13
Jesus Amwun pwoalkoan Nah Sohnpadahkkok
1 Doari, rehn oau mwohn Joarwihn Passover. Jesus ne kidal pwa Ah anjoau ne lel en injang jampah oauwe, inlahng ipen Jamahu. Ih kin pwen ipwilki Nah kan ma minmine jampah, a Ih kin pel ipwilki irai lel in imwin.
2 Jesus apel Nah sohnpadahkkok mwingmwinge en joausik. Jehsen ken kainoangihda Judas, nihn Simon Iscariot, pwa en pangla Jesus.
3 Jesus kidal pwa Jamahu kioang Ih manman unjek. Ih pel kidal pwa Ih indoa jang ipen Koahs apel pirin japahlla Ipoa.
4 Jesus ken uhda jang in sehpillo, kihjang Ah likkoaun likinno, Ih piroahkihdi lopkoa daulloau.
5 Ih ken widekihdihoang pil nehn pahn oau Ih sapda amwunki pwoalkoan Nah sohnpadahkkok, apel limwihki daullo ma mine in lopkoa.
6 Nehn Ah lel ipen Simon Peter, Peter pwehng Ih, “Maing oai Koaun, Koawoa pirin amwun pwoalkoaioa?”
7 Jesus japoang, “Koawoa joah kidal da ma Ngoahi wihwia anjoau oauwe, a mwuhr, koawoa pirin woahwoahkihda.”
8 Peter pwehng Ih, “Koawoa jehpirin amwun pwoalkoaioa!”
Jesus japoang, “Ma Ngoahi jehpirin amwun pwoalkoamwen, koawoa johla pirin wia Noai sohnpadahk.”
9 Simon Peter japoang, “Maing oai Koaun, jaudi pwoalkoaihoahr doari ma Koawoa pirin amwun, pwa pel poaihoa apel moangoaihoa!”
10 Jesus pwahla, “Irai ma ne duhduhlahroh mwakelkel, apel joh kaspoan en pwuroahng duhdu, pwa irai ne mwakelkel; ioarroar, en amwunla pwoalkoarai. Doari, kamwai ohroj ne mwakelkella, a emennoar johpwa.”
11 (Pwa Jesus kidal inje ma pirin pangla Ih; ioar kahrehda Ih pwa, “Kamwai ohroj ne mwakelkella, a emennoar johpwa.”)
12 Mwerin ah amwunla pwoalkoarai ohroj, ih pwuroahng dilloang nehn Ah likkoaun likinno, ih pel japahllahng dohiahu in sehpillo. Ih ken idoak, “Imdoahr, amwai woahwoahki dahkij Ngoahi kapwehsene wiahioang kamwai?
13 Kamwai kin panginki Ngoahi Jounpadahk apel Koaun; men pwung amwai pwa apkas, pwa ioar Ngoahi ma Ih.
14 Ngoahi, amwai Koaun apel Jounpadahk, ma kapwehsene amwunla pwoalkoamwai kan. Kamwai uhdahn pirin amwun pwoalkoan emenemen kamwai.
15 Ngoahi wiahioang kamwai karajpoa oau, pwa kamwai en pel wia doahroar ma Ngoahi kapwehsene kajalehioang kamwai.
16 Ngoahi pwehng kamwai in mehlel: joh lidu men mine ma kin laplap jang ah koaun; joh jounpakair men mine ma laplap jang armajjo ma kadarla ih.
17 Apkas kamwai kidal pwa padahk mehlel pas me; doari, ia woahr amwai peren ma kamwai pirin kapwaihahda!
18 “Ngoahi joah siksikoa doahroar kamwai ohroj, pwa Ngoahi kidal iraihok Ngoahi ne pilda. A lal in Puk Joarwi uhdahn pirin pwoaida, ma pwa, ‘Emen ma pwili kang koanoai mwingehi pirin pallan Ngoahi.’
19 Anjoau kije Ngoahi pwehng kamwai mehpwiai mwohn ahr pirin wiawi, pwa nehn ahr pirin pwoaida, kamwai en pwojon pwa ‘Ngoahi ioar Ngoahi.’
20 Ngoahi pwehng kamwai in mehlel, emen ma kin kajamwo emen ma Ngoahi kadarwe, Ngoahi ma ih kin kajamwo; apel emen ma kin kajamwo Ngoahi, ioar ih ma kin kajamwo Ih ma kadardo Ngoahi.”
Jesus Kohpda doahroar Ah pirin Panngekla
21 Nehn en Jesus Ah pwahla mehpwiai, Ih pel injinjuwedla, pwa, “Ngoahi pwehng kamwai in mehlel: emen jang nehn pwungamwai kan pirin pangla Ngoahi.”
22 Sohnpadahkkok jipwjipwoalpene nehn pwungarai, inenin jawoahwoahkihda inje Ih sikoahki lal pwiai.
23 Doari, emen nehn pwungen sohnpadahkkok, ma Jesus kin ipwilki, mwindi ipen Jesus.
24 Simon Peter ken pwurlahng ih, idoak, “Kalelpoak ipoa pwa inje ma Ih pwahki me.”
25 Sohnpadahkko ken sohlahng ipen Jesus, idoakkoang Ih, “Maing amai Koaun, inje ioar ih?”
26 Jesus japoang, “Ngoahi pirin kaduhdi pilahwa kije nehn dal oauwe, kioang ih; ioar ih woalwa.” Doari, Ih ken kihda pilahwa kij kaduhdi, Ih kioang Judas, nihn Simon Iscariot.
27 Nehn anjoauwohr ma Judas oaloa pilahwahu, Jehsen dilloang nehn ih. Jesus pwehnglahng Judas, “Pispis wiahda dahkij koawoa uhdahn pirin wia!”
28 Joh emen iparai in sehpillo woahwoahki amwda Jesus ke pwa me.
29 Pwa Judas kin kohwahki pehkin mwaniho, epwi sohnpadahkkok lemlemehkihoang pwa Jesus pwehng ih en inla dupukda dahkij irai anahne oang kamdippwo, ke ih pirin kijkijoa min joamwoahmwoa kan ki mehkij.
30 Judas oaloa pilahwahu, pispisinnoar dilla. Anjoauwo ne pwong.
Kojonned Kappwo
31 Mwerin Judas ah dilla, Jesus pwahla, “Ioar anjoauwa me ma ling in Nihn‑Armaj pirin janjalda. Anjoauwa me ma ling in Koahs ne janjalda nehn Ih.
32 Ma Nihn‑Armaj pirin kajalehda ling in Koahs, doari, pein Koahs pirin kajalehda ling in Nihn‑Armaj. Ih pirin wiahda apkas.
33 Noai jerihkan, Ngoahi jehpirin pwilpwili kamwai anjoau woaroai. Kamwai pirin rapahki Ngoahi, a apkas Ngoahi pwehng kamwai dahkij Ngoahi pwehng mihn Jew‑ok, ‘Kamwai johkak inla wijahu ma Ngoahi allaluhlahng.’
34 Ngoahi kioang kamwai kojonned kapw oau: kamwai en ipwilpene nehn pwungamwaikan. Doahroar Oai ipwilki kamwai, ioar doahroar kamwai en ipwilpene.
35 Armaj ohroj pirin kidalki pwa kamwai Noai sohnpadahk, ma kamwai pirin limpoakpene.”
Jesus Kohpda doahr en Peter pirin Kahmahmkihla Ih
36 Simon Peter kalelpoak, “Maing Koaun, ia wija koawoa pirin inla?”
Jesus japoang, “Koawoa johkak kaujla Ngoahi wijahu ma Ngoahi pirin inla anjoau kije; a mwuhr koawoa nen kak kauj Ngoahi.”
37 Peter pel pwuroahng kalelpoak, “Maing oai Koaun, dahkij kahrehda ngoahi johkak kaujki koawoa anjoau kije? Ngoahi ne onopda ngoahi en mehkihdi Koawoa!”
38 Jesus japoang ih, “Koawoa uhdahn ne koaunopda koawoa en mehkihdi Ngoahi? A, Ngoahi pwehng koawoa in mehlel: mwohn jummwa ah pirin joang, koawoa pirin kahmahmkihla pehn jiluh pwa koawoa jehjoa Ngoahi.”