19
Sa̱kaꞌnuꞌ ne̱ ndieeꞌ ndi̱viꞌ Ndiosí
1 Kii̱ꞌ ni̱ ndi̱ꞌi̱ ni̱ kaꞌa̱n ángele ndi̱e̱eꞌ ja̱a̱nꞌ ndii, sa̱kanꞌ te̱ ni̱ xi̱ni̱ so̱ꞌo̱ i̱ ña̱ kaꞌán tiꞌeꞌ xa̱va̱ꞌa̱ kuaꞌa̱ꞌ kooꞌ chukuuꞌ ne̱ yivi̱ꞌ ndii:
Na ko̱to̱ kaꞌnuꞌ e̱ꞌ Ndiosí.
Kuenta Ndiosí nduuꞌ ña̱ kakú e̱ꞌ.
Te̱ na na̱ti̱i̱n a̱ ña̱ tiinꞌ kaꞌnuꞌ ña̱ꞌaꞌ sa̱kuuꞌ ne̱ yivi̱ꞌ,
xiinꞌ ña̱ xakaꞌnuꞌ ña̱ꞌaꞌ ni̱a̱,
te̱ na̱ti̱i̱n tu̱ a̱ sa̱kuuꞌ ña̱ ndi̱e̱e̱ꞌ.
2 Te̱ ña̱ nda̱ku xiinꞌ ña̱ ndi̱xa̱ nduuꞌ ña̱ xaaꞌ a̱ kii̱ꞌ sanaꞌmá a̱ ne̱ yivi̱ꞌ.
Te̱ ni̱ sa̱ndoꞌoꞌ a̱ ne̱ ndieeꞌ ñu̱u̱ ja̱a̱nꞌ,
ne̱ ni̱ xa̱a̱ nde̱e̱ naa xaaꞌ i̱i̱n ña̱ꞌaꞌ ñaꞌ xikoꞌ xiinꞌ mi̱iꞌ.
Te̱ ni̱ sa̱tíviꞌ ne̱ ja̱a̱nꞌ ne̱ ndieeꞌ i̱i̱n yivi̱ꞌ xiinꞌ ña̱ xiín ña̱ xaaꞌ ni̱a̱.
Te̱ ke̱ndiaa̱ꞌ yaꞌviꞌ ña̱ꞌaꞌ Ndiosí sa̱kanꞌ ña̱ ni̱ xaꞌni̱ꞌ ne̱ ja̱a̱nꞌ, ne̱ xikaꞌ nuuꞌ nuu̱ꞌ a̱.
3 Te̱ tiꞌeꞌ xa̱va̱ꞌa̱ ni̱ kaꞌa̱n ka̱ a̱ ndii:
―Na ko̱to̱ kaꞌnuꞌ e̱ꞌ Ndiosí. Kaaꞌ te̱ kaaꞌ ñuꞌma̱ miiꞌ xixí ñu̱u̱ kaꞌnuꞌ ja̱a̱nꞌ nde̱e̱ ndi̱ꞌi̱ ni̱ kivi̱ꞌ ―ni̱ kachi̱ a̱.
4 Te̱ oko̱ ku̱miꞌ saaꞌ ña̱ xi̱xa̱ ja̱a̱nꞌ xiinꞌ ku̱miꞌ saaꞌ ña̱ tiaku ja̱a̱nꞌ ndii, ni̱ xi̱ku̱ndiee̱ ndi̱e̱e̱ a̱ ya̱ti̱n nuu̱ꞌ tei̱ kaꞌnuꞌ ka̱ miiꞌ nduꞌu̱ꞌ Ndiosí, te̱ ni̱ xa̱kaꞌnuꞌ ña̱ꞌaꞌ a̱ kaꞌán a̱ ndii:
―Sa̱kanꞌ na ku̱ndu̱u̱ a̱. Na ko̱to̱ kaꞌnuꞌ e̱ꞌ Ndiosí ―ni̱ kachi̱ a̱.
5 Sa̱kanꞌ te̱ ni̱ ke̱ta̱ i̱i̱n tachi̱ꞌ yu̱ꞌuꞌ nde̱e̱ ya̱ti̱n miiꞌ iin tei̱ kaꞌnuꞌ ja̱a̱nꞌ kaꞌán a̱ ndii:
Te̱ sa̱kuuꞌ ndoꞌó, ne̱ xikaꞌ nuuꞌ nuu̱ꞌ Ndiosí ndii,
na sa̱kaꞌnuꞌ ndo̱ꞌ a̱,
xiinꞌ sa̱kuuꞌ ndoꞌó, ne̱ tiinꞌ kaꞌnuꞌ a̱,
naaꞌ ne̱ kaꞌnuꞌ nduuꞌ ndo̱ꞌ,
uun naaꞌ ne̱ ndaꞌvi so̱ꞌo̱ nduuꞌ ndo̱ꞌ.
Ni̱ kachi̱ tachi̱ꞌ yu̱ꞌuꞌ ja̱a̱nꞌ.
6 Sa̱kanꞌ te̱ ni̱ xi̱ni̱ so̱ꞌo̱ tu̱ i̱ i̱i̱n ña̱ nduuꞌ nde̱e̱ naa ña̱ kaꞌán tiꞌeꞌ xa̱va̱ꞌa̱ kuaꞌa̱ꞌ kooꞌ chukuuꞌ ne̱ yivi̱ꞌ. Te̱ ndi̱e̱eꞌ xa̱va̱ꞌa̱ ni̱ ni̱ꞌi̱ a̱ nde̱e̱ naa niꞌi̱ kuaꞌa̱ꞌ va̱ ti̱kui. Te̱ tiꞌeꞌ va̱ tu̱ kaꞌán a̱ nde̱e̱ naa ndeꞌí savi̱ꞌ kaꞌán a̱ ndii:
Na ko̱to̱ kaꞌnuꞌ e̱ꞌ Ndiosí.
Xa̱ xaꞌndia chuunꞌ xto̱ꞌo̱ e̱ Ndiosí, ña̱ kaꞌnuꞌ kooꞌ chukuuꞌ.
7 Te̱ na kua̱tiaꞌ va̱ nimá e̱ꞌ, te̱ na va̱ꞌa̱ ku̱ni̱ e̱ꞌ.
Te̱ na sa̱kaꞌnuꞌ e̱ꞌ Ndiosí,
sa̱kanꞌ ña̱ xa̱ ni̱ tondi̱a̱ kivi̱ꞌ ña̱ tu̱ndaꞌa̱ꞌ Mbe̱e̱ Lulu.
Te̱ xa̱ ni̱ xi̱koo̱ tu̱ꞌva̱ ña̱ꞌaꞌ ñaꞌ tu̱ndaꞌa̱ꞌ xiinꞌ a̱.
8 Te̱ xa̱ ni̱ ta̱xi̱ Ndiosí toto̱ niꞌnuꞌ aꞌ.
Te̱ ndo̱o̱ va̱ toto̱ ja̱a̱nꞌ, te̱ ya̱a̱ xiñu̱ vi̱ꞌ a̱.
Ni̱ kachi̱ a̱. Te̱ kaꞌán ndi̱a̱a̱ toto̱ ja̱a̱nꞌ xaꞌa̱ꞌ ña̱ nda̱ku ña̱ xaaꞌ ne̱ nduuꞌ kuenta Ndiosí.
Va̱ꞌa̱ va̱ kuni ne̱ kuꞌu̱n vi̱koꞌ miiꞌ tu̱ndaꞌa̱ꞌ Mbe̱e̱ Lulu
9 Sa̱kanꞌ te̱ ni̱ kaꞌa̱n i̱i̱n ángele xiinꞌ i̱ ndii:
―Ke̱ꞌi̱ u̱nꞌ ña̱ yo̱ꞌo̱ꞌ: “Sañuꞌuꞌ va̱ Ndiosí ne̱ yivi̱ꞌ, ne̱ ni̱ ta̱tu̱ a̱, te̱ kuꞌu̱n ni̱a̱, te̱ ku̱xi̱ ni̱a̱ ña̱ xaxi̱ꞌ xa̱kuaa̱ꞌ vi̱koꞌ miiꞌ tu̱ndaꞌa̱ꞌ Mbe̱e̱ Lulu ja̱a̱nꞌ” ―ni̱ kachi̱ a̱.
Te̱ ni̱ kaꞌa̱n ka̱ ángele ja̱a̱nꞌ xiinꞌ i̱ ndii:
―Tu̱ꞌu̱n ndi̱xa̱, ña̱ kaꞌán Ndiosí, nduuꞌ ña̱ yo̱ꞌo̱ꞌ ―ni̱ kachi̱ a̱.
10 I̱kanꞌ te̱ ni̱ na̱ka̱nduꞌu̱ꞌ ndi̱e̱e̱ i̱ nuu̱ꞌ a̱ te̱ sa̱kaꞌnuꞌ ña̱ꞌaꞌ i̱, ndisu̱ ni̱ kaꞌa̱n a̱ xi̱i̱nꞌ i̱ ndii:
―Sä̱kaꞌnuꞌ u̱nꞌ yuꞌu̱. Kua̱chi̱ ndii i̱i̱n ña̱ xikaꞌ nuuꞌ nuu̱ꞌ Ndiosí nduuꞌ i̱ xiinꞌ u̱nꞌ xiinꞌ i̱nga̱ ne̱ i̱ni̱ xini ña̱ꞌaꞌ, ne̱ itaꞌ ni̱ꞌi̱ nuu̱ꞌ ña̱ ndi̱xa̱, ña̱ kaꞌán xaꞌa̱ꞌ Jesús. Ndiosí kui̱ti̱ꞌ sa̱kaꞌnuꞌ u̱nꞌ. Te̱ ña̱ ndi̱xa̱, ña̱ kaꞌán xaꞌa̱ꞌ Jesús, nduuꞌ ña̱ ni̱ ta̱xi̱ ña̱ ndi̱e̱e̱ꞌ nuu̱ꞌ ne̱ kaꞌán tiakú tu̱ꞌu̱n Ndiosí ―ni̱ kachi̱ ángele ja̱a̱nꞌ.
Ketaꞌ i̱i̱n ña̱ yoso̱ꞌ kuei ya̱a̱
11 Sa̱kanꞌ te̱ ni̱ xi̱ni̱ i̱ ña̱ nuniaꞌ ndi̱viꞌ. Te̱ ni̱ xi̱ni̱ i̱ i̱i̱n kuei ya̱a̱. Te̱ ña̱ yoso̱ꞌ tiꞌ ja̱a̱nꞌ ndii, ña̱ xachuunꞌ nda̱ku xiinꞌ ña̱ ndi̱xa̱ naniꞌ a̱. Te̱ sanaꞌmá nda̱ku a̱, te̱ tiinꞌ nda̱ku tu̱ a̱ ñuꞌu̱.
12 Te̱ ndu̱chiꞌ nuu̱ꞌ a̱ ndii, yiꞌé a̱ nde̱e̱ naa ñuꞌu̱ ndatin. Te̱ xíniꞌ a̱ ndii, yoo kuaꞌa̱ꞌ tivi̱. Te̱ i̱i̱nꞌ a̱ ndii, yoso̱ꞌ i̱i̱n kivi̱ꞌ ña̱ nde̱e̱ i̱i̱n ne̱ yivi̱ꞌ xïní, süu̱ꞌ ja̱a̱nꞌ ndii mi̱iꞌ kui̱ti̱ꞌ a̱ xiní ña̱ ja̱a̱nꞌ.
13 Te̱ ndi̱ꞌi̱ ndo̱o̱ toto̱ a̱ ni̱ ka̱ꞌma̱ níiꞌ, te̱ tu̱ꞌu̱n Ndiosí na̱niꞌ a̱.
14 Te̱ kuaꞌa̱ꞌ ti̱ꞌvi̱ te̱ xíinꞌ kuenta ndi̱viꞌ, te̱ niꞌnuꞌ toto̱ va̱ꞌa̱ ya̱a̱ ndo̱o̱ va̱, kuaꞌa̱n xiinꞌ a̱ yoso̱ꞌ ra̱ kuei ya̱a̱.
15 Te̱ yu̱ꞌuꞌ a̱ ndii, ketaꞌ i̱i̱n ichi̱ xíinꞌ va̱ ña̱ ti̱i̱n a̱ te̱ sa̱tu̱xuꞌví a̱ sa̱kuuꞌ ne̱ ndieeꞌ i̱i̱n yivi̱ꞌ. Te̱ ka̱ꞌndi̱a̱ chuunꞌ vie̱ a̱ nuu̱ꞌ ne̱ ja̱a̱nꞌ. Te̱ kuei̱n ndo̱so̱ꞌ ña̱ꞌaꞌ a̱ nde̱e̱ naa xeín ndo̱so̱ꞌ te̱ yivi̱ꞌ uva, te̱ ta̱va̱ꞌ a̱ ti̱kui a̱. Te̱ teꞌ ja̱a̱nꞌ nduuꞌ ña̱ xiꞌé xa̱va̱ꞌa̱ Ndiosí, ña̱ kaꞌnuꞌ kooꞌ chukuuꞌ, xini a̱ ne̱ ja̱a̱nꞌ.
16 Te̱ nuu̱ꞌ toto̱ a̱ xiinꞌ si̱ꞌi̱n a̱ ndii, yoso̱ꞌ kivi̱ꞌ ña̱ kaꞌán ndii: “Ña̱ xaꞌndia chuunꞌ kuuꞌ nu̱uꞌ nuu̱ꞌ sa̱kuuꞌ te̱ xaꞌndia chuunꞌ kuuꞌ nu̱uꞌ. Xto̱ꞌo̱ kuuꞌ nu̱uꞌ nuu̱ꞌ sa̱kuuꞌ xto̱ꞌo̱.” Sa̱kanꞌ yoso̱ꞌ a̱.
17 Sa̱kanꞌ te̱ ni̱ xi̱ni̱ i̱ iinꞌ i̱i̱n ángele nuu̱ꞌ ñu̱ꞌu̱. Te̱ ni̱ kaꞌa̱n tiꞌeꞌ a̱ xiinꞌ sa̱kuuꞌ nuu̱ꞌ sa̱a̱, tiꞌ taꞌnuꞌ ndi̱viꞌ ndii:
―Ni̱a̱ꞌa̱ ndo̱ꞌ, te̱ na̱kaya̱ ndo̱ꞌ, te̱ ko̱o̱ mani̱ꞌ va̱ ndo̱ꞌ ña̱ xaxi̱ꞌ xa̱kuaa̱ꞌ sa̱a̱ Ndiosí.
18 Ni̱a̱ꞌa̱ ndo̱ꞌ, te̱ ka̱xi̱ꞌ ndo̱ꞌ ñu̱ꞌuꞌ ndeꞌi̱ te̱ xaꞌndia chuunꞌ kuuꞌ nu̱uꞌ, xiinꞌ ñu̱ꞌuꞌ ndeꞌi̱ te̱ xíinꞌ kuuꞌ nuu̱ꞌ, xiinꞌ ñu̱ꞌuꞌ ndeꞌi̱ te̱ xíinꞌ ndi̱e̱eꞌ va̱, xiinꞌ ñu̱ꞌuꞌ ndeꞌi̱ kuei, xiinꞌ te̱ yoso̱ꞌ riꞌ. Ni̱a̱ꞌa̱ ndo̱ꞌ, te̱ ka̱xi̱ꞌ ndo̱ꞌ ñu̱ꞌuꞌ ndeꞌi̱ sa̱kuuꞌ nuu̱ꞌ ne̱ yivi̱ꞌ, naa kuuꞌ ñu̱ꞌuꞌ ndeꞌi̱ ne̱ xikaꞌ ndiká xiinꞌ ñu̱ꞌuꞌ ndeꞌi̱ ne̱ xikoꞌ niꞌiꞌ i̱i̱n xto̱ꞌo̱, te̱ ka̱xi̱ꞌ tu̱ ndo̱ꞌ ñu̱ꞌuꞌ ndeꞌi̱ ne̱ kaꞌnuꞌ, xiinꞌ ñu̱ꞌuꞌ ndeꞌi̱ ne̱ ndaꞌvi so̱ꞌo̱ ―ni̱ kachi̱ ángele.
19 Sa̱kanꞌ te̱ ni̱ xi̱ni̱ i̱ ña̱ ni̱ ndu̱i̱i̱n tiꞌ i̱yo̱ va̱ kaaꞌ, xiinꞌ te̱ xaꞌndia chuunꞌ kuuꞌ nu̱uꞌ nuu̱ꞌ ne̱ yivi̱ꞌ i̱i̱n yivi̱ꞌ, xiinꞌ sa̱kuuꞌ te̱ xíinꞌ ra̱, te̱ ku̱ntaꞌanꞌ riꞌ xiinꞌ ña̱ yoso̱ꞌ kuei ya̱a̱ xiinꞌ te̱ xíinꞌ a̱.
20 Sa̱kanꞌ te̱ ni̱ xi̱kuꞌu̱n tiꞌ i̱yo̱ va̱ kaaꞌ ja̱a̱nꞌ xiinꞌ te̱ kaꞌán tiakú tu̱n vixi̱, te̱ ni̱ xa̱a̱ chu̱u̱n kaꞌnuꞌ. Te̱ xiinꞌ chu̱u̱n ja̱a̱nꞌ ni̱ xi̱ni̱ xaꞌanꞌ ra̱ ne̱ yivi̱ꞌ, ne̱ ni̱ na̱ti̱i̱n tuni̱ tiꞌ ja̱a̱nꞌ, te̱ ni̱ sa̱kaꞌnuꞌ tu̱ ni̱a̱ ña̱ nianiaꞌ riꞌ. Te̱ ni̱ sko̱ꞌniꞌ tiaku Ndiosí tiꞌ i̱yo̱ kaaꞌ ja̱a̱nꞌ xiinꞌ te̱ kaꞌán tiakú tu̱n vixi̱ ja̱a̱nꞌ mi̱ni̱ miiꞌ ndatin ñuꞌu̱ xiinꞌ azufre.
21 Te̱ ni̱ xa̱ꞌni̱ꞌ ña̱ yoso̱ꞌ kuei sa̱kuuꞌ i̱nga̱ ne̱ ni̱ ku̱ntaꞌanꞌ xiinꞌ a̱ ja̱a̱nꞌ xiinꞌ ichi̱ ña̱ ketaꞌ yu̱ꞌuꞌ a̱ ja̱a̱nꞌ. Te̱ ni̱ nda̱ꞌni̱ va̱ sa̱kuuꞌ sa̱a̱ ja̱a̱nꞌ kii̱ꞌ ni̱ xa̱xi̱ꞌ riꞌ ñu̱ꞌuꞌ ndeꞌi̱ ne̱ ja̱a̱nꞌ.