5
Yoꞌoꞌ kaꞌán Juan xaꞌa̱ꞌ tu̱tu̱ ña̱ iinꞌ tuví xiinꞌ xaꞌa̱ꞌ mbe̱e̱ Lulu
1 Te̱ ni̱ xi̱ni̱ i̱ ña̱ nda̱ꞌaꞌ kua̱ꞌa̱ ña̱ nduꞌu̱ꞌ nuu̱ꞌ tei̱ kaꞌnuꞌ ja̱a̱nꞌ ndii, tiinꞌ a̱ i̱i̱n tu̱tu̱ ña̱ iinꞌ tuví, te̱ yoo ña̱ yoso̱ꞌ nuu̱ꞌ a̱ xiinꞌ xata̱ꞌ a̱. Te̱ ndasi kutu̱ꞌ a̱ xiinꞌ uxa̱ ta̱ꞌan chi̱ꞌnduꞌ.
2 Te̱ ni̱ xi̱ni̱ tu̱ i̱ i̱i̱n ángele kaꞌnuꞌ va̱ ña̱ kaꞌán ndo̱so̱ꞌ tiꞌeꞌ va̱ ndii:
―¿Yo̱o̱ nduuꞌ ne̱ xataꞌa̱n ta̱ꞌviꞌ chi̱ꞌnduꞌ kaa̱ꞌ te̱ nu̱niaꞌ ni̱a̱ tu̱tu̱ kaa̱ꞌ? ―ni̱ kachi̱ a̱.
3 Ndisu̱ kö̱o̱ꞌ nde̱e̱ i̱i̱n ña̱ xataꞌa̱n nu̱niaꞌ tu̱tu̱ ja̱a̱nꞌ, ni̱ nde̱e̱ ndi̱viꞌ, ni̱ nde̱e̱ nuu̱ꞌ ñu̱ꞌuꞌ i̱i̱n yivi̱ꞌ, ni̱ nde̱e̱ ti̱xi̱n ñu̱ꞌuꞌ ndii, kö̱o̱ꞌ ña̱ kooꞌ chukuuꞌ, te̱ nu̱niaꞌ a̱ tu̱tu̱ ña̱ iinꞌ tuví ja̱a̱nꞌ, te̱ ka̱ꞌvi̱ ña̱ꞌaꞌ a̱.
4 Te̱ ni̱ xa̱ku̱ kuaꞌa̱ꞌ i̱, sa̱kanꞌ ña̱ kö̱o̱ꞌ nde̱e̱ i̱i̱n ña̱ xataꞌa̱n te̱ nu̱niaꞌ a̱ tu̱tu̱ ja̱a̱nꞌ, te̱ ka̱ꞌvi̱ ña̱ꞌaꞌ a̱.
5 Sa̱kanꞌ te̱ ni̱ kaꞌa̱n i̱i̱n ña̱ xi̱xa̱ ja̱a̱nꞌ xiinꞌ i̱ ndii:
―Kuä̱ku̱ ka̱ u̱nꞌ. Ko̱to̱ u̱nꞌ, ña̱ nduuꞌ león kuenta ne̱ vi̱ꞌe̱ Judá, ña̱ nduuꞌ tu̱ si̱a̱niꞌ xikaꞌ kaꞌnuꞌ David ndii, xa̱ ni̱ ka̱nando a̱ nuu̱ꞌ ña̱ ndi̱va̱ꞌa̱, sa̱kanꞌ na yoo ndi̱e̱e̱ꞌ a̱ te̱ ta̱ꞌviꞌ a̱ uxa̱ sa̱aꞌ chi̱ꞌnduꞌ kaa̱ꞌ, te̱ nu̱niaꞌ a̱ tu̱tu̱ ña̱ iinꞌ tuví kaa̱ꞌ ―ni̱ kachi̱ a̱ xiinꞌ i̱.
6 Sa̱kanꞌ te̱ ni̱ xi̱ni̱ i̱ ña̱ ma̱ꞌinꞌ ku̱miꞌ sa̱aꞌ ña̱ tiaku ja̱a̱nꞌ, xiinꞌ ma̱ꞌinꞌ miiꞌ iinꞌ tei̱ kaꞌnuꞌ ja̱a̱nꞌ, xiinꞌ ma̱ꞌinꞌ ña̱ xi̱xa̱ ja̱a̱nꞌ iinꞌ i̱i̱n ña̱ nduuꞌ Mbe̱e̱ Lulu. Te̱ ña̱ ja̱a̱nꞌ ndii, niaꞌá i̱i̱nꞌ a̱ ña̱ ni̱ xa̱ꞌni̱ꞌ ña̱ꞌaꞌ ne̱ yivi̱ꞌ. Te̱ ni̱ yoo̱ uxa̱ taꞌan ndi̱kiꞌ a̱, te̱ ni̱ yoo̱ tu̱ uxa̱ taꞌan ndu̱chiꞌ nuu̱ꞌ a̱. Ña̱ ja̱a̱nꞌ nduuꞌ uxa̱ taꞌan Espíritu, ña̱ tianu̱ꞌ Ndiosí nuu̱ꞌ ne̱ ndieeꞌ ka̱niiꞌ i̱ꞌi̱n xaanꞌ i̱i̱n yivi̱ꞌ.
7 Te̱ ni̱ xaꞌa̱n na̱ti̱i̱n Mbe̱e̱ Lulu ja̱a̱nꞌ tu̱tu̱ ña̱ iinꞌ tuví ja̱a̱nꞌ nda̱ꞌaꞌ kua̱ꞌa̱ ña̱ nduꞌu̱ꞌ nuu̱ꞌ tei̱ kaꞌnuꞌ ja̱a̱nꞌ.
8 Te̱ kii̱ꞌ ni̱ na̱ti̱i̱n a̱ tu̱tu̱ ja̱a̱nꞌ ndii, ni̱ xi̱ku̱ndiee̱ ndi̱e̱e̱ ku̱miꞌ sa̱aꞌ ña̱ tiaku ja̱a̱nꞌ xiinꞌ oko̱ ku̱miꞌ sa̱aꞌ ña̱ xi̱xa̱ ja̱a̱nꞌ nuu̱ꞌ Mbe̱e̱ Lulu ja̱a̱nꞌ. Te̱ i̱ꞌi̱n ña̱ ja̱a̱nꞌ tiinꞌ i̱i̱n ñuu̱ꞌ ña̱ xandaaꞌ, ña̱ naniꞌ arpa, te̱ ni̱ ti̱i̱n tu̱ a̱ koꞌo̱ꞌ oro miiꞌ ñuꞌuꞌ su̱xa̱ chúꞌma. Te̱ su̱xa̱ chúꞌma ja̱a̱nꞌ nduuꞌ ña̱ kaꞌán ne̱ nduuꞌ kuenta Ndiosí xiinꞌ a̱.
9 Te̱ ni̱ xi̱ta̱ a̱ i̱i̱n ya̱a̱ xa̱aꞌ nuu̱ꞌ Mbe̱e̱ Lulu ja̱a̱nꞌ kaꞌán a̱ ndii:
Xataꞌa̱n ña̱ na̱ti̱i̱n yoꞌó tu̱tu̱ ña̱ iinꞌ tuví kaa̱ꞌ,
te̱ ta̱ꞌviꞌ u̱nꞌ chi̱ꞌnduꞌ kaa̱ꞌ,
sa̱kanꞌ ña̱ xa̱ ni̱ xa̱ꞌni̱ꞌ te̱ yivi̱ꞌ yoꞌó,
te̱ xiinꞌ níiꞌ u̱nꞌ ni̱ ki̱ꞌi̱n u̱nꞌ sa̱kuuꞌ nuu̱ꞌ ne̱ yivi̱ꞌ
te̱ ku̱ndu̱u̱ ni̱a̱ ndi̱ti̱a̱ Ndiosí.
Te̱ ni̱ ki̱e̱e̱ sa̱kuuꞌ ne̱ ja̱a̱nꞌ nuu̱ꞌ sa̱kuuꞌ i̱ꞌi̱n ti̱ꞌvi̱ chie̱,
nuu̱ꞌ ne̱ yoo tu̱ꞌu̱n mi̱iꞌ,
xiinꞌ nuu̱ꞌ sa̱kuuꞌ ñu̱u̱ kaꞌnuꞌ xiinꞌ nda̱ꞌaꞌ a̱,
xiinꞌ nuu̱ꞌ sa̱kuuꞌ nuu̱ꞌ ne̱ yivi̱ꞌ.
10 Te̱ ni̱ sa̱na̱nduuꞌ ña̱ꞌaꞌ u̱nꞌ i̱i̱n ti̱ꞌvi̱ ne̱ xaꞌndia chuunꞌ kuuꞌ nu̱uꞌ,
te̱ ku̱ndu̱u̱ tu̱ ni̱a̱ sutu̱,
te̱ ka̱ka̱ nu̱u̱ ni̱a̱ nuu̱ꞌ Ndiosí e̱ꞌ.
Te̱ ka̱ꞌndi̱a̱ chuunꞌ ni̱a̱ nuu̱ꞌ ne̱ yivi̱ꞌ i̱i̱n yivi̱ꞌ.
Ni̱ kachi̱ ña̱ xi̱xa̱ ja̱a̱nꞌ.
11 I̱kanꞌ te̱ ni̱ xi̱ni̱ i̱ mií ni̱ mií ni̱ ángele sa̱a̱ kuaꞌa̱n xi̱i̱nꞌ tei̱ kaꞌnuꞌ ja̱a̱nꞌ. Te̱ ni̱ xi̱ni̱ so̱ꞌo̱ tu̱ i̱ tachi̱ꞌ yu̱ꞌuꞌ a̱, xiinꞌ tachi̱ꞌ yu̱ꞌuꞌ ku̱miꞌ sa̱aꞌ ña̱ tiaku ja̱a̱nꞌ, xiinꞌ ña̱ xi̱xa̱ ja̱a̱nꞌ.
12 Te̱ tiꞌeꞌ ni̱ kua̱aꞌ sa̱kuuꞌ ña̱ ja̱a̱nꞌ ndii:
Mbe̱e̱ Lulu, ña̱ xa̱ ni̱ xa̱ꞌni̱ꞌ te̱ yivi̱ꞌ yoꞌoꞌ ndii,
xataꞌa̱n ña̱ na̱ti̱i̱n a̱ ña̱ ndi̱e̱eꞌ,
xiinꞌ ña̱ vikaꞌ,
xiinꞌ ña̱ ndichi va̱.
xiinꞌ ndi̱e̱e̱ꞌ,
xiinꞌ ña̱ ti̱i̱n kaꞌnuꞌ ña̱ꞌaꞌ e̱ꞌ,
xiinꞌ ña̱ nda̱tu̱nꞌ xa̱va̱ꞌa̱,
xiinꞌ ña̱ xakaꞌnuꞌ e̱ꞌ nuu̱ꞌ a̱.
Ña̱ ja̱a̱nꞌ ni̱ kachi̱ a̱.
13 Te̱ ni̱ xi̱ni̱ so̱ꞌo̱ i̱ kaꞌán sa̱kuuꞌ ña̱ ni̱ xa̱ꞌa̱ Ndiosí, naa kuuꞌ ña̱ ndieeꞌ ndi̱viꞌ, xiinꞌ ña̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ, xiinꞌ ña̱ ñuꞌuꞌ ti̱xi̱n ñu̱ꞌuꞌ, xiinꞌ tiꞌ ñuꞌuꞌ mi̱ni̱ kaꞌnuꞌ ndii:
Ña̱ nduꞌu̱ꞌ nuu̱ꞌ tei̱ kaꞌnuꞌ kaa̱ꞌ xiinꞌ Mbe̱e̱ Lulu ndii,
na na̱ti̱i̱n a̱ ña̱ xakaꞌnuꞌ ña̱ꞌaꞌ e̱ꞌ,
xiinꞌ ña̱ tiinꞌ kaꞌnuꞌ ña̱ꞌaꞌ e̱ꞌ
xiinꞌ ña̱ nda̱tu̱nꞌ xa̱va̱ꞌa̱,
xiinꞌ ña̱ ndi̱e̱e̱ꞌ nde̱e̱ ndiꞌiꞌ ni̱ kivi̱ꞌ.
Ni̱ kachi̱ a̱.
14 Te̱ ni̱ kaꞌa̱n ku̱miꞌ sa̱aꞌ ña̱ tiaku ja̱a̱nꞌ ndii:
―Sa̱kanꞌ na ku̱ndu̱u̱ a̱ ―ni̱ kachi̱ a̱.
Te̱ ni̱ xi̱ku̱ndiee̱ ndi̱e̱e̱ oko̱ ku̱miꞌ saaꞌ ña̱ xi̱xa̱ ja̱a̱nꞌ, te̱ ni̱ xa̱kaꞌnuꞌ a̱ ña̱ tiaku nde̱e̱ ndiꞌiꞌ ni̱ kivi̱ꞌ ja̱a̱nꞌ.