6
Mey da ray sləra ŋga ndaw-meslərey ŋga Yesu
1 Wure keɗe, Gazlavay aa ta ala daa sləra masa ala ma kamara cəpa. Gazlavay ma kakwar maaya la. Anda keɗe, ala fa kamakwar ambahw, ka da tərdamara maaya ŋga Gazlavay a ŋga cek ŋga tede ba.
2 Wulkam fa mey ŋga Gazlavay maa guzley zleezle, ma ləvey:
«Ta pas masa amba ya kakwar maaya na,
ya ta jəkfakwar sləmay la.
Ta pas masa amba ya ləhdakwar na,
ya ta jənkwar la.»
Nəkmara dəɓa taw, wure keɗe pas a ta wuswa cay amba Gazlavay a kakwar maaya, fara fara pas a ta wuswa cay amba a ləhdakwar.
3 Ala fa wuɗam ŋga key cek kwa wura wura ŋga təkta ndəhay ŋga təɓmara mey ŋga Gazlavay na, daa ba, maja ya wuɗam ndəhay a slam mey a ray sləra ala ba.
4 Ama daa sləra ala ha cəpa na, ala fa wuzdamara, ala na, ndəhay ma ka sləra ŋga Gazlavay fara fara.
Kwa ala daa banay,
kwa fa pamandar dey a ray daa ba,
kwa cek fa fənndar ray,
ala fa ɓəsmara gway.
5 Nəka, ta kəɗmandar la,
ta handamandar la aa fərsəne,
asaya, ta həldamata ndəhay la ŋga key həma a ray ala.
Ahaw, sləra ta fənndar ray la haa ya gwamara ŋga ney ba,
asaya, ya gwamara ŋga hətey cek mezəmey ba.
6 Fara fara, ala na, fa kam cek ma mbafar a Gazlavay,
ya sərmara mey ŋga Gazlavay fara fara,
ala ndəhay meekweɗ-mey, mevel ala maaya,
*Mesəfney ŋga Gazlavay aa da ray ala.
Asaya, ya wuɗmata ndəhay ta mevel pal.
7 Ala fa wuzdamara mey masa fara fara a ndəhay,
maja Gazlavay fa vəlndar gədaŋ.
Yaw, ta fa cek hay a keɗe tabiya na, ala fa wuzdamara,
ala na, ndəhay ma ka sləra ŋga Gazlavay fara fara.
Cek ala ma ka vəram ta masa-gəra ala hay,
ta cek ala ma jəɗndar fa masa-gəra ala hay na,
ara mekey cek ta cəveɗ e keɗe fa mey ŋga Gazlavay.
8 Ndəhay siya faa həmdamandar,
siya hay may, fa rəsmandar.
Ndəhay siya saya fa namandar ray,
siya hay may, fa cəɗmandar.
Ala na, ndəhay maa guzlam mey masa fara fara,
ama ta ŋgene he cəpa, a padamandar
ŋga ndəhay membərzley.
9 A ləvam saya, ala na, ndaw ma sərndar daa ba,
ama anja ndəhay tabiya a sərmandar jak, ba diya?
Ndəhay a wulkam na,
ala fa da njam ga da bəla daa ba,
ama nəkmara taw, ala daha ta dey cəŋga.
Ta sərdamandar banay la ga,
ama ta kəɗmandar vagay daa ba.
10 Ata fa kamandar cek ma ka matəway aa dey,
ama ala mandaw mandaw daa meesəmey cəŋga.
Ndəhay a nəkmandar na, ala anda masa-viya hay,
ama ala fa jənam ndəhay ga
ŋga hətey menjey maaya fa Gazlavay.
Ndaw a nəkndar anda cek ala daa ba,
ama fara fara cek ma həcndar na, daa ba səlak.
11 Akwar ndəhay da Kwarinti, ala na, ma kadamakwara mey daa mevel ala la cəpa, kwa ya ta cam mey fa akwar daa ba səlak.
12 Ala na, ya wuɗmakwar kalah, ama ma wuɗmandar ba na, akwar jak.
13 Ehe, ya faa guzlkwar anda akwar bəz aɗaw hay, wuɗmandar anda ala ma wuɗmakwar may, wuɗmandar ma fəna ma fəna ta mevel pal.
Meweɗey ta ləvaŋ na, a cəmam daw?
14 Ya fa ləvkwar fara fara, ndəhay ma təɓa mey ŋga Yesu ba na, ka da cəmam ɗay ta ata ba. Cek maaya ta cek maaya ba a cəmam aa slam a daw? Meweɗey ta ləvaŋ na, a cəmam aa slam a daw?
15 Ata *Kəriste ta *Sataŋ, bay-malula na, a cəmam ɗay daw? Yaw, ndaw ma təɓa mey ŋga Yesu ta ndaw ma təɓa mey ŋga Yesu ba na, cəveɗ ata letek daw?
16 Asaya, kuley hay na, slam ata daa *Way-mekey-kwakwas ŋga Gazlavay daha daw? Aləkwa na, anda Way-mekey-kwakwas ŋga Gazlavay, Gazlavay, ndaw masa aŋga daha ta dey ŋga sərmataw. Ara anda aa ma ləvey: «Yah, Gazlavay, ya da njey ta ndəhay aɗaw hay. Yah na, Gazlavay ata, ata may, ndəhay aɗaw hay.»
17 Ara maja ŋgene, Bay Gazlavay a maa guzltar a ndəhay aŋga hay, a ləvtar:
«Wuɗkam ta ndəhay malamba hay,
ka da njam daa slam a saba.
Njam manjar mebərey,
anda keɗe, yah na, ya təɓkwar la ŋga ndəhay aɗaw hay.
18 Yah na, Papakw akwar,
akwar may, bəz aɗaw hay, mezəle hay ta maŋgusa hay.
Ara Bay Gazlavay masa ta gədaŋ
ma fənta cek hay cəpa maa guzley anda keɗe.»