☰ Luuka 1
INtumi iNyinza ɨya Yeesu Kilisiti
anza she yisimbiilwe nu
Luuka
Ʉwandɨlo
Ishitaabu ishi shásimbiilwe nu Luuka we ásimbile ishitaabu ɨshɨ Mbombo zya Bhasundikwa. Atáamɨle Muyahuudi, ɨleelo áamɨle Muyunaani ʉmʉbhaazye we áamɨle Mukilisiti. Akhabhalɨlo khamu akhajendaga peeka nʉ Paʉlo kʉlʉmbɨɨlɨla iNtumi iNyinza. Mu shitaabu ishi, uLuuka akʉpanga ɨmbombo zya Yeesu kʉ lʉbhaatɨkho ulwinza, ɨnga abhantʉ bhe te Bhayahuudi bhamanye.
Mu shitaabu ishi zɨlɨɨpo ɨnongwa inyinji zye zitasimbiilwe mu vitaabu ɨvwamwabho ɨvwa mu Lufingo uLupwa, anza kʉpaapwa kwa Yookhani uMwozyi, kʉpaapwa kwa Yeesu ni ntumi zyakwe ɨzya kʉ waana, na kʉlʉmbɨɨlɨla kwa Yookhani uMwozyi. Khabhɨlɨ akʉlolesya she ʉlʉgano lwa Mʉlʉngʉ lʉlɨ kʉ bhantʉ abha vɨkholo nɨ vɨkholo. UYeesu álolesiizye ʉlʉgano lʉnʉʉlwo kwɨ dala ɨlya kʉbhabhʉʉzya abhantʉ kʉ vɨkholanyo, anza khapango akha Musamaliya umwinza (mʉ mʉlyango ʉwa 10) nʉ mwana we áteejile (mʉ mʉlyango ʉwa 15), na kwɨkhala akhinza peeka nʉ mʉsonshezya nsonho we ávitiliilwe nhaani (mʉ mʉlyango ʉwa 19), nʉ mʉlajɨ ʉwa kuumupa uwuumi ʉwa wiila na wiila ʉmʉbhomba mbiibhi we ákhomeliilwe pa shɨkhobhenhanyo (mʉ mʉlyango ʉwa 23).
Zye zɨlɨ mu shitaabu ishi Ʉmʉlyango
Amazwi aga kwandɨla 1:1-4
Kʉpaapwa kwa Yeesu nʉ waana waakwe 1:5-2:52
Ɨmbombo ya Yookhani uMwozyi na kʉlɨngwa kwa Yeesu 3:1-4:13
UYeesu akʉmanyɨzya ɨzya wʉmwene wa Mʉlʉngʉ na kʉbhomba ɨvɨlolesyo mʉ Galɨlaaya 4:14-9:50
UYeesu akʉmanyɨzya inyinji kʉ zya bhe bhakʉmʉlandata, we alɨ mwɨ dala kʉbhala ku Yelusaleemu 9:51-19:27
UYeesu akwinjila mu Yelusaleemu na kʉmanyɨzya ku zyi nsiku ɨzya kʉwʉmalɨlɨshɨlo 19:28-21:38
Kufwa kwa Yeesu 22:1-23:56
Kʉzyʉkha kwa Yeesu 24:1-53
1
Amazwi aga kwanda
1 Kʉkwakho wa lushindikho Seofiilo:
Abhantʉ abhinji bhasimbile ɨnongwa zya Yeesu Kilisiti anza she zyábhombeshile kʉkwɨtʉ. 2 Bhasimbile ɨnongwa ziniizi anza she bhátubhuziizye bhaala bhe bhálolile na miiso gaabho na kʉzɨlʉmbɨɨlɨla kufuma pawandɨlo waakwe. 3 Ishi nɨɨne naalola kʉtɨ khinza kukusimbila ziniizi zyonti mʉ lʉbhaatɨkho, kʉnongwa ye insimishiziizye akhinza uwanalyoli ʉwɨ nongwa zya Yeesu kufuma kʉwandɨlo, 4 ɨnga ʉmanye uwanalyoli ʉwɨ nongwa zye bhakubhuziizye.
Uwukuwi ʉwa kʉpaapwa uYookhani uMwozyi
5 Mu nsiku zye uHeloodi áamɨle wʉ mwene mʉ nsɨ ɨya Yudeeya, álɨɨpo umupuutili* ʉmo we bhakhatɨnjɨ uZakaliya, kufuma mʉ shɨpʉga ɨsha shipuutili ɨsha Abiya. Ʉmʉshɨ waakwe bhakhatɨnjɨ uElisabeeti, áfumile mʉ shɨkholo ɨsha shipuutili ɨsha Aaloni.† 6 UZakaliya nu Elisabeeti bháamɨle bhagolosu pamiiso ga Mʉlʉngʉ, bhakhalandataga akhinza ɨndajɨzyo zyonti ɨzya Mʉlʉngʉ. 7 Bhatáamɨle na bhaana, kʉnongwa ye uElisabeeti áamɨle mʉlʉʉjɨ, khabhɨlɨ bháamɨle bhagoosi.
8-9 Kwámɨle nu wutengulizu ʉwa kʉbhomba ɨmbombo aPafinjile mu Nyumba iMfinjile.‡ Mu wutengulizu wʉnʉʉwo, kháamɨle khabhalɨlo kha shɨpʉga sha Abiya. Isiku limo, abhapuutili abha shɨpʉga shɨnɨɨsho, anza she yáamɨle mwata yaabho, bhakhamʉkhomela ɨkʉʉla§ uZakaliya kwinjila aPafinjile panaapo apa Mʉlʉngʉ, ɨnga atukulushizye pa shɨgemo ivintu vwe vikununshiilila umununsi umwinza. 10 Akhabhalɨlo khe áamɨle mukaasi akutukulushizya, abhantʉ abhinji bháamɨle mwi linga ilyi Nyumba iMfinjile bhakhapuutaga.
11 Pe ʉkhabhɨzya wa Mwene akhamʉloleshela uZakaliya. Ʉkhabhɨzya wʉnʉʉyo áyɨmɨlɨɨye kʉmbalɨ ɨya kʉndɨɨlo ɨya shɨgemo shiila. 12 UZakaliya we amʉlola ʉkhabhɨzya, ɨlyoga lɨkhamʉlema nhaani.
13 Pe ʉkhabhɨzya ʉla akhamʉbhʉʉzya akhatɨ, “Ʉtogopaje Zakaliya, kʉnongwa ye ʉMʉlʉngʉ ayimvwizye impuuto zyakho, ʉmʉshɨ waakho uElisabeeti atɨkʉpaapɨle ʉmwana, ʉmwana wʉnʉʉyo ukhayiimupa ɨtaawa abhe wu Yookhani. 14 Ɨpo pe ʉkhayɨbha nʉ lʉseshelo na khaluluuto, khabhɨlɨ abhantʉ abhinji bhakhayɨbha nʉ lʉseshelo we apaapwa, 15 kʉnongwa ye akhayɨbha nʉ wʉpɨtɨ kufuma kwa Mwene. Ʉmwana wʉnʉʉyo te akhamwelaje akhantʉ khokhonti khe khakʉkhola, lyoli amakha ga Mupepu uMufinjile gakhayɨbha nawo kufuma akhabhalɨlo khe alɨ mʉ lwanda mwa nyina waakwe. 16 Akhayɨbhagalʉsya aBhaisilaeli abhinji kwa Mwene ʉMʉlʉngʉ waabho. 17 Wʉnʉʉyo akhayɨmʉlongolela ʉMwene mʉ makha nu mupepu anzu mukuwi uEliya.* Akhayɨbhɨmvwanyaaga abhapaafi na bhaana bhaabho, khabhɨlɨ akhayɨbhagalʉsyaga bhe bhatakumutinikha ʉMʉlʉngʉ mʉ njeele ɨya wugolosu, na kʉbhalɨngaanya abhantʉ kʉmʉposheela ʉMwene.”
18 Pe uZakaliya akhamʉbhʉʉzya ʉkhabhɨzya akhatɨ, “Bhʉlɨ, khantʉ khooni khe khanganaavwa kʉmanya kʉtɨ amazwi ganaaga ga wanalyoli? Kʉnongwa ye ɨne nʉ mʉshɨ waanɨ insiku zituushile.” 19 We alonga lɨnɨɨlyo, ʉkhabhɨzya akhamʉbhʉʉzya akhatɨ, “Ɨne ne Gabulieli, ɨnkwɨmɨɨlɨla pamiiso ga Mʉlʉngʉ, ne ansonteleziizye kʉkʉbhʉʉzya ɨwe intumi inyinza ziniizi. 20 Ishi ʉtɨbhe we shinuunu, kʉnongwa ye ʉtɨɨtɨkha zye nakʉbhʉʉzya. Te ʉlongaje paka isiku lye zikhayifumila ziniizi zye nakʉbhʉʉzya, we akhabhalɨlo khaakwe khaafikha!”
21 Akhabhalɨlo khanaakho, abhantʉ bhaala bhe bháamɨle mwi linga, bhakhamʉgʉlɨlaga uZakaliya kumo bhakuswiga, kʉnongwa ye ákhaabhile nhaani aPafinjile mu Nyumba iMfinjile. 22 We aafuma, akhapootwa kʉlonga nabho, pe abheene bhakhamanya kʉtɨ, alolile amayele ge gafumiiye aPafinjile. Ʉweene akhalolesyaga nɨ nyoobhe zye akwanza kʉlonga, akhajendeelela kʉbha wu shinuunu. 23 We insiku zyakwe zyasila ɨzya kʉbhomba ɨmbombo ɨya shipuutili, akhagalʉkha kʉkhaaya.
24 Pɨlongolela, ʉmʉshɨ waakwe uElisabeeti akhabha pa wumwamu, akhʉʉbha mu nyumba ameezi gasaanʉ. Akhayɨlonjelaga wʉʉyo akhatɨnjɨ, 25 “Liniili lye ʉMwene ambombeeye ɨne, andolile na kʉneefwezya insoni pamiiso ga bhantʉ.”
Uwukuwi ʉwa kʉpaapwa uKilisiti
26 We waafikha umwezi ʉwa mʉtanda ʉwa wumwamu wa Elisabeeti, ʉMʉlʉngʉ akhamʉsonteelezya ʉkhabhɨzya uGabulieli mʉ khakhaaya akha mu Naazaleti, khe kháamɨle mʉ mʉkoa ʉwa mʉ Galɨlaaya. 27 Akhabhala kwa mʉlɨndʉ we bhakhatɨnjɨ uMaliya, we ázinjiliilwe nu Yoosefu ʉwa mʉ shɨkholo sha mwene uDaudi.† 28 Ʉkhabhɨzya we aafikha kwa Maliya akhatɨ, “Ɨnkʉkʉlamʉkha ɨwe we usayiilwe, ʉMwene alɨ nɨɨwe.”
29 UMaliya, we ayɨmvwa amazwi ganaago aga khabhɨzya, ʉmwoyo wʉkheleela nhaani, akhayɨbhʉzɨɨlɨzya akhatɨ, “Ɨndamʉkho ɨnɨ, kwe kʉtɨ bhʉlɨ?” 30 Pe ʉkhabhɨzya akhatɨ, “Maliya, ʉtogopaje, kʉnongwa ye ʉMʉlʉngʉ akupiiye uwiila. 31 Yeenya, ʉtɨbhe pa wumwamu, ʉtɨpaape ʉmwana ʉmʉsakhaala, ukhayimwita ɨtaawa lyakwe akhayɨbha wu Yeesu. 32 Ʉmwana wʉnʉʉyo akhayɨbha mʉpɨtɨ, khabhɨlɨ ɨtaawa lyakwe bhakhayɨtɨnjɨ Mwana wa Mʉlʉngʉ ʉMʉpɨtɨ ʉwa kʉmwanya. ɄMwene ʉMʉlʉngʉ akhayiimupa amakha aga shɨmwene, anza she áamɨle ʉmaama waakwe ʉmwene uDaudi. 33 Khabhɨlɨ akhayɨtabhaalaga aBhaisilaeli‡ insiku zyonti, ʉwʉmwene waakwe te wʉkhabhe nu wusililishilo.”
34 UMaliya akhamʉbhʉzɨɨlɨzya ʉkhabhɨzya akhatɨ, “Ɨne ɨntalɨ nʉ mʉlʉme, ishi liniili lɨtɨbhe bhʉlɨɨbhʉlɨ?” 35 Ʉkhabhɨzya akhamwamʉla akhatɨ, “UMupepu uMufinjile atɨkwɨnzɨle, na makha ga Mʉlʉngʉ ʉMʉpɨtɨ ʉwa kʉmwanya gatikugubishile anzɨ shɨnzyʉngʉʉlɨ. Pe ʉmwana we ʉkhayɨpaapa akhayɨbha mufinjile, we bhakhayɨtɨnjɨ ʉMwana wa Mʉlʉngʉ.§ 36 Tejeelezya! Woope ʉnholo waakho uElisabeeti alɨ pa wumwamu, she poope mugoosi. Khabhɨlɨ uwumwamu waakwe wa meezi ʉmʉtanda, we bhatɨnjɨ mʉlʉʉjɨ! 37 Kʉnongwa ye khatalɨɨpo naakhamu khe khakʉmʉtola ʉMʉlʉngʉ.” 38 Pe uMaliya akhatɨ, “Ɨne ne mubhombi wa Mwene, zɨbhe shɨnɨɨsho kʉkwanɨ anza she walonga.” Pe ʉkhabhɨzya akhasogola.
UMaliya akʉbhala kʉmʉlamʉkha uElisabeeti
39 We zyashɨla insiku nyishe, uMaliya akhasogola akhalambiine, akhabhala mʉ nhaaya yimo ye yáamɨle mʉ nsɨ ɨya mʉ magamba aga mu Yudeeya. 40 Kukuula akhinjila mu nyumba ya Zakaliya, akhamʉlamʉkha uElisabeeti. 41 UElisabeeti we ayɨmvwa ɨndamʉkho ya Maliya, ʉmwana akhashimwa mukaasi mʉ lwanda lwakwe. Pe uMupepu uMufinjile akhamʉlongola uElisabeeti, 42 akhadandɨzya kʉlonga akhatɨ, “Usayiilwe ɨwe kʉshɨla abhantanda bhonti, khabhɨlɨ asayiilwe nʉ mwana we ʉtɨpaape. 43 Ɨne ne naanu ne unyina wa Mwene waanɨ ayinzile kʉkwanɨ? 44 We nɨmvwa izi lyakho, ʉmwana mʉ lwanda lwanɨ aashimwa kʉ lʉseshelo. 45 Usayiilwe ɨwe we uyitishile kʉtɨ zɨnɨɨzyo zye ʉMwene akubhuziizye, zɨtɨbhombeshe.”
Ʉlwɨmbo lwa Maliya ʉlwa kʉmʉpaala ʉMwene
46 Pe uMaliya akhatɨ,
“Ɨnkʉmʉpaala ʉMwene,
kʉ mwoyo waanɨ wonti.
47 Ʉmwoyo waanɨ wʉkʉmʉseshela
ʉMʉlʉngʉ uMuposhi waanɨ,
48 kʉnongwa ye anavwizye mʉ wʉtolwe
ɨne numubhombi waakwe.
Yeenya, kufuma ishi abhantʉ abha vipaafi vwonti,
bhatɨtɨnjɨ ɨne ne mʉsaywa.
49 ɄMwene ʉwa makha gonti ambombeeye ɨzya kuswijizya,
ɨtaawa lyakwe lifinjile.
50 Ishisa shaakwe sha vipaafi vwonti,
ku bhonti bhe bhakumupuuta.
51 Ɨnyoobhe yaakwe ya makha,
yibhombile ɨmbombo ɨmpɨtɨ.
Bhe bhalɨ na mabaado mʉ mooyo gaabho, abhasasiizye.
52 Abhapɨtɨ abhefwizye mʉ matengo gaabho aga wʉpɨtɨ,
na kʉbhazʉvwa abhatolwe.
53 Bhe bhalɨ nɨ nzala, abhapiiye ivintu ivwinza,
ɨleelo abhɨ shʉʉma ishinji
abhabhinjile ɨnyoobhe nyeene.
54 Abhavwizye abhabhombi bhaakwe aBhaisilaeli,
we akʉkʉmbʉkha ulufingo lwakwe ʉlwa kʉbhalolela ishisa,
55 anza she álonjile kwa maama wɨɨtʉ,
uAbulahaamu nɨ shɨkholo shaakwe shonti wiila na wiila.”
56 UMaliya akhɨɨkhala nu Elisabeeti pamu ameezi gatatʉ, pɨlongolela, akhagalʉkha kʉkwabho.
Kʉpaapwa uYookhani uMwozyi
57 We khaafikha akhabhalɨlo akha kʉpaapa, uElisabeeti akhapaapa ʉmwana ʉmʉsakhaala. 58 Abhapalamani na bhanholo bhaakwe we bhɨmvwa kʉtɨ ʉMwene amʉloleeye ishisa nhaani, bhakhaseshela peeka nawo.
59 Isiku ɨlya naane kufuma apaapwe ʉmwana, bhakhɨnza kumutahiili.* Bhakhanzaga kuumupa ʉmwana ɨtaawa lya yise waakwe, uZakaliya. 60 Ɨleelo unyina wa mwana akhabhabhʉʉzya akhatɨ, “Ndaali, ɨtaawa lyakwe atɨbhe wu Yookhani.” 61 Abheene bhakhamwamʉla bhakhatɨ, “Mʉ shɨkholo shaakho atalɨɨpo umuntu we alɨ nɨ taawa lɨnɨɨlyo.” 62 Pe bhakhamʉbhʉzɨɨlɨzya uyise waakwe kʉtɨ akwanza kuumupa ʉmwana ɨtaawa abhe wu naanu. 63 UZakaliya akhalaabha ɨshɨbaabho ɨsha kusimba, akhasimba akhatɨ, “Ɨtaawa lyakwe atɨbhe wu Yookhani.” Abhantʉ bhonti bhakhaswiga. 64 Panaapo bhʉʉlo ulumili lwakwe lukhiigukha, akhanda kʉlonga na kʉmʉpaala ʉMʉlʉngʉ. 65 Pe abhapalamani bhonti abha Zakaliya, ɨlyoga lɨkhabhalema. Ɨnongwa ziniizi zɨkhasaata mʉ nsɨ yonti ɨya mʉ magamba aga mu Yudeeya. 66 Abhantʉ bhonti bhe bhimvwizye, bhakhasɨɨbhaga mʉ mooyo gaabho kʉtɨ, “Ʉmwana wʉnʉʉnʉ akhayɨbha anza bhʉlɨɨbhʉlɨ?” Bhakhasɨɨbhaga shɨnɨɨsho, kʉnongwa ye bhámanyile kʉtɨ ʉMwene alɨ peeka nawo.
Ʉlwɨmbo lwa Zakaliya ʉlwa kʉmʉpaala ʉMwene
67 Pe amakha ga Mupepu uMufinjile gakhamwɨnzɨla uZakaliya, uyise wa mwana, akhanda kʉkʉwa akhatɨ,
68 “Apalwaje ʉMwene ʉMʉlʉngʉ ʉwa Bhaisilaeli,
kʉnongwa ye ayinzile na kʉtʉʉla abhantʉ bhaakwe.
69 Atupiiye uMuposhi ʉwa makha,†
kufuma mʉ shɨkholo sha mubhombi waakwe uDaudi.
70 Anza she álonjile kufuma ɨmaandɨ
kʉshɨlɨla ku bhakuwi bhaakwe abhafinjile,
71 kʉtɨ akhayɨtʉtʉʉla kʉ bhalʉgʉ bhɨɨtʉ,
na kufuma mʉ nyoobhe zya bhantʉ bhonti
bhe bhatupatile.
72 ɄMʉlʉngʉ atʉloleeye ishisa,
anza she álapile kʉ bhamaama bhɨɨtʉ,
akʉkʉmbʉkha ulufingo‡ lwakwe ulufinjile
insiku zyonti.§
73 Anza she álapile kwa maama wɨɨtʉ uAbulahaamu,
74 kʉtɨ akhayɨtwavwa kʉtʉtʉʉla
mʉ nyoobhe zya bhalʉgʉ bhɨɨtʉ,
tʉmʉbhombelaje ʉweene sita lyoga,
75 mu wufinjile na mu wugolosu
mu nsiku zyonti ɨzya wuumi wɨɨtʉ.
76 Ishi ɨwe mwana waanɨ,
bhatɨkʉtekhaje kʉtɨ mukuwi wa Mʉlʉngʉ ʉMʉpɨtɨ
ʉwa kʉmwanya,
kʉnongwa ye ʉtɨmʉlongolele ʉMwene,
ɨnga ʉmʉgombele ʉweene ɨdala,
77 kʉbhabhʉʉzya abhantʉ bhaakwe kʉtɨ,
bhakʉwaaga uwuposhi
kwɨ dala ɨlya kʉtʉʉyɨlwa imbiibhi zyabho.
78 Kʉnongwa ye ʉMʉlʉngʉ wɨɨtʉ alɨ ni shisa kʉkwɨtʉ,
ʉlʉkhozyo lwakwe kufuma kʉmwanya
lwandile kʉtʉlamɨla,
79 twenti twe tʉlɨ mu khiisi akha wufwe,*
na kʉtʉlongola mwɨ dala ɨlya wutengaanu.”
80 Pe uYookhani akhajendeelela kʉkʉla, na kwonjela kʉbha nu wudandamazu mʉ mwoyo. We aakʉla, áyɨkhaaye mu shilozu paka akhabhalɨlo khe akhalolekha ku Bhaisilaeli.
* 1:5 Umupuutili Bhaazya abhapuutili mu Wilulanyo ʉwa mazwi amajeni. † 1:5 UAaloni áamɨle mupuutili mʉpɨtɨ ʉwa kwanda. Bhaazya Kufuma 28:1-3. ‡ 1:8-9 INyumba iMfinjile Bhaazya mu Wilulanyo ʉwa mazwi amajeni. § 1:8-9 Bhakhamʉkhomela ɨkʉʉla ABhayahuudi bhakhasimbaga amataawa ga bhantʉ mʉ mawe amansi, na kʉbhɨɨkha gonti mʉ shɨkoopa. Bhakhayinzanyaaga paka iwe lyeka lifume na kʉlenda paasɨ. Umuntu we iwe lye lɨlɨ nɨ taawa lyakwe lyatala kufuma, we bhakhatɨnjɨ aashɨla. * 1:17 Umukuwi kwe kʉtɨ umuntu we akwilulila abhantʉ ɨnongwa zye zikufuma kwa Mʉlʉngʉ. UEliya ABhayahuudi bhakhasʉbhɨlaga kʉtɨ atɨyɨnze winza umukuwi uEliya, kʉlɨngaanya kwɨnza kwa Kilisiti. Bhaazya Malaaki 4:5-6. † 1:27 UDaudi Bhaazya mu Wilulanyo ʉwa mazwi amajeni. ‡ 1:33 ABhaisilaeli Mʉ ndongo ɨya Shiyunaani yɨkʉtɨ inyumba ya Yaakobo. § 1:35 ɄMwana wa Mʉlʉngʉ Bhaazya mu Wilulanyo ʉwa mazwi amajeni. * 1:59 Kumutahiili Bhaazya kutahiili mu Wilulanyo ʉwa mazwi amajeni. † 1:69 UMuposhi ʉwa makha Mu Shiyunaani yisimbiilwe ʉlʉpembe ʉlwa wuposhi. Mu Wusimbe uWufinjile ʉlʉpembe ʉlwa shɨkhanʉ shɨkholanyo sha muntu ʉwa makha aminji. ‡ 1:72 Ulufingo Bhaazya mu Wilulanyo ʉwa mazwi amajeni. § 1:72 Bhaazya Wandɨlo 17:7; Zabuuli 105:8; 106:45. * 1:79 Bhaazya Yeesaya 9:1-2.
☰