5
1 Cabä majjäyaꞌadiøjc mhoj myáꞌaxät. Meeꞌxxieemy mwiingapx mjøjcapxǿꞌøwät nebiä mhamdsoo teediän. Møødä muutsc‑hänaꞌc‑hajxypä, jaduhṉ mmägapx mhanéꞌemät nebiä mhamdsoo puhyaꞌayän.
2 Jaanä jaduhṉä tsøꞌødaj mmägapx mhanéhm̱bät nebiä mhamdsoo tajjän. Møødä toꞌoxiøjc‑hajxy muutspä, jaduhṉ mmägapx mhanéhm̱bät nebiä mhamdsoo puhdoꞌoxiän. Caj mmägapxtägóyyät.
3 Jii yaamgtoꞌoxyhajxy näjeꞌe, cab hajxy pøṉ ñäꞌägädä møødä. Tøyhajt hajxy ñidiuhm̱haty. Jeꞌeds hajxy mbuhbédäp.
4 Pero jaꞌa yaamgtoꞌoxyhajxy jaac jim̱bä, pø jim̱ä yhuunghajxy, pø jim̱ä yhoc‑huunghajxy, ween hajxy jaduhṉ piuhbedyii nägøꞌø nädecypiä jaꞌa yhamdsoo huunghajxy, jaꞌa yhamdsoo hoc‑huunghajxy. Jaduhṉä mäbøjpädøjc‑hajxy quiumayǿøjät jaꞌa Dios coo tiaj tieedy hajxy jaduhṉ piuhbejtägátsät. Jaduhṉ hajxy yajcähxǿꞌøgät coo jaꞌa tiaj tieedy hajxy jiaanc̈h wiingudsähgøꞌøy.
5 Hix̱, jaꞌa yaamgtoꞌoxyhajxy tehm̱ tiøyhajt nidiuhm̱hajpä, jaꞌa Dios hajxy yhajodhajpy. Xøømdsuhm̱ hajxy miänuuꞌxtaꞌagy.
6 Pero jaꞌa yaamgtoꞌoxy jaꞌa Dios hajxy caꞌa hajodhajpä, coo jaꞌa jioot hajxy chógät coo hajxy xyiꞌig xiooṉdaꞌagaꞌañ, jaduhṉä Dios yhix̱y nebiä hoꞌogypiän, hoy hajxy jia jujyñä, hoy hajxy jia tsuxnä.
7 Jaduhṉä mäbøjpädøjc mwiingapx mjøjcapxǿꞌøwät coo jaꞌa homiädiaꞌagy hajxy pedyii ween quiudiuṉ̃, jaduhṉ hajxy quiumayǿøjät jaꞌa cuꞌug.
8 Pønjatiä jiujy miäguꞌug caꞌa hijxp caꞌa mähäyoob møødä yhuung møødä tioꞌoxy, tøø jaꞌa Diosmädiaꞌagy hajxy ñajtshixøøñä neby hajxy hijty miäbøquiän jaꞌa Jesucristocøxpä. Maas haxøøg hajxy jiatcøꞌøy quejee hänaꞌc‑hajxy caꞌa näꞌägä mäbøjpä.
9 Mgujáhyyäbä yaamgtoꞌoxiä xiøø hajxy pønjaty hajxy mbuhbedaam̱by. Jeꞌe xiøøhajxy pédäp pønjaty tägøøghiiꞌx jomøjt tøø yhabéjtäxä, møød pønjatiä yaꞌadiøjc tuꞌuquiä tøø miøødtsänaꞌay,
10 møød pønjatiä cuꞌughajxy ñänøøm̱by coo jaꞌa mayhajt hajxy tøø tiúuṉäxä, møød pønjatiä ñøøxä miajc hoy yajxóṉ tøø yajtsoꞌogy tøø yajyeegy, møød pønjaty puꞌumiooby coñdymooby jaꞌa jäyaꞌayhajxy jim̱ miim̱b mejtspä maa jaꞌa tiøjcän, møød pønjatiä mäbøjpädøjc cøꞌøbujp tecypiujp, møød pønjaty puhbejp jaꞌa jäyaꞌayhajxy häyohmbaatpä, møød pønjatiä jioot tøø piädaꞌagy coo jaꞌa hoybä weenbä hajxy quiudiúṉ quiuñáxät hoy ñäꞌä tiijä. Jaꞌa yaamgtoꞌoxy hädaa hoguiuhdujt jaduhm̱bä hajxy yajtuum̱bä, jeꞌeds hajxy mbuhbédäp.
11-12 Pero jaꞌa yaamgtoꞌoxy tsaanbä muutspähajxy, cabä xiøøhajxy quiujáhyyäxät, cab hajxy mbuhbédät. Hoy hajxy tøø jia mänaꞌañ coogä Jesucristo hajxy hamuumduꞌjoot miädunaꞌañ maa jaꞌa tsajtøjcän, mänitä jioot hajxy näjeꞌe piädaꞌagy coo hajxy piøjtägatsaꞌañ coo hajxy yhuuctägatsaꞌañ. Cabä Jesucristo hajxy jaduhṉ hoy miädunaaṉnä. Y tuꞌudägóyyäp hajxy jaduhṉ.
13 Jaanä jaduhṉä yaamgtoꞌoxy tsaanbä muutspä hajxy näjeꞌe jiajpä, wiꞌi ñuuxhoꞌp hajxy, tøjc‑tøjc hajxy wiädity. Wiꞌi miädiaꞌagy‑yajnajxp hajxy. Ñäꞌä yaghadsow̱ ñäꞌä yajpøgøꞌøy hajxy cøx̱iä tøø jiaty. Cøx̱iä hajxy ñäꞌä pamädiaꞌagy mädyiijaty caꞌa jagä hawiinmats.
14 Jadúhṉhøc̈hä njoot jia tsocy coo jaꞌa yaamgtoꞌoxyhajxy piøjtägátsät, jaꞌa hajxy tsaanbä muutspä, weenä ñøøxä miajc hajxy jaduhṉ jiaac yajtsoꞌogy, weenä jiøønä tiøjc hajxy hoy yajxóṉ cwieendähaty, jaduhṉ hajxy quiaꞌa hoj quiaꞌa yaꞌaxǿøjät jaꞌa miädsiphajxy.
15 Hix̱, tøø hajxy näjeꞌe tiuꞌudägooñä. Tøø jaꞌa møjcuꞌugongä miädiaꞌagy hajxy jiøjpøgǿøyyänä.
16 Mijts, puhdoꞌoxytiøjc, pø jim̱ mijtsä yaamgtoꞌoxy mmøødä maa jaꞌa mjujy maa jaꞌa mmäguꞌughajxiän, ween hajxy jaduhṉ mbuhbety, jaduhṉä mäbøjpädøjc‑hajxy quiaꞌa taj quiaꞌa máyät neby hajxy jaduhṉ piuhbédät. Hix̱, jaduhṉä mäbøjpädøjcä yaamgtoꞌoxy hajxy hoy piuhbédät, jaꞌa hajxy pøṉ caꞌa jaanc̈h møødpä.
17 Jaꞌa majjäyaꞌadiøjc‑hajxy, jaꞌa hajxy jim̱ hoy tuum̱bä wiindsǿṉ maa jaꞌa Diostøjcän, ween hajxy hoy miäjuyii, møødä Diosmädiaꞌagy hajxy yajnähixøøbiä. Ween hajxy näꞌä tägøꞌøbä miäjuyii.
18 Hix̱, jaduhṉä Diosmädiaꞌagy miänaꞌañ: “Maa jaꞌa weeyä trigo hajxy hänajty myajtehṉdseꞌediän, weenä weeyä jaduhṉ piuhjøøꞌxy.” Jaanä jaduhṉ miänaam̱bä: “Weenä cuduum̱bä cubøjpä miäjuyii.”
19 Coo jaꞌa Diostøgootypä wiindsǿṉ ñäxøꞌøwøꞌøwǿøjät, mänitä mäxøhbä miädiaꞌagy miäbǿjcäxät pø jim̱ä capxtøøbä miøødä mejtstägøøg. Pø cab jaduhṉ miøødä, cabä miädiaꞌagy jaduhṉ miäbǿjcäxät.
20 Jaꞌa Diostøgootypä wiindsøṉhajxy hoy caꞌa wädijpä, mhójäp myáꞌaxäp jaduhṉ maa jaꞌa mäbøjpädøjc‑hajxy nägøx̱iä yhamugøꞌøyän, weenä miäwiindsøṉhajxy jaduhṉ chähgøꞌøy.
21 Miic̈h nwiingapx njøjcapxøøby coo hädaa cuhdujt jaduhm̱bä tsipcøxp mgudiúṉ mguñáxät. Cabä mmähänaꞌc näꞌä nägoobä mnäꞌä tsaac̈htiúnät, ni caj näꞌä nägoobä mbuhbédät. Tuꞌcuhdujtä hänaꞌc mnäꞌä híxät, hoy jaduhṉ xjia mäguꞌughaty, hoy jaduhṉ xjia mädsiphaty. Xyhíxäbä Dios jaduhṉ møødä Jesucristo, møødä Diosmoonsähajxy jim̱ tsajpootypä, jaꞌa hajxy wiimbíyyäbä.
22 Coo pøṉ hänajty tiägøꞌøwaꞌañ tuum̱bä tsajtøjwiindsǿṉ, caj mdsoj cøꞌønähgábät. Jayøjp mwiinmahñdyhádät hodiägaamby pø hoy hänajty tiunaꞌañ, pø caj. Hix̱, coo jaduhṉ ñäꞌä tuꞌudägóyyät, wehṉdä miic̈hä cuꞌug xñänǿmät cooc tyijy miic̈h tøø mbuhbety. Howyiinmahñdy myaghídäp hoy miänaajä.
23 Timoteo, nax̱y miic̈h mjootpädøꞌøgyii. Hahixøøby coo vino weeṉ̃tiä mhúꞌugät. Cabä nøøyyähajtiä mhúucnät.
24 Jii jäyaꞌayhajxy näjeꞌe, coo hajxy mänaa quiädieey, paquiä jaduhṉ wyiingähxøꞌøgy, cahnä hajxy hänajty miøjyaꞌaxyii hagujc. Pero jii wiinghänaꞌc‑hajxy, cabä piojpä quiädieeyhajxy choj wiingähxøꞌøgy, høxtä coonä hajxy hänajty tøø miøjyaꞌaxyii hagujc.
25 Jaanä jaduhṉduhm̱bä, jii jäyaꞌayhajxy näjeꞌebä, paquiä jaduhṉ wyiingähxøꞌøgy coo hojioot hajxy jiaanc̈h tehm̱ miøødä. Hoy jaduhṉ quiaꞌa ja tsoj wiingähxøꞌøgy, tsipcøxp cujecy wyiingähxøꞌøgaꞌañ.