12
Mwalaun in Pharisee
1 Armaj kid pwi pokonpene, inenin koaisla epwi siak ehn epwi. Jesus sapkihda pwehng Nah sohnpadahkkok, “Kamwai kalke jang ihs in Pharisee kan — ma woahwoahki arai mwalaun kan.
2 Me ohroj ma kin oakkoakla, uhdahn pirin janjalda, apel me rir ohroj pirin pel janjalda.
3 A, me ohroj ma kamwai kin sikoa nehn ros, pirin janjalda nehn maram; apel me ohroj ma kamwai kin mwoanginnginki wija joaloang, pirin pakairkihda pohn umw kan.
Inje Kamwai pirin Mijik
4 “Ngoahi pwehng kamwai, Oai pirien kan, kamwai joah mijik irai kan ma kak kojukdi palwar, a johkak wia mehkij nauna jang pwurlakoa.
5 Ngoahi pirin padahkihoang kamwai inje ma kamwai en mijik: mijik Koahs, ma kak kojukdi koawoa apel anki manman in peidla koawoa nehn ehl. Kamehlele Ngoahi, Ih oar doari kamwai en kin mijik!
6 “Jaudi mahnsang siksik limmen kin noasla in send riau? A johpwa emen Koahs kin moalkoahla.
7 Pisen moangoamwai kan ohroj ne pel wadwaddi. Doari, kamwai joah perki mehkij; pwa kamwai kajampwaljang mahnsang dihrdir!
Kadehde Christ apel Pohnjehjoa Christ
8 “Ngoahi en pwehng kamwai, irai kan ma kadehde Ngoahi in janjal mwohn armaj kan, pwa ihr wia Noai, Nihn‑Armaj pirin pel wia doahroar oang irai mwohn sohnloang in Koahs kan.
9 A inje ma pohnjehjoa Ngoahi ipen armaj kan nehn pokon janjal, Nihn‑Armaj pirin pel pohnjehjoa irai mwohn sohnloang in Koahs kan.
10 “Inje ma pirin pwahla mehkij ma uhwoang Nihn‑Armaj, kak mahkla; a inje ma pwahla mehkij nauna ma uhwoang Ngen Joarwi, jehpirin mahkla.
11 “Nehn ahr pirin wahla kamwai en koapwung nehn jinakoke kan ke mwohn koapina kan ke koaun kan, kamwai joah kin pwunodki imdoahr kamwai en doaroa kamwai ke da kamwai en pwa.
12 Pwa Ngen Joarwi ma pirin padahkihoang kamwai dahkij kamwai pirin pwa.”
Karajraj in Woal Koapwoahpwoa Pweipwei men
13 Armaj men jang nehn pokonno pwehng Jesus, “Jounpadahk, pwehng rioai woallo kama en nehkpijoang ama johjohu.”
14 Jesus japoang ih, “Koampoakpoai, inje kioang Ngoahi pwungin koapwung ke nehk koapwoa kan nehn pwungamwa?”
15 Ih ken pwehng irai ohroj, “Kalke kamwai jang noaroak nauna ohroj, pwa mour mehlel in armaj joh kin mine in koapwoa kan ma kamwai anki, mihndahr ia woahr dirin amwai koapwoa.”
16 Ih pel pwehng irai karajraj oauwe, “Woal koapwoahpwoa men mine, ma japwahu dir koannge.
17 Ih sapda pein lemleme, ‘Joh wija ngoahi kak nekidla wehn joapwoaiho ohroj. Da ngoahi kak wia?
18 Ioar mehwa me ngoahi pirin wia; ngoahi pirin kamwroahdi oai umwen nahk kan, ngoahi wud kouda epwi ma koalik jang, wija ma ngoahi pirin nekidla wehn joapwoaie apel oai koapwoa ohroj.
19 Ngoahi pirin pein pwehng ngoahi, woal pai men koawoa! Koawoa anki koapwoa dir, ma koawoa anahne oang johnpar dir. Koawoa, injenmwahu; mwinge, nim, perperen!’
20 A Koahs pwehng ih, ‘Armaj pweipwei men koawoa! Pwongoauwehr koawoa pirin mehdi! A inje ma pirin anki oamw koapwoahkan ohroj ma koawoa ne nekidpene?’ ”
21 Jesus kadoarihkihla karajrajjo, Ih pwa, “Me ioar doahroar pirin wiawihoang armaj kan ma kin koajokpene oang irai koapwoahn jampah, a joamwoahmwoa mwohn mijen Koahs.”
Koapwoarpwoarki Koahs
22 Jesus pel pwehng Nah sohnpadahkkok, “Ioar mehwa Ngoahi pwehng kioang kamwai; kamwai joah kin pwunodki amwai mour, dahkij kamwai pirin kang, ke likkoau kamwai anahne oang palwoaroamwaikan.
23 Pwa mour inenin kajampwal jang mwinge apel palwar inenin kajampwal jang likkoau.
24 Kamwai kapang mahnsang kan: irai johkin poadokdi, pel johkin doli, pel joh arai umwen nekidek; a Koahs kin kamwinge irai. A kamwai inenin kajampwal mehlel jang mahnsang kan!
25 Inje nehn pwungamwai ma kak karoairoaihla ah mour nehn ah pwunpwunodki mehpwiai?
26 Ma kamwai johkak apwali joangoan moangoai oauwe, mihnda kamwai en pwunodki epwi me sohrohr?
27 Kamwai kapang rohs in nehn japw kan doahroar ahr kin koapda; irai joh kin doadoahk, irai johkin wiahda arai likkoau. A kamwai en kidal pwa pel Nahmwarki Solomon, nehn ah koapwoahpwoa, joh kin kapwaski likkoau ling doahroar apas rohs pwiai.
28 Koahs ma kin kapwasihda dipwdipw in nehn japw kan, ma mine rehnnoauwe, a lakapw ne joh, peidek oang nehn sidohp pwidengla. A Ih joah nen pel uhdahn kalikkoauwi kamwai? Joangoan siksikin amwai pwojon!
29 “Doari, kamwai joah kin pwunod, kalap raprapahki pwa da kamwai pirin kang ke nim.
30 (Pwa armaj rosros kan ohroj nehn jampah ioar irai ma kin pwunpwunodki mehpwiai ohroj.) A Jamamwai kidal pwa kamwai anahne mehpwiai.
31 Kamwai en kin injinohki Wein Koahs mijkoalkoal, a Ih pirin kioang kamwai mehpwiai.”
Koapwoahpwoahn Nehnloannge kan
32 “Joah majpwehk pwihnin jihpw siksik, pwa Jamamwaiho ne perenki en kioang kamwai Weiho.
33 Kamwai noaskihla amwai koapwoa kan, kioang mwani kan ihr joamwoahmwoa kan. Kamwai wiahng kamwai pwuko oau ma johkak dehnla, nekidla nehnloannge amwai pai kan, wija ma joh kin siksikla, pwa joh sohnpirap kak pirapoahjang, pel joh loanginmwoas kak koauwehla.
34 Pwa wija amwai pai kan mine, ioar mohngiongamwai pel mine.
Lidu kan ma kin Mwajmwajahn
35 “Onnonop oang dahkij ma pirin indoa, kapwaskihda likkoauwin papah apel nihmwai lahm kan en okjekda.
36 Doahroar lidu kan ma kin joujowi arai koaun ma pirin japahldo jang kamdipw in koapwoapwoaud. Nehn ah leldo apel lesles, irai kin risingdahng ih wanihmmwo anjoauwohr.
37 Joangoan peren in papah kan ma arai koaun kapang irai kin poahd apel onop nehn ah japahldo! Ngoahi pwehng kamwai in mehlel, pwa ih pirin kihjang ah joakiddo kamwindihdi irai, apel papah irai.
38 Ia woahr peren in irai ma ih kapang arai onopda mihndahr ma ih indoa lopkoan pwong ke kosjang!
39 Kamwai en kamehlele me; ma koaun in umw oau kidal anjoau sohnpirap men pirin indoahng in umwahu, ih jehpirin mweidoahng en koauwehla dilda.
40 Doari, kamwai pel pwili onnonop, pwa Nihn‑Armaj pirin indoa nehn anjoau oau ma kamwai johpwa kajik.”
Lidu Loalpwoas ke Lidu Joaloalpwoas
41 Peter pwa, “Koaun, karajraj pase doakoa kamai ke oang armaj ohroj?”
42 Koaunno japoang, “Inje ma koawoa wiahki jounkouwa loalpwoas apel loalkoang? Ioar ih ma ah koaun pirin kajapwildahng ih en apwali ah wijahu apel kioang lidu sohrohr kan kanrai mwinge nehn anjoau ma koanoahng.
43 Ia woahr peren in lidu meno, ma ah koaun kajaingdi ah wihwia me, nehn ah pirin pwurdohng in umwahu!
44 Mehlel Ngoahi pwehng kamwai, pwa koaunno pirin kioang lidu mene en koaunda ah dipwjoau kan ohroj.
45 A ma liduhwo pwehng pein ih pwa ah koaunno nen kosin japahldo, ih ken sapda poki lidu sohrohr kan, woal apel li, a ih pel mwinge, nim apel jakaula;
46 koaunno pirin pwurdo rehn apel awa ma liduhwo johpwa kidal. Koaunno pirin poaloahpijoang ih apel kejpwiheklahng nehn pwungen ihr ma joaloalpwoas.
47 “Doari, lidu ma kidal dahkij ah koaun mwehuki ih en wia, a johpwa koaunopda pein ih, ih pirin uhdahn oaloa pokpok koalik.
48 A ih ma jehjoa dahkij ah koaun mwehuki ih en wia, a ih wia mehkij ma koanoahng en pokpokki, ih pirin oaloa pokpok siksik. Koanoahng me koalik en injang iraihok ma oaloa koalik, iraihok ma oaloa inenin koalik en kihda woahioau ma inenin koalik.
Jesus ioar Kahrpoan Sohrohrpijoang
49 “Ngoahi indoa pwa Ngoahi en jaunnoang oai jampah; a, ia woahr Oai nimen pwa en ken okda!
50 Ngoahi pirin oaloa poapdaij oau, apel ia woahr pwunod ma mine ipoai, oaroh ngehd en doarihla!
51 Kamwai lemleme pwa Ngoahi wahdohng jampah moaloailoai! Joah! Jaudi moaloailoai, pwa sohrohrpijoang.
52 Jang me inla peneinei oau ma sowoa limmen pirin sohrohrpijoang nehn pwungarai — jilmen pirin pallan roahmen, apel roahmen pirin pallan jilmen.
53 Jahm kan pirin uhwoang nihrai jermwein kan apel jermwein kan pirin uhwoang jamarai kan. Nohno kan pirin uhwoang nihrai jerpein kan, apel jerpein kan pirin uhwoang inarai kan; nohno kan pirin uhwoang pahien nihrai jermwein kan, apel jerpein kan pirin uhwoang inen pahioaraihok.”
Woahwoahki Anjoau
54 Jesus pel pwehng armajjok, “Nehn amwai kin kapang koasoau oau jang in palikapin loannge, kamwai kin pispis in pwa, ‘Pirin wud,’ a kin pwoaida.
55 Nehn amwai kin kapang eng ah kin koaljang in palieir, kamwai kin pwa, ‘Ih pirin pwideng,’ a kin pwoaida.
56 Mwalaun kamwai! Kamwai kapang jampah apel mijen loannge, kajawihda iren nehn woahwoa, da kahrehda kamwai jehjoa kajawihki woahwoahn anjoau oauwe?
Koapwungla nehn pwungen Koawoa apel Oamw Imwinsihsi
57 “Da kahrehda kamwai joah pein kajawihki dahkij pwung ma kamwai en wia?
58 Ma armaj men pirin lelki koawoa mwoalen koapwung, engdehnki koapwungla nehn pwungamwa mwohn amwa pirin wia koapwung. Pwa ma koawoa johpwa, koawoa nen warahkiheklahng jounkoapwunngo, a jounkoapwunngo wud panglahng koawoa ipen pilijmehn, a pilijmehn oaloa koawoa peiddoang nehn kalpwuhj.
59 Ngoahi pwehng koawoa in mehlel, pwa koawoa johkak diljang wijahu, oaroh koawoa pirin koapwungla mwanihok ohroj lel send mwoarmwoar in oamw pwaipwanid o.”