Nihn Paul Kijilikoau oang Mwomwohdjohn
Galatia
Oarlap in Kijilikoau oauwe
Nehn en Rongmwehu ne lolohkjili apel lellahng ipen armaj kan ma jaudi mihn Jew, iren peidek oau ken pwarda doahroar ma armaj emen uhdahn pirin peikkoang Kojonned in Moses pwa en wia joauloang mehlel men. Paul koajoanehdi ma irair oauwe johpwa uhdahn koanoahng pwa poahjoan mehlelloar in mour ipen Jesus Christ, ioar pwojon Christ, ma armaj ohroj kin pwungkihla ipen Koahs. A nehn mwomwohdjo kan in Galatia, wei oau ma kijehn wein Rome nehn Asia, mine armaj pwi ma uhwoang Paul apel kin siksikoa pwa dapwa armaj uhdahn pirin kapwaihahda kojonned in Moses pwa en pel pwungla ipen Koahs.
Nihn Paul kijilikoau oang Mwomwohdjohn Galatia ne insingdi en kajpahlihdohng nehn pwojon mehlel apel mourin joauloang mehlel irai kan ma ne woahwoahki padahk japwung oauwe. Paul sapkihda doahroar ah pwungin adanki wahnpoaroan in Jesus Christ jang iraihok ma kin pwa jaudi ih wahnpoaroan mehlel men. Ih kin sihkeiki ma ah poangpoang oang doadoahk in wahnpoaroan injang ipen Koahs, jaudi jang in koajoandi en armaj. Apel ah doadoahk in wahnpoaroan uhdahn pirin wiawi ipen mihn likin kan. Mwuhr ih pel kawoahwoahda doahr armaj kan ahr kin pwungla ipen Koahs jang in pwojon. In kaimwjeklahn iroa koalik kan en kijilikoau kije, Paul kajalehda pwa mourin joauloang kin injang in limpoak ma kin poahjoankihda pwojon Christ.
Audoapoa in Oarlap
Sapin kijilikoau 1:1-10
En Paul manman doahroar wahnpoaroan men 1:11—2:21
Rongmwehu in kalahngan in Koahs 3:1—4:31
En joauloang kan ahr jaldek apel pwukoa 5:1—6:10
Koarjoahklahn kijilikoau 6:11-18
1
1 Jang Paul, ma ah poangpoang oang wahnpoaroan johpwa sapjang ipen armaj ke jang in poangpoang oau ma jang armaj; pwa pwen jang ipen Jesus Christ apel Koahs Jahm ma kaiejda Jesus jang mehdi.
2 Riasai joauloang ohroj ma minmine me pel pwili rahnmwahu oang sohn mwomwohdjohn Galatia kan:
3 Kalahngan apel popohl jang Jamasai Koahs apel asai Koaun Jesus Christ oang kamwai.
4 Pwa en kajaldekla kisai nehn anjoau nauna oauwe, Christ ne meiroangkihla pein Ih pwa dipasai kan, jangin Ah peik oang kupwuren Koahs ma ioar Jamasai Koahs.
5 Klori en aluhwoang Koahs jang apkas apel allaluhla! Amen.
Rongmwehu Oauwoar
6 Ngoahi pwuriamweikihla amwai pispis in kerpwihla Ih ma panginkihdo kamwai kalahngan en Christ, a kamwai pwilihla oau rongmwehu sohrohr.
7 A in mehlel, johpwa pel oau rongmwehu sohrohr mine, a ngoahi sikoa me pwa mine epwi armaj ma kapingda kamwai apel kin jong in kawikla Rongmwehu in Christ.
8 A mihnda ma pel kamai, ke sohnloang men jang nehnloannge, ma en padahkihoang kamwai oau rongmwehu ma sohrohr jang Rongmwehu ma kamai ne padahkihoang kamwai, a koanoahng ih en riahla.
9 Kamai ne sikoa mijkoalkoal apel apkas, ngoahi pirin pel pwuroahng sikoa: ma emen ma pirin padahkihoang kamwai oau Rongmwehu sohrohrjang ma kamwai ne oaloa, a ih en pel riahla!
10 Ngoahi en rapahki kenken ipen armaj ke ipen Koahs? Ma ngoahi nimen admwehula ipen armaj kan? Doari, jaudi ngoahi lidu in Christ men.
Imdoahr Paul wiahla Wahnpoaroan men
11 Rioai kan, ngoahi nimen pwehng kamwai me: Rongmwehu ma ngoahi kin padpadahkkihjili, jaudi jang ipen armaj.
12 Ngoahi pel johpwa oaloa Rongmwehu jang ipen armaj men, ke armaj padahkihoang ngoahi. A pein Jesus Christ ma kajalehioang ngoahi.
13 Pein kamwai ne rong sikesik in oai mour nehn anjoauwo ma ngoahi poadidihoang lamlam in mihn Jew‑ok, doahr oai kin inenin koalkoa mwomwohdjohn Koahs, apel wia uhwen oai kak en kamwommwomwla.
14 Ngoahi ma keiou ipen ioangoai mihn Jew kan ma kamai wia dioau nehn siahk in loapin lamlam in mihn Jew, apel ngoahi keiou poadidihoang siahk kan in jamasai koalikkok.
15 A jang in Ah kalahngan, Koahs pilda ngoahi mwohn oai kahjik noaisikdi, apel pangin ngoahi pwa ngoahi en papah Ih, nehn Ah koajoandi
16 en kajalehioang ngoahi Nah Iehroj, pwa ngoahi en kalohki oang mihn likin kan Rongmwehu doahr Ih; ngoahi johpwa lelki armaj emen en kaweidki ngoahi me;
17 apel ngoahi johpwa inla Jerusalem pwa ngoahi en suhwoang iraihok ma ne wahnpoaroanla mwohn ngoahi. A ngoahi pispisla Arabia ngoahi kapwa pwurla Damascus.
18 A mwerin johnpar jiluh ngoahi kapwa indahla Jerusalem pwa ngoahi en suhwoang Cephas, apel ngoahi minminehki ipoa wihk riau.
19 Ngoahi johpwa suhwoang epwi wahnpoaroannok, a ioarroar ngoahi suhwoang James, rien Koaunno.
20 Pid mehkan ma ngoahi insingkihwe oang kamwai, mehlel oau me, mwohn Koahs ngoahi joh kin likamw!
21 Mwerin, ngoahi pel inlahng Syria apel Cilicia.
22 Nehn anjoauwo joauloang in mwomwohdjohn Christ kan nehn Judea kahjikkoar kidal ngoahi.
23 A ioarroar irai kidal, da irai rong jang irai kan ma pwa, “Woallo ma kin koalkoa kisai mehjwa, ioar ih ma kin padpadahkkihjili pwojonno ma ih jong in kamwomwla mehjwa!”
24 Irai kin kapkapnga Koahs ki ngoahi.