7
Abhantʉ bha Mʉlʉngʉ 144,000 bhe bhatitiilwe umunhuuli
1 We gaashɨla ganaago, ɨnhalola abhakhabhɨzya bhani bhɨmɨlɨɨye mʉmbalɨ zini ɨzyɨ nsɨ. Abhakhabhɨzya bhanaabho bhakhadindaga impepu kufuma ɨmbalɨ zini ɨzya mʉ nsɨ kʉtɨ yitakhavugule mʉ nsɨ, awe mwa sʉmbɨ, awe mwi kwi lyolyonti.
2 Ɨnhalola ʉkhabhɨzya uwunji akʉzʉbha kufuma kuwutukulo, áamɨle nu munhuuli ʉwa Mʉlʉngʉ we mwumi. Akhalonga kwi zi ɨlya kʉdandɨzya akhabhabhʉʉzya bhanaabho abhakhabhɨzya bhani, bhe bháamɨle na makha aga kʉyɨnanganya ɨnsɨ nʉ sʉmbɨ,
3 akhatɨ, “Mʉtayɨnanganyaaje ɨnsɨ awe ʉsʉmbɨ awe amakwi, paka akhabhalɨlo khe tukhayibhatitizya umunhuuli abhabhombi bha Mʉlʉngʉ wɨɨtʉ pa monji ɨzya vweni vwabho.”
4 Pe ɨnhɨmvwa uwinji waabho bhe bhatitizye umunhuuli kufuma mʉ vɨkholo vwonti ɨvwa Bhaisilaeli, abhantʉ ielufu imia yeeka, amashumi gani na zini (144,000).
5 Abha shɨkholo sha Yʉʉda ielufu ishumi na zɨbhɨlɨ (12,000),
abha shɨkholo sha Lubeni ielufu ishumi na zɨbhɨlɨ (12,000),
abha shɨkholo sha Gaadi ielufu ishumi na zɨbhɨlɨ (12,000),
6 abha shɨkholo sha Asheli ielufu ishumi na zɨbhɨlɨ (12,000),
abha shɨkholo sha Nafutaali ielufu ishumi na zɨbhɨlɨ (12,000),
abha shɨkholo sha Manaasi ielufu ishumi na zɨbhɨlɨ (12,000),
7 abha shɨkholo sha Similyoni ielufu ishumi na zɨbhɨlɨ (12,000),
abha shɨkholo sha Laawi ielufu ishumi na zɨbhɨlɨ (12,000),
abha shɨkholo sha Isakaali ielufu ishumi na zɨbhɨlɨ (12,000),
8 abha shɨkholo sha Zabulooni ielufu ishumi na zɨbhɨlɨ (12,000),
abha shɨkholo sha Yoosefu ielufu ishumi na zɨbhɨlɨ (12,000),
khabhɨlɨ abha shɨkholo sha Benjamiini ielufu ishumi na zɨbhɨlɨ (12,000).
Ɨmpʉga ɨya bhantʉ abha mʉ nsɨ zyonti
9 We gaashɨla ganaago, ɨnhalola ɨmpʉga ɨmpɨtɨ nhaani ɨya bhantʉ bhe atalɨɨpo we angakhola kʉyɨbhaazya. Abhantʉ kufuma mʉ nsɨ zyonti nɨ vɨkholo vwonti na mu nyumba zyonti na mʉ ndongo zyonti, bhɨ́mɨlɨɨye pɨlongolela pɨ tengo ɨlya shɨmwene na pɨlongolela pa Nyaana yɨ Ngoole. Bhakwatile amenda amazelu, iwinza bhalemile amatʉndʉ aga matende.
10 Bhakhalonga kwi zi ɨlya kʉdandɨzya bhakhatɨ,
“Uwuposhi wukufuma kwa Mʉlʉngʉ wɨɨtʉ,
ʉweene we akwɨkhala mwɨ tengo lyakwe ɨlya shɨmwene,
na kʉ Nyaana yɨ Ngoole.”
11 Abhakhabhɨzya bhonti bhɨ́mɨlɨɨye ɨmbalɨ zyonti ɨzyɨ tengo ɨlya shɨmwene nɨ zya bhasongo nɨ zya vɨpelwa vini. Bhakhagwa shikupama pɨlongolela pɨ tengo ɨlya shɨmwene na kumupuuta ʉMʉlʉngʉ,
12 bhakhatɨ,
“Zɨbhe shɨnɨɨsho!
Ɨmpaalo nu wumwamu nɨ njeele,
khabhɨlɨ insalifwo nu lushindikho nu wutoli na makha,
vwa Mʉlʉngʉ wɨɨtʉ wiila na wiila.
Zɨbhe shɨnɨɨsho!”
13 Pe weeka mʉ bhasongo bhanaabho, akhambʉzɨɨlɨzya akhatɨ, “Abhantʉ ɨbha bhe bhakwatile amenda amazelu bha bhanaanu? Bhafumile kwoshi?”
14 Ɨnhamwamʉla ɨnhatɨ, “Mwene, ɨwe umanyile.” Pe woope akhatɨ, “Ɨbha bhantʉ, bhe bhafumile mʉ mayɨmba amapɨtɨ. Bhakhandile amenda gaabho kwɨ bhanda lyɨ Nyaana yɨ Ngoole na kʉbha mazelu.
15 Ye nongwa bhalɨ pɨlongolela pɨ tengo ɨlya shɨmwene,
pamiiso ga Mʉlʉngʉ.
Bhakʉmʉbhombela shawusiku na shamʉsanya
mu Nyumba yaakwe iMfinjile,
woope ʉMʉlʉngʉ we ayɨkhaaye pɨ tengo ɨlya shɨmwene
atɨbhe peeka nabho kʉbhalɨndɨɨlɨla.
16 Te bhakhaalole ɨnzala naalumo, awe ɨshʉʉmɨlwa,
khabhɨlɨ ɨzʉbha te lɨkhabhooshe, awe amafuku.
17 Kʉnongwa ye ɨNyaana yɨ Ngoole ye yɨlɨ kʉmwanya,
pɨ tengo ɨlya shɨmwene yikhayibhadiima.
Akhayɨbhatwala mu shifumo ɨsha minzi,
ge gakufumwa uwuumi.
Khabhɨlɨ ʉMʉlʉngʉ akhayɨbhasyʉmʉla amansuzi gonti
mu miiso gaabho.”