4
Payilwa kwa Yesu
(Mat 4:1-11, Mal 1:12-13)
1 Yesu abu'i mulibi'ndi' lya Yordani ai ntwi'lya Loo Mpeleteu. Ngalongoyelwa na Loo mpaka kulubele,
2 akwo aapayilwe na Ibilisi kwa masu'ba alubaini, masu'ba ago goti, aalileli kili'be. Palyaikite lisu'ba lya alubaini ngaimminya njala.
3 Apo Ibilisi ngammakia, “Wenga manautei wamwana wa Nnu'ngu' ulibakie liwe li' lipange likati.”
4 Yesu ngannyangwa, “Iandikilwe, ‘Mundu alamali kwa likati bai, ila kwa kila liyi'gi'yo lyalibu'ka kwa Nnu'ngu'.’ ”
5 Bu'kapo Ibilisi ngampeleka mpaka pandu patu'ndu'bau na kunnaya ukulungwa woti wa padunia. Ibilisi ngammakia,
6 “Naakupeya uweso wa kulungwa yoti yi', kwa mwanjaa, ayi' yoti nitepeyelwa na mana nipendile kumpeya mundu nendakombwa.
7 Bai, mana wanikilikitya, ayi' yoti yapanga mali yako wenga.”
8 Yesu ngannyangwa, “Iandikilwe,
‘Unkilikiti Bwana Nnu'ngu' wako,
na kuntumikia ywembe bai.’ ”
9 Ibilisi ngampu'twa mpaka ku Yelusalemu, kunani ya Nyumba ya Nnu'ngu' ngammakia, “Manaitei wenga nga wamwana wa Nnu'ngu', witu'mbu'ye pai',
10 kwa mwanjaa iandikilwe,
‘Aabakia malaika bake bakuli'ndi'le,’
11 na kai',
‘Baakupu'twa mumoko gabe,
li'nga wakene ku'bala magu'lu' gako muliwe.’ ”
12 Lakini Yesu ngannyangwa, “Iandikilwe, ‘Keneumpaye Bwana Nnu'ngu' wako.’ ”
13 Ibilisi paibweni ampayike kwa kila ndi'la, nganneka kwa kumpelemba.
Yesu atumbwa lyengo lyake ku Galilaya
(Mat 4:12-17, Mal 1:14-15)
14 Apo Yesu ngaki'li'bu'kya ku Galilaya ai ntwi'lya makakala ga Loo Mpeleteu na makowe gake gayu'wanike muilambo yoti ya papipi.
15 Naywembe aai kayi'gana mumayumba ga kunnu'ba Nnu'ngu', ngalumbilwa na bandu boti.
Yesu akanilwa ku Nasaleti
(Mat 13:53-58, Mal 6:1-6)
16 Bai, Yesu ngayenda ku Nasaleti, pandu paalelilwe, na Lisu'ba lya Sabato kwa Ayahudi aayingi munyumba ya kunnu'ba Nnu'ngu' kati mwayabile mimu yake. Ngayi'ma li'nga asome Maandiko Mapeleteu kwa lilobe.
17 Ngapokya kitabu sa nnondoli ywa Nnu'ngu' Isaya, ngakiumukwa na kupakolya pandu papaandikilwe,
18 “Loo wa Bwana ai panani yangu',
aniyi'mike mwene li'nga naleti aki'ba Abali Inannoga.
Anitumike naatangasili atabilwe yu'gu'li'lwa kwabe na kimbulibuli bapate lola
kai' anitumike nakombwe bababonelwa,
19 no tangasa mwaka wa Bwana woyaliwa bandu ngu'ngu' yake.”
20 Payomwi soma ngakiwi'ki'lya si'lu' kitabu, na kumpeya ntumisi bu'kapo ngatama, na bandu boti ngabammu'nju'lya minyo.
21 Naywembe ngaabakia, “Liyi'gi'yo lyamuliyu'wine, li'no litimile.”
22 Boti baatinapusika, munomuno baatisangala, kwa makowe manogau, gaagalongei. Ngabalaluyana, “Ayu' ka ngamwana wa Yusupu?”
23 Nembe ngaabakia “Nitangite mulu'anibakia nnongelo gu', ‘Wa nng'anga witepwe wamwene.’ Kai' mwabaya, ‘Goti gatugayu'wine ugapangite ku'lu' ku Kapalanaumu, ugapange kai' pano pakilambo sako.’ ”
24 Ngapayendelya baya, “Nnondoli atanganikwali pakilambo sake.
25 Pi'kani, kwai na alwawa awi'li'ka baingi ku Isilaili nsimu wa Eliya, kai' kwai na njala ngu'lu' munni'ma woti kwa mwanjaa aanileli ula kwa myaka itatu na nusu.
26 Ata nyo, Eliya atumilweli kwa nnwawa nng'wi'li'kwa ywoywoti ila kwa nnwawa nng'wi'li'kwa ywa ku Salepta nni'ma wa ku Sidoni.
27 Kai' ku Isilaili nsimu wa Elisha kwaabile na bene matana baingi. Ata nyo, ntu'pu' nywapeleteyilwe ila Naamani mwenekaya wa ku Silia.”
28 Boti babaabile mu'lu' munyumba ya kunnu'ba Nnu'ngu' pabagayu'wine galu', baatiusika muno.
29 Ngabayi'ma, na kumpikia panja ya kilambo sabe na kumpeleka panani ya kitu'mbi', li'nga bantaikuli pai' bu'ka mungeleuko.
30 Lakini Yesu ngapi'ta pakatikati yabe no bu'ka.
Mundu mwene moka
(Mal 1:12-28)
31 Bu'kapo Yesu ngaelya mpaka ku Kapalanaumu kuwilaya ya Galilaya, ngaba kayi'gana bandu Lisu'ba lya Sabato ya Ayahudi.
32 Ngabasangala uweso wabile nawo muuyi'gani kwa mwanjaa, ayi'ganage kwa amuli.
33 Na mu'lu' munyumba ya kunnu'ba Nnu'ngu' kwabile na mundu ywalobi moka, aapangite lwengele lwoiba na makutu kaakemelya,
34 “Ubile na ki'li' na twenga, wenga wa Yesu wa ku Nasaleti? Buli uisi kutulangamisa? Nikutangite wenga wanyai. Wenga nga wa Mpeleteu mwene makakala ga Nnu'ngu'!”
35 Yesu ngankalipya aywo moka kabaya, “Ndu'ti! Ummu'ke mundu yu'!” Bai, aywo moka ngantu'ya pai' yu'lu' mundu na kummu'ka wangali kunsulu ata pasene.
36 Bandu boti ngabasangala, ngababakiana, “Ali' likowe lyayambi' mwanjaa kwa uweso na makakala ammakia moka bu'ka naywembe endabu'ka!”
37 Makowe ga Yesu, gatiyu'wanika muilambo yoti ya nni'ma gu'lu'.
Yesu endakwatepwa bandu baingi
(Mat 8:14-17, Mal 1:29-34)
38 Yesu pabu'i mu'lu' munyumba ya kunnu'ba Nnu'ngu', ngayenda kasake Simoni. Mau' yumo nkiwe Simoni, aai na oma ngali' ngabannu'ba antepwe.
39 Yesu ngaisa no yi'ma papipi nakwe, ngaikalipya yi'lu' oma, ngaimmu'ka. Ywalu' mau' ngakakatuka popopo na kwatumikia.
40 Lisu'ba palipilyage, boti babaabile na atamwe ba matamwe mbali'mbali', baatikunnetya. Na ywembe aabi'kite maboko gake panani ya kila mundu, ngaatepwa boti.
41 Moka gaatikwabu'ka bandu baingi, ngagapanga ndu'ti kagabaya, “Wenga nga wa Mwana wa Nnu'ngu'!” Lakini Yesu nga gakalipya wala aagayi'ki'tiyeli longela, kwa mwanjaa, gaatangite panga ywembe nga Kilisitu ywabayilwe.
42 Ata pakusile Yesu aatibu'ka yenda pandu pangali bandu, kipi'nga sa bandu ngabampala. Pabaamweni, ngabapaya kunkanikia li'nga kaneabu'ke kasabe.
43 Lakini Yesu ngaabakia, “Nipalikwa kwaalya Abali Inannoga ya Ukulungwa wa Nnu'ngu' mumili'ma yi'ngi', kwa mwanjaa, nitumilwe kwa go.”
44 Bai, aai kaala ku Yudea mu mayumba ga kunnu'ba Nnu'ngu'.