanamwane, ahomweesa iriyari aya, ahommarela ni aheerela:
37 Ntthu nomwaakhela mwanamwane toko ula mwancina naka, nokaakhela Miyano, ni ntthu nokaakhela Mi, khankaakhela Mi, nanso Ule kirumile.
Ntthu hinoniina, nawiraana ni hi.
Lk 9.49-50
38 Yohani ahonhimerya: Mwalimu, nihomoona ntthu oomolaka macini mwancina naa, ni ntthu ule khannitthara, ni nihomwaateliha.
39 Yesu ahaahimerya: Nhimwaatelihe, nlattu khaawo nopanka cotikhineeha mwancina naka phukaapa mi nenna nna.
40 Ntthu hinoniina, nawiraana ni hi.
41 Ntthu novahani ikoopu yo maasi wiira mmurye nlattu wokhala owiitthuca awe Kristu, khweeli, kinawuhimeryani, khankela ahalelaka itthuvo awe mena vakani.
Cookosiha
Mt 18.6-9; Lk 17.1-2
42 Ntthu nohala unkosiha mmoca mwaasinamwane ala ankikupali Mi, fatari atthukeleliye nsiko mmo nsilo noosileliya ni avonyeriye mpaharini.
43 Ntata naa nookosihaka, uthikile. Unareera ukela wokumini ni ntata noopahuwa, wahohiyana ukhalana matata oomeli ni urwaa umooroni oohinttiphyaa.
44 Wonwo uhinkhwa asunku, ni mooro khunttiphyaa.
45 Nnya naa nookosihaka, uthikile. Unareera ukela wokumini unapahuwile, wahohiyana ukhalana oomeli uvonyeriyaka umooroni.
46 Wonwo uhinkhwa asunku, ni mooro khunttiphyaa.
47 Ni niitho naa nookosihaka, uphele. Unareera ukela umweneni wa Nluku ni niitho nimoca, wahohiyana ukhalana oomeli uvonyeriyaka umooroni.
48 Wonwo uhinkhwa asunku, ni mooro khunttiphyaa.
49 Phimaana khula ntthu naahala ulukiya ni mooro.
50 Maakha phi itthu yooreera; nanso yathatuwaka ooririya, ammolukiya ni isiyani? Nkhalaneke maakha mwanyu ni mweetteke ni mpuha ntthu ni nkhwawe.