8
Liho ma Diarekda nehn ah Kamwahl
1 [Doari, Jesus ken indahlahng pohn Dolin Olip.
2 Oh inminjoang in rehnwa mwerin, Ih ken japahllahng Umw Joarwiho. Sohn pokonno ohroj ken pokondohng ipoa; ih ken mwindi apel sapda padahk oang irai.
3 Jounpadahk in Kojonneddo pwi apel Pharisee pwi ukdohng ipen Jesus li men ma jipdi nehn ah kamwahl. Irai ken kioang liho en uhda mwohn ohroj,
4 irai ken idoakkoang Jesus, “Maing Jounpadahk, li mene jipdi nehn ah kamwahl.
5 Nehn asai Kojonneddo, Moses ruwoje pwa joangoan lihmene en kaskas oaroh mehdi. A koawoa, da koawoa pwahki me?”
6 Irai pwa me pwa en lidipihkihdi Jesus, pwa irai en kak kadpoahki Ih. A Jesus ken rukdi, insinge nehn pwirejjo ki jandinpoah.
7 A nehn irai uhda wijahu peipeidek, Jesus uhda pwehng irai, “Inje in nehn kamwai ma johkin wiahda dihp, ioar ih ma en sapin kasoahki lihmene sakai.”
8 Ih pel pwuroahng rukdi insinge nehn pwirejjo.
9 Nehn irai rongda me, irai ken allaluhpijoang wad emen, sapjang min mah kan. Jesus ken kalahpwukla, ipen liho ma uhda wijahu.
10 Jesus ken uhda, Ih ken idoak ipen liho, “Ia irai? Joh emen luhwoahdi pwa en kadipoa koawoa?”
11 Liho pwehng Ih, “Joh emen, Maing.”
Jesus ken pwehng ih, “Doari, Ngoahi pel jehpirin kadeikihda koawoa. Alwe a jang apkas inla koawoa joah pwuroahng wiahda dihp.”]
Jesus ma Maram in Jampah
12 Jesus pwuroahng pwehng Pharisee‑ok, “Ngoahi ma maram in jampah. Ma emen ma pirin pwilihdo Ngoahi nen anki maram in mour, apel johkak en allalu nehn ros.”
13 Pharisee‑ok ken pwehng Ih, “Koawoa kin kadehde doahroar pein Koawoa, doari, mehkan ma Koawoa siksikoa johkin kadehdehda mehkij.”
14 Jesus japoang, pwa, “Joah, mihnda ma Ngoahi kadehdehda pein Ngoahi, a Oai kadehde mehlel, pwa Ngoahi kidal wijahu ma Ngoahi indoahjang, apel wijahu ma Ngoahi pirin inlahng. A kamwai jehjoa wijahu ma Ngoahi indoahjang, ke wijahu ma Ngoahi pirin inlahng.
15 Kamwai kin wia kadeik in doahroar armaj, a Ngoahi johkin kadeik emen.
16 A ma Ngoahi pirin wia, Oai kadeikko nen mehlel; pwa Ngoahi joah kalahpwuk nehn doadoahk oauwe, pwa Jahmmo, ma kadardo ngoahi, ioar Ih ma pwilpwili Ngoahi.
17 Ne pel insingdi nehn amwai Kojonneddo, nehn en jounkadehde roahmen ara sikesik en pwungpene, ioar mehlel.
18 Doari, Ngoahi kin kadehdehda doahroar pein ngoahi, a Joamoaiho ma kadardo Ngoahi Ih pel kadehdehda doahroar Ngoahi.”
19 Irai ken kalelpoak ipoa, “Ia Joamoamw wa?”
Jesus japoang, pwa, “Kamwai jehjoa Ngoahi, apel jehjoa Joamoaiho. Ma kamwai kidal Ngoahi, kamwai nen pel kidal Joamoaiho.”
20 Jesus pwa mehpwiai ohroj nehn Ah padpadahk in Umw Joarwiho, nehn perehu ma dalen meiroang kan kin mine. A joh emen joalihdi Ih, pwa Ah anjoau kahjikkoar lel.
Kamwai Johkak Inla Wijahu ma Ngoahi pirin Inla
21 Jesus pel pwuroahng pwehng irai, “Ngoahi pirin inla, a kamwai nen rapahki Ngoahi, a kamwai nen mehdi nehn dipamwai kan. Kamwai johkak inla wijahu ma Ngoahi pirin inla.”
22 Doari, koaun in mihn Jew‑ok ken pwa, “Ih sikoa pwa, ‘Kamwai joh kak inla wijahu ma Ngoahi pirin inla.’ Imdoahr, me woahwoahki pwa Ih pirin pein kojukdi Ih?”
23 Jesus ken japoang, “Kamwai injang jampah, a Ngoahi indoa jang puwoa. Kamwai mihn jampah oauwe, a Ngoahi jaudi mihn jampah oauwe.
24 Ioar kahrpoan Oai pwehng kamwai, ma kamwai nen mehdi nehn dipamwai kan. A kamwai uhdahn nen mehdi nehn dipamwai kan ma kamwai johpwa kamehlele pwa ‘Ngoahi ioar ma ngoahi.’ ”
25 Irai kalelpoak ipoa, “Inje Koawoa?”
Jesus japoang, “Ma Ngoahi ne pwehng kamwai jang in sapdahu.
26 Dir me Ngoahi kak pwahki kamwai, dir me Ngoahi kak kadeikihki kamwai. A Ih ma kadardo Ngoahi, ioar mehlel; a Ngoahi pwehng jampah: mehkan ma Ngoahi ne rongjang Ih.”
27 A irai joah woahwoahki pwa Ih pwen pwehpwehpwehng irai mwomwen Jahmmo.
28 Jesus pel pwehng irai, “Nehn amwai pirin soanoakihda Nihn‑Armaj, ioar anjoau ma kamwai nen kidal pwa ‘Ngoahi ioar ma Ngoahi.’ Doari, kamwai nen kidal pwa Ngoahi joah wiahki mehkij jang pein Ngoahi. A Ngoahi kin pwa mehkannoar ma Jahmmo kin padahkihoang Ngoahi.
29 Apel Ih ma kadardo Ngoahi kin pwilpwili Ngoahi; Ih johkin kerpwihla ngoahi, pwa Oai kin wihwia mehkan ma Ih mwehuki.”
30 Doari, min dir ma rong Jesus nehn Ah pwa mehpwiai, irai kamehlelehla Ih.
Mehlello pirin Kapisla Kamwai
31 Jesus pwehng mihn Jew‑ok ma ne pwojonla, “Ma kamwai pirin peikkoang Oai padahk kan, kamwai pirin wiahla Noai sohnpadahk mehlel.
32 Apel kamwai pirin kidalla dahkij mehlel, a mehlello pirin kapisla kamwai.”
33 Irai ken japoang, “Kamai kadaudok en Abraham, a kamai kahjik wia lidu in emen jang ohmehj indoa. Ia woahwoahn Oamw lal en, ‘Kamwai pirin jaldekla?’ ”
34 Jesus pwehng irai, “Ngoahi pwehng kamwai in mehlel: ma emen ma kin wiahda dihp, ioar ih ma lidu in dihp.
35 A lidu men jaudi sowoa mehlel in peneinei oau oaroain. A jerihn peneinei men, ioar ih ma uhdahn sohn peneinei oaroain.
36 Doari, ma Nahu pirin kapisla kamwai, kamwai uhdahn pirin jaldekla mehlel.
37 Ngoahi kidal pwa kamwai kadaudok in Abraham pwi, a kamwai kin jong in kojukdi Ngoahi pwa amwai joah nimen oaloahda Oai lal kan.
38 Ngoahi kin siksikoa mehkan ma Jahmmo kin kajalehioang Ngoahi, a kamwai kin wia mehkan ma jamamwaihok padahkihoang kamwai.”
39 Irai japoang, “Jamamai, ioar Abraham.”
Jesus ken japoang, “Ma kamwai uhdahn nihn Abraham, kamwai pirin wihwia joangoan doadoahk kan ma ih wiahda.
40 Ioarroar Ngoahi ne wiahda, padahkihoang kamwai mehlello ma Ngoahi ne rongjang Koahs, a kamwai kin jongin kojukdi Ngoahi. Abraham johpwa wia joang oauwe!
41 Kamwai kin wihwia mehkan ma jamamwaiho ne wiahda.”
Irai japoang, “Koahs ioarroar Jamamai wa; a kamai ioar uhdahn Nah jeri.”
42 Jesus pwehng irai, “Ma Koahs pwen uhdahn jamamwai wa, kamwai nen ipwilki Ngoahi, pwa Ngoahi indoa jang ipen Koahs, a Ngoahi ne minmine me apkas. Ngoahi joah indoahki pein Oai manman, a Ih ma kadardo Ngoahi.
43 Dahkij kahrehda kamwai johkin woahwoahki mehkan ma Ngoahi sikoa? Pwa kamwai johkakkoang rong Oai padahk.
44 Kamwai kadaudok in Jehsen, pwa ih ioar jamamwai wa, apel kamwai kin engdehnnoang kapwaihahda mehkan ma jamamwaiho kin mwehuki. Janngoar in sapinno, ih joun kojarmaj men. Ih johkin minmin oang me mehlello, pwa mehlello johpwa mine ipoa. Nehn anjoauwo ma ih kin sikesik likamw, ih kin wihwiahr da ih ahnla, pwa Jehsen pwen likamw men, apel jemen joangoan likamw ohroj.
45 A ioar kahrpoan amwai joh kin pwojon Ngoahi, pwa Oai kin padahkihoang kamwai doahroar mehkan ma mehlel.
46 Inje nehn pwungamwai kan ma kak kadehdehda doahroar dihp oau ma Ngoahi wiahda? Doari, ma Ngoahi kin padahkihoang kamwai mehkan ma mehlel, a dahkij kahrehda kamwai johkin pwojonki Ngoahi?
47 Ma emen ma sapjang ipen Koahs kin rong en Koahs lal kan. A kamwai kan ma joah sapjang ipen Koahs, ioar kahrehda kamwai johkin nimen rong Ngoahi.”
Jesus apel Abraham
48 Mihn Jew‑ok japoang Jesus, “Jaudi kamai pwung nehn amai sikoa pwa koawoa mihn Samaria men a ngen jaus mine ipoamw?”
49 Jesus japoang, “Joh ngen jaus ipoai. Ngoahi kin woaunki Joamoaiho, a kamwai johkin woaunki Ngoahi.
50 Ngoahi johkin rapahki pein Oai wahu. A mine emen ma kin raprapahki Oai wahu, ioar Ih ma kin pwungki Ngoahi.
51 Ngoahi pwehng kamwai in mehlel: ma emen ma kin kapwaihahda Oai padahk kan jehpirin mehdi.”
52 Mihn Jew‑ok pwehng Ih, “Doari, me kamai ne kidal in mehlel pwa ngen jaus mine Ipoamw. Abraham mehdi, joukohppok pel mehdi; a Koawoa pwa, ‘Ma emen ma kin kapwaihahda Oai padahk kan jehpirin mehdi.’
53 Jamasai Abraham ne mehdi. Koawoa joah lemleme pwa koawoa laplapjang Abraham? Joukohppok ne pel mehdi. Inje ioar Koawoa lemehkihoang pein Koawoa?”
54 Jesus japoang irai, “Ma Ngoahi pirin kawahuwi pein Ngoahi, Oai wahu nen mwahlla. Joamoaiho, ioar ma kin woaunki Ngoahi, ioar Ih ma kamwai kin pwa amwai Koahs.
55 Kamwai kahjikkoar kidalda Ih, a Ngoahi ma kidal Ih. Ma Ngoahi pirin sikoa pwa Ngoahi jehjoa Ih, doari, Ngoahi ma likamw doahroar kamwai. A Ngoahi kidal Ih apel Ngoahi kin peikkoang Ah lal kan.
56 Jamamwai Abraham perenkihda ah pirin kapang Oai Rehnno. Doari, Ih ne kapang pel perenkihda.”
57 Mihn Jew‑ok ken pwehng Ih, “Koawoa kahjikkoar johnpar limeijek, a imdoahr Koawoa en kapang Abraham?”
58 Jesus japoang irai, “Ngoahi pwehng kamwai in mehlel: mwohn Abraham ah noaisikdi ‘Ngoahi Ioar.’ ”
59 Irai ken rik sakai pwa irai en kasoahki Ih; a Jesus ken karirihla pein Ih jang irai, ken injang Umw Joarwiho.