3
Yesu a fəna Mawiz
1 Məlma aɗaw hay daa *mecəmey-ray ŋga ndəhay ŋga Yesu, Gazlavay ta zəlkwar la ŋga tərey ndəhay aŋga hay. Anda keɗe, wulkam da ray Yesu, ndaw masa Gazlavay ma slərdərwa ŋga key ndaw mahura da ray ndəhay ma ka kwakwas aŋga. Ara ta fa aŋga aləkwa ma təɓkwa mey ŋga Gazlavay, aləkwa fa wuzdakwa mey a fa mey ŋga ndəhay tabiya.
2 Ara Gazlavay ma pa ŋga ka sləra ha. A ka sləra ha na, ta cəveɗ e anda *Mawiz ma ka sləra aŋga ta cəveɗ e ŋgada ndəhay ŋga Gazlavay tabiya zleezle may.
3 Yesu na, si ndəhay aa həmdamara ma fəna Mawiz. Ara kəne may, ndaw ma ləma way na, aa həmdamara a fəna way a.
4 Ka sərmara, kwa way wura wura na, ndaw ma ləma daha. Ama ma katərwa cek hay tabiya na, ara Gazlavay.
5 Mawiz na, ara ndaw ma ka sləra ta cəveɗ e da wuzlah ndəhay ŋga Gazlavay tabiya. Ara aŋga ma wuzdatara mey masa Gazlavay ma daa guzlda ŋgada fa mey.
6 Ama ma wey da ray ndəhay ŋga Gazlavay tabiya ta cəveɗ e na, ara *Kəriste, Bəzey ŋga Gazlavay. Da aləkwa fa jarakwa maaya maaya daa mey ŋga Gazlavay masa aləkwa ma təɓkwa, asaya, da aləkwa fa səkwakwa cek masa Gazlavay ma da vəldandakwara ta meesəmey na, ŋgene, aləkwa ndəhay aŋga hay.
Mey da ray meməskey-vaw ŋga ndəhay ŋga Gazlavay
7 Maja ŋgene, *Mesəfney ŋga Gazlavay a ləvey:
«Da akwar fa cəndamara ɗay ŋga Gazlavay tasana na,
8 ka da dəzlmata sləmay akwar hay ba.
Ka da kamara anda papaŋ ŋga papakw akwar hay zleezle
ma kam həma a ray Gazlavay ba.
Daa ŋgene, ata da wuzlah-ley, ta jadamara Gazlavay la.»
9 Gazlavay aa guzley, a ləvey:
«Da wuzlah-ley a, ta hətmatar cek hay maaya tabiya
masa yah ma kata daa mevey kwakwar məfaɗ la.
Ama ta ŋgene he cəpa, ta jadamaya la cəŋga.
10 Ara maja ŋgene, yah ma cey mevel a ray ata.
Ta’, yaa guzley, ya ləvey: “Mewulkey ata, aŋga maaya ba,
cek masa yah ma wuɗey amba a kamara na,
ta sərmara daa ba.”
11 Daa masa yah ma cey mevel heyey na,
ya ta mbeɗey la, ya ləvey:
“Kwa fa da mbəzam aa slam masa yah ma ɗiytara
ŋga məskey vaw na, daa ba səlak.”»
12 Məlma aɗaw hay, wam vaw! Ndəhay masa ta mevel maaya ba, ma təɓa mey ŋga Gazlavay ba na, kwa ndaw pal da wuzlah akwar a da tərey anda ata ba, maja mevel maaya ba anda ŋgene na, a da zlaŋgaɗadakwar ta Gazlavay, ndaw masa aŋga daha ta dey ŋga sərmataw.
13 Ama maaya na, ka dəkam mevel da wuzlah akwar mandaw mandaw, amba *Sataŋ a batakwar ŋga key mebərey ba, kwa ndaw pal da wuzlah akwar fa da dəzla sləmay daa ba. Ahaw, dəkam mevel da wuzlah akwar, maja tasana keɗe, Gazlavay a wuɗey ŋgaa guzlndakwar saya.
14 Mey ŋga Gazlavay masa aləkwa ma təɓkwa dəga ŋga mezley a haa mendəvey a na, da aləkwa fa jarakwa maaya maaya daa mey a na, ŋgene, aləkwa ndəhay ŋga *Kəriste.
15 Mawuzlalakaya daa ɗerewel ŋga Gazlavay, a ləvey:
«Da akwar fa cəndamara ɗay ŋga Gazlavay tasana na,
ka da dəzlmata sləmay akwar hay ba.
Ka da kamara anda papaŋ ŋga papakw akwar hay zleezle
ma kam həma a ray Gazlavay ba.»
16 Ma cəndamara ɗay ŋga Gazlavay ta ma kam həma a ray a na, wa hay wa? Ara ndəhay tabiya masa *Mawiz ma badatərwa daa hwayak ŋga *Ejip.
17 Gazlavay a cey mevel mevey kwakwar məfaɗ na, da ray wa hay wa? A cey mevel na, da ray ndəhay a ma kam mebərey. Anda keɗe, ata cəpa ta məcam sem da wuzlah-ley.
18 Gazlavay ta mbeɗey la, a ləvey: «Kwa fa da mbəzam aa slam masa yah ma ɗiytara ŋga məskey vaw na, daa ba səlak.» A mbeɗey kəne na, maja wa hay wa? A mbeɗey na, maja ndəhay a ma cənmar mey ba.
19 Fara fara, ya sərkwa ta hətam ŋga mbəzey aa slam meməskey-vaw a daa ba, maja ata ma təɓmara mey ŋga Gazlavay daa ba.