ƗMbombo zya Bhasundikwa bha Yeesu
Ʉwandɨlo
Umusimbi ʉwa shitaabu ishi áamɨle wu Luuka, we ásimbile ni shitaabu ɨsha Luuka. Mu shitaabu ishi akʉpanga kʉtɨ, uYeesu we anyamvʉlwa kʉbhala kʉmwanya, abhalandati bhaakwe bhakhanda kʉlʉmbɨɨlɨla iNtumi iNyinza ku Bhayahuudi abha mʉ nsɨ yaabho. ULuuka akʉpanga she abhalandati bhonti kʉwandɨlo bhámʉposheleeye uMupepu uMufinjile, na she uMupepu wʉnʉʉyo akhajendeelela kʉbhalongola na kʉbhagomwa abheene peeka na bhalongozi bhaabho, mʉ mbombo yaabho ɨya kʉlʉmbɨɨlɨla intumi ɨya Yeesu.
Mʉ mʉlyango ʉwa 1-12 uLuuka akʉpanga zye umusundikwa uPeeteli ábhombile, na zye zyáfumiiye ku Bhakilisiti abha mu Yelusaleemu. Khabhɨlɨ uMupepu uMufinjile she ábhavwizye nhaani kʉmanya kʉtɨ ʉMʉlʉngʉ akwanza iNtumi iNyinza ɨya Yeesu yɨlʉmbɨɨlɨlwe kʉ bhantʉ abhɨ nsɨ zyonti. Intumi yɨnɨɨyo te ya Bhayahuudi bheene. Khabhɨlɨ mʉ mʉlyango ʉwa 13-28, uLuuka akʉpanga she uMupepu uMufinjile ámulongoziizye umusundikwa ʉPaʉlo kʉbhala kʉbhalʉmbɨɨlɨla iNtumi iNyinza ɨmbalɨ inyinji ɨzya Asiya na kʉ Wʉlaaya, na kʉmalɨlɨshɨzya mʉ nhaaya ɨya ku Luumi. Mu shitaabu ishi ásimbile ɨnongwa zimo zye umusundikwa ʉPaʉlo álʉmbɨlɨɨye. Zɨnɨɨzyo zɨkʉtwavwa ɨtwe kʉmanya she bhálʉmbɨlɨɨye iNtumi iNyinza ɨya Yeesu kʉ bhantʉ abha vɨkholo nɨ vɨkholo, na zye zyábhaajile we bhakʉlʉmbɨɨlɨla.
| Zye zɨlɨ mu shitaabu ishi | Ʉmʉlyango |
| Ʉwandɨlo ʉwa shɨbhanza sha Mʉlʉngʉ | 1:1-5:42 |
| Amayɨmba ga Bhakilisiti we bhakʉlʉmbɨɨlɨla iNtumi iNyinza | 6:1-9:31 |
| Ɨmbombo ya Peeteli | 9:32-12:25 |
| Kʉshʉʉla kwa Paʉlo ʉlwa kwanda kʉbhala kʉlʉmbɨɨlɨla | 13:1-14:28 |
| Ʉlʉbhʉngaano ʉlwa ku Yelusaleemu | 15:1-41 |
| Kʉshʉʉla kwa Paʉlo ʉlwa wʉbhɨlɨ kʉbhala kʉlʉmbɨɨlɨla | 16:1-18:22 |
| Kʉshʉʉla kwa Paʉlo ʉlwa wʉtatʉ kʉbhala kʉlʉmbɨɨlɨla | 18:23-21:14 |
| Kʉlemwa ʉPaʉlo na kʉshʉʉla kʉbhala ku Luumi | 21:15-28:31 |
1
1 Nholo waanɨ mʉ lwɨtɨkho Seofiilo, mu shitaabu shaanɨ shiila ɨsha kwanda, násimbile mʉmwo she uYeesu akhabhombaga, na she akhamanyɨzyaga, kufuma kʉwandɨlo
2 kufishila isiku lye akhanyamvʉlwa kʉbhala kʉmwanya. We ashɨɨlɨ kʉbhalekha abhasundikwa bhaakwe bhe ábhasebhile, ábhalajiziizye kʉshɨlɨla kwa Mupepu uMufinjile she bhatɨbhombaje ɨmbombo.
3 Kʉ khabhalɨlo akhi nsiku amashumi gani kufuma pe ázyushile mu wufwe, akhabhaloleshelaga abhasundikwa bhaala akhinji bhʉʉlo, akhabhalangaga apazelu kʉtɨ ʉweene mwumi. Khabhɨlɨ akhabhamanyɨzyaga ɨnongwa ɨzya wʉmwene wa Mʉlʉngʉ.
4 Isiku limo, we uYeesu akulya peeka na bhasundikwa, akhabhalajɨzya akhatɨ, “Mʉtasogolaje mʉ nhaaya ɨya mu Yelusaleemu, lyoli mʉgʉʉlɨle munuumu, paka mufishile akhabhalɨlo khe mʉkhayɨposheela ɨshɨkʉnjɨlwa sha Mupepu uMufinjile. Shɨnɨɨsho she shɨkʉnjɨlwa shiila she ʉTaata ʉMʉlʉngʉ álajile, ʉmʉlajɨ wʉnʉʉwo we ɨne ɨnhabhabhʉzyaga.
5 UYookhani akhabhozyaga abhantʉ ku minzi, ɨleelo kʉ khabhalɨlo khashe bhʉʉlo khe khakwɨnza, ɨmwe mʉtɨyoozelwe kwa Mupepu uMufinjile.”
UYeesu akʉnyamvʉlwa kʉbhala kʉmwanya
6 We abhasundikwa bha Yeesu bhabhungaanile peeka na wʉʉyo, bhakhamʉbhʉzɨɨlɨzya bhakhatɨ, “Bhʉlɨ, Mwene, akhabhalɨlo ɨkha khe ʉtɨbhagalʉshɨzye aBhaisilaeli ʉwʉmwene waabho?”
7 Akhabhaamʉla akhatɨ, “Insiku na khabhalɨlo akha kʉbhombekha zɨnɨɨzyo, te mbombo yiinyu kʉmanya. ɄTaata we avibhiishile kʉ makha gaakwe amapɨtɨ.
8 Ɨleelo mʉtɨposheele amakha we uMupepu uMufinjile ayɨnza kukwinyu, ɨmwe mukhayimfumwizyaga uwukeeti mu Yelusaleemu, mʉ mʉkoa wonti ʉwa mu Yudeeya, na mu Samaliya, paka kufishila mwe ɨnsɨ yɨpeleleeye.”
9 We uYeesu aamala kʉbhabhʉʉzya shɨnɨɨsho abhasundikwa bhaakwe, nalʉbhɨlo bhʉʉlo akhanyamvʉlwa pamiiso gaabho kʉbhala kʉmwanya. Ɨbhɨngo likhamugubishila, bhatakhamʉlola winza.
10 Kʉ khabhalɨlo khanaakho we bhakwenya kʉmwanya we akʉsogola, nalʉbhɨlo bhʉʉlo bhakhɨmɨɨlɨla abhakhabhɨzya bhabhɨlɨ papɨɨpɨ nabho, bhe bhákwatile amenda amazelu.
11 Bhakhatɨ, “Mʉbhasakhaala ɨmwe mʉbha mʉ Galɨlaaya, khooni khe mwɨmɨlɨɨye ɨpa mʉkwenya kʉmwanya? UYeesu ʉnʉ we anyamvʉlwa kukwinyu kʉbhala kʉmwanya, anza she mwamʉlola asogola, shɨnɨɨsho she akhayɨgalʉkha winza.”
Bhakʉmʉpwanɨzya uMasiiya pa Yʉʉda
12 Pe abhasundikwa bha Yeesu bhakhasogola pɨ gamba lye bhakhatɨnjɨ ɨlya Mizeituni, bhakhagalʉkha mu Yelusaleemu, ye yáamɨle uwutali uwi kilomiita yeeka kufuma pɨ gamba lɨnɨɨlyo.
13 We bhinjila mʉ nhaaya, bhakhabhala mu lupitu ʉlwa pamwanya mu nyumba ɨnjelenhanye, mwe bhakhakhomaanaga. Abhasundikwa bhanaabho bhe bha bhɨɨbha: uPeeteli, uYookhani, ʉYaakobo, ʉAndeleeya, uFilipo, uToomasi, ʉBatolomaayo, uMataayi, ʉYaakobo ʉmwana wa Alʉfeeyo, uSiimoni ʉmʉlwɨla nsɨ yaakwe, nʉ Yʉʉda ʉmwana wa Yaakobo.
14 Bhonti bhanaabho bhakhabhʉngaanaga kʉmʉlaabha ʉMʉlʉngʉ, peeka nu Maliya unyina wa Yeesu, abhantanda abhanjɨ, na bhansi bha Yeesu.
15 Isiku limo, abhantʉ bhe bhámwitishile uYeesu bhábhungaanile peeka, pamu bháfishiiye abhantʉ imia yeeka na mashumi gabhɨlɨ (120). Pe uPeeteli akhɨmɨɨlɨla pakaasi yaabho,
16 akhabhabhʉʉzya akhatɨ, “Ɨmwe bhanholo bhɨɨtʉ, zye zyásimbiilwe mu Wusimbe uWufinjile kʉ zya Yʉʉda, zyaakhondeeye kʉbhombekha. Zɨnɨɨzyo zye uMupepu uMufinjile álonjile kwi lomu lya maama wɨɨtʉ uDaudi zibhombeshile kʉtɨ, ʉYʉʉda we aabhalongooye abhantʉ bhaala bhe bhaamulemile uYeesu,
17 she poope aamɨle nɨɨtwe tubhasundikwa, twabhombaga ɨmbombo peeka nawo.”
18 We aposheela ɨnhela ɨzya mabheko, akhakalɨla ishiizi. Mu shiizi shɨnɨɨsho mwe akhagwa shikupama, ʉlwanda lʉkhatʉlʉkha, uwula wonti wʉkhasaata paasɨ.
19 Izwi lɨnɨɨlyo lɨkhamanyɨkha mʉ bhantʉ bhonti bhe bhakwɨkhala mu Yelusaleemu. Ishiizi shiila bhakhaashipa ɨtaawa ɨlya Hakelidama mʉ ndongo yaabho kwe kʉtɨ, iShiizi ɨshɨ Bhanda.
20 UPeeteli akhajendeelela kʉlonga kʉtɨ, “Zɨnɨɨzyo zye zisimbiilwe mu shitaabu ɨsha Zabuuli kʉtɨ,
‘Inyumba yaakwe yɨtɨzwɨme,
te asyale umuntu nʉʉmo mʉmwo winza.’
Khabhɨlɨ yisimbiilwe kʉtɨ,
‘Ɨmbombo yaakwe ɨya kʉlongozya
bhaamupe umuntu uwunji.’
21-22 Kʉnongwa yɨnɨɨyo, yɨkʉtɨ abhe ʉmʉsakhaala uwunji weeka we atɨjendaje peeka nɨɨtwe mʉ mbombo, afumwaje uwukeeti kʉtɨ ʉMwene wɨɨtʉ uYeesu azyushile mʉ bhafwe. Umuntu ʉyo, akwanzɨwa abhe weeka mʉ bhaala bhe bháamɨle nɨɨtwe mʉ khabhalɨlo khonti khe tʉkhamʉlandataga ʉMwene wɨɨtʉ uYeesu, we akʉshɨla mʉ bhantʉ, kufuma akhabhalɨlo khe uYookhani akhozyaga abhantʉ, kufishila isiku liila lye uYeesu akhanyamvʉlwa kʉkwɨtʉ kʉbhala kʉmwanya.”
23 Pe abhantʉ bhe bhámwitishile uYeesu, bhakhatekha amataawa aga bhasakhaala bhabhɨlɨ. Ʉmo áamɨle wu Yoosefu we bhakhatɨnjɨ ʉBalɨsaaba, awe uYusito, nʉ wa wʉbhɨlɨ, bhakhatɨnjɨ uMasiiya.
24 Pe bhakhamʉlaabha ʉMʉlʉngʉ bhakhatɨ, “Ɨwe Mwene, umanyile zye zɨlɨ mukaasi mʉ mooyo ga bhantʉ bhonti. Ishi, ʉtʉlanje ʉla we umusebhile mʉ bhɨɨbha,
25 ɨnga apwanɨle pa mbombo ɨya wusundikwa ye ʉYʉʉda áyileshile, akhafwa, akhabhala pe pamʉkhondeeye wʉʉyo.”
26 Pe bhakhabhakhomela ɨkʉʉla abhantʉ bhabhɨlɨ bhaala, ɨkʉʉla yɨkhamʉgwɨla uMasiiya, we akhabha peeka na bhasundikwa abhanjɨ bhaala ishumi na weeka.