5
Mey da ray ɗerewel mapaɗakaya leŋ da ray Bəz-təɓaŋ
1 Masa yah, *Jaŋ, ya fa nəkey dey saya na, ya hətey ɗerewel daha makərzakaya da har ndaw masa manjakaya daa slam-menjey da wuzlah heyey. Ɗerewel e aa da har-zəmay. Mawuzlalakaya dey cew e cew e, ama mapaɗakaya zlec! daa slam pal. Mey a maslərɓakaya ta tebeɗ slam maasala, amba ndaw a gwa ŋga wura ba.
2 Fa dəɓa ha, ya hətey maslaŋ ŋga Gazlavay masa ta gədaŋ. Aa fa wudey, a ləvey: «Ma gwa ŋga pəslta tebeɗ ma slərɓa ɗerewel keɗe na, wa? Ma wusa ŋga wura ɗerewel e keɗe na, wa?»
3 Ama, kwa ndaw pal ma gwa ŋga wura daa ba səlak. Kwa ndaw ma pawa salay da vaɗ, kwa ndaw ma sawa dama dama da bəla keɗe, kwa ndaw ma bawa daa vəgeɗ ma gwa ŋga wura ɗerewel e amba a nəkey dey a hwaɗ a na, daa ba səlak.
4 Anda keɗe, yah, Jaŋ, ya ta təway la ga, maja kwa ndaw pal ma wusa ŋga wura ɗerewel e amba a nəkey dey a hwaɗ a daa ba.
5 Da ray ŋgene, ndaw pal da wuzlah *bay-ray hay kwakwar cew a ray a məfaɗ heyey aa guzlya, a ləvey: «Ka təway ba. Nəka mabar ŋgene. A bawa daa səkway ŋga Juda. Ara ndaw ma yawa daa səkway ŋga Bay *Davit. Mabar a ŋgene ta fənta cek hay cəpa sem ta gədaŋ. Da ray ŋgene, a gwa ŋga pəslta tebeɗ maslərɓakaya slam maasala ŋgene, a wura ɗerewel e.»
6 Daa ŋgene, ya hətey ndaw malacakaya da wuzlah slam-menjey heyey ta bay-ray hay leŋ cek hay məfaɗ ta dey heyey. Ndaw a, a nəkey anda bəz-təɓaŋ maslakaya ɗay a, ama aa ta dey cəŋga. Aa ta dəram maasala da ray, leŋ ta dey hay maasala . Dey hay maasala a ŋgene ara mesəfney hay maasala masa Gazlavay ma slərdata aa slam wura wura da bəla cəpa.
7 Ndaw anda Bəz-təɓaŋ heyey ta’, a ŋgəchawa, a təɓa ɗerewel da har-zəmay ŋga ndaw manjakaya daa slam-menjey da wuzlah kaa heyey.
8 Masa aŋga ma təɓa ɗerewel e cay na, ta’, cek hay məfaɗ ta dey, leŋ bay-ray hay kwakwar cew a ray a məfaɗ heyey a ragadam fa mey ŋga ndaw anda Bəz-təɓaŋ a. Ata cəpa ta ganjaval da har, ta taasa hay ŋga ɓərey magaza marəhkaya ta cek meeŋgəsey mezey maaya. Cek meeŋgəsey a, aa mapakaya anda medərey-daŋgay ŋga ndəhay ŋga Gazlavay.
9 Mahura hay ta cek hay məfaɗ ta dey heyey a zlamar walay mawiya ŋgada ndaw anda Bəz-təɓaŋ kaa heyey, a ləvmar:
«Kah na, ka wusa ŋga la ɗerewel keɗe
ŋga pəslta tebeɗ fa vəɗa
maja ta kəɗmaka la vagay.
Mambaz akah ta mbəɗwa la.
Anda keɗe, ka ta mbəɗtərwa ndəhay la
dasi har ŋga Sataŋ
amba a təram ndəhay ŋga Gazlavay.
Kwa ndəhay masa daa səkway wura wura cəpa,
masa maa guzlam ta mey wura wura cəpa,
ta ndəhay daa wura daa wura cəpa
masa daa hwayak hay cəpa na,
ka ta mbəɗtərwa sem.
10 Ka ta tərdata la ŋga ndəhay
masa kah ma wey da ray ata,
ndəhay ma ka kwakwas ŋga Gazlavay,
mapatakaya ŋga key sləra ŋgada Gazlavay.
Anda keɗe, ndəhay a, a da wam da ray ndəhay da bəla.»
11 Fa dəɓa ha yah, Jaŋ, ya cəney ɗay ŋga maslaŋ hay ŋga Bay Gazlavay da vaɗ ga, a sləfam ba. Ya hətatar fa zlərmar ray ŋga slam-menjey ŋga Bay Gazlavay heyey, ŋga cek hay məfaɗ ta dey, leŋ ŋga bay-ray hay kwakwar cew a ray a məfaɗ heyey.
12 Maslaŋ hay a, fa zlam walay ta gədaŋ, a ləvam:
«Bəz-təɓaŋ masa ma kəɗmara vagay heyey na,
aa təɗe ŋga wey da ray cek hay tabiya,
ŋga hətey zleley,
ŋga hətey leŋgesl,
ta ŋga hətey gədaŋ.
Asaya, aa təɗe amba ndəhay tabiya a həslmar ray,
aa səmam da ray meweɗey aŋga,
a həlmamara.»
13 Fa dəɓa ha, ya cənda ɗay ŋga cek hay tabiya masa Gazlavay ma katərwa. Cek hay da vaɗ, da bəla, daa vəgeɗ leŋ daa bəlay cəpa fa zlam walay, a ləvam:
Anja ndəhay ŋga həlmamara Gazlavay
manjakaya daa slam aŋga menjey,
leŋ Bəz-təɓaŋ may.
Anja ndəhay ŋgaa həmdamata,
ŋga həslmatar ray,
ŋgaa səmam da ray meweɗey aŋga,
anja ŋga wam da ray cek hay tabiya ŋga sərmataw!
14 Cek hay məfaɗ ta dey heyey a mbəɗdamatara, a ləvam: «*Amen, ŋga key kəne.» *Bay-ray hay kwakwar cew a ray a məfaɗ heyey may a ragadam fa mey ata, a həlmamata.