23
Jesus Kalkehjang Irai jounpadahk in Kojonned apel Pharisee kan.
1 Doar Jesus kapahrak oang pokonno apel Nah sohnpadahkkok,
2 “Jounpadahk in kojonned kan apel Pharisee‑ok ioar irai anki manman in kawoahwoa kojonned in Moses.
3 Doari, kamwai uhdahn pirin pel peikkoang apel kapwaihahda me ohroj ma irai kin padahkihoang kamwai; a kamwai johpwa japjang arai wihwia kan. Pwa irai johpwa kin kapwaihahda dahkij arai kin kapahrakkihwe.
4 Irai kin piroahdihoang wijik soausoau pohn armaj. Irai johkin kamwoakid apas jandin poahrai pwa en jeuwejehda wijik soausoau pwiai.
5 Me ohroj ma irai kin wia, irai wia pwa en janjal mwehu mwohn armaj. Kamwai soahk mwehu koalik in koakon kan ma mine in soamwoarai apel in poahrai ma iren Puk Joarwi kan mine loaloa apel roairoai in mihn pirapirin arai likkoauwo.
6 “Irai perenki mwindi in moangoan sehpil kan nehn kamdipw apel mine nehn jeia ma keiou kajampwal nehn jinakoke kan!
7 Irai perenki armaj kan en rahnmwahuwi irai nehn pokon kan, panginki irai ‘jounpadahk.’
8 Kamwai joah kin nimen armaj en panginki kamwai ‘Jounpadahk,’ pwa kamwai ohroj doahroauwoar, apel anki Jounpadahk mennoar.
9 Pel johpwa panginki emen pohn jampah ‘Mwahmwa,’ pwa Jamamwai emennoar doari ma mine nehnloannge.
10 Kamwai joah pel nimen emen en panginki koawoa koaun, pwa amwai koaun mennoar ioar ‘Christ.’
11 Minwa ma keiou laplap nehn pwungamwai kan en wia sohn papah.
12 Pwa emen ma nimen laplap pirin siksikla, a irai ma kin aksiksik pirin laplapla.”
Jesus Kariahla arai Mwalaun
13 “Ia woahr apwal oang kamwai jounpadahk in kojonned kan, apel Pharisee kan! Mwalaunpwi kamwai! Pwa kamwai kin risingdi jang wanihmw in Wein nehnloannge, a pein kamwai joh kin dilda ke mweidoahng armaj kan ma kin engdehn in dilda.
14 [“Ia woahr apwal oang kamwai jounpadahk in kojonned apel Pharisee kan! Mwalaunpwi kamwai! Kamwai kin jerkihjang umwen liohdi kan nehn amwai kin lioajoahjki amwai kapkap roairoai. Ioar mehwa kamwai nen oaloahki koaloklok koalik.]
15 “Ia woahr apwal oang kamwai jounpadahk in kojonned apel Pharisee kan! Mwalaunpwi kamwai! Kamwai kin joarjoaroakjili nehn jed apel kosehwe weipwi pwa kamwai en ukuddoang lamlamin armaj emen oang in amwai lamlam in mihn Jew; nehn ah ne lohdi kamwai kin wiahng ih en warroang inla nehn ehl pehn riau koalik jang kamwai.
16 “Ia woahr apwal oang kamwai jounkaweid majkun kan! Kamwai kin padahkihoang armaj kan ma emen ma kin kahukihla Umw Joarwiho johkin pwukoahki.
17 Armaj majkun pweipweipwi kamwai! Ia mehwa kajampwal in kohl ke Umw Joarwi ma kin kajarwihla kohl.
18 Kamwai pel pwa ma emen ma kahukihla Mwoal Joarwiho, jehpirin pwukoahki; a ma armaj men ma kin kahukihla mihn meiroang in pohn mwoallo ih ioar pwukoahki ah kahula.
19 Ia woahr amwai majkun! Mindahioau ma kajampwal, meiroang ke mwoallo ma kajarwihla meiroanngo?
20 Doari, armaj men ma kin kahukihla mwoal joarwihoau, ih kin kahukihla mwoal joarwiho apel me ohroj ma mine puwoa.
21 Nehn en emen kin kahukihla Umw Joarwiho, koawoa kahukihla Umw Joarwiho apel Koahs, ma mine loaloa.
22 Nehn en emen kin kahukihla nehnloannge, ih kin kahukihla mwoalen Koahs apel Ih ma mine puwoa.
23 “Ia woahr apwal oang kamwai jounpadahk in kojonned apel Pharisee kan! Mwalaunpwi kamwai! Kamwai kin meiroangki oang Koahs eijek kij oau in amwai koapwoahn jampah, apel mihn kioang nimen mwinge ma doahroar mint, dill, apel cumin, a kamwai johkin peikkoang padahk kajampwal kan in kojonneddo ma doahroar pwung paiai, kalahngan apel mehlel. Ioar mehpwiai ma kamwai uhdahn pirin kapwaihahda apel pwilihkihoar minpwiok.
24 Jounkaweid majkunpwi kamwai! Kamwai likihla loang jang nehn nimamwai pil pwadoar kamwai japwungla johploahdi kamel?
25 “Ia woahr apwal oang kamwai jounpadahk in kojonned kan apel Pharisee kan! Mwalaunpwi kamwai, kamwai kin kamwkelehda likin nihmwai mwoak apel pileis, a loaloa dirkihla dipwjoau ma kamwai kin pein oaloahdi jang in amwai kin roprop oang pein kamwai.
26 Pharisee majkun men koawoa! Keiou kamwkelehda nehn mwoakko mijkoalkoal, a likin nen pel mwakelkelda.
27 “Ia woahr apwal oang kamwai jounpadahk in kojonned apel Pharisee kan! Mwalaunpwi kamwai! Kamwai kin mwehuki mwakelkel in likin joaujoau, a loaloa dir in sihn armaj mehdi apel me kajaus ohroj.
28 Pel doahr Kamwai, kamwai jong en doahroar armaj pwung likimwaikan, a loaloa mohngiongimwai kan dirkihla widing apel mwoarjuwed.
Jesus Kohpda doahroar Irai pirin Koaloklok
29 “Ia woahr apwal oang kamwai jounpadahk in kojonned apel Pharisee kan! Mwalaunpwi kamwai! Kamwai kin wiahda joaujoau mwehu oang joukohp kan apel kalingihda joaujoau in armaj mwehu kan;
30 kamwai kin pwa, ‘Ma kamai kin pwili mine nehn mwein jamasaihok, kamai nen jehpwili kojukdi joukohppok.’
31 Kamwai ne pein kadehdehda pwa kamwai kijehn kadaudok en iraihok ma kojukdi joukohppok.
32 Kamwai doaudoaula kadoarihla dahkij ma jamamwaihok ne sapkihda.
33 Sinekpwi kamwai, ipwihpw in sinekpwi kamwai! Kamwai lemleme pwa kamwai kak pisjang kadeik in nehn ehl?
34 A doar Ngoahi pwehng kamwai pwa Ngoahi pirin kadardohng kamwai joukohppwi, woal loalkoangpwi, apel jounpadahkpwi; kamwai pirin kojukdi epwi, kalohpwuhla epwi, poki epwi nehn amwai jinakoke kan apel kauj jang irai nehn koaujoan kan.
35 Doari, imwlahn mehpwiai, koaloklok pirin aluhwoang kamwai pwa jang in amwai kojukdi armaj ma joh diparai; sapda jang in kojkojdihn Abel lel kojkojdihn Zechariah nihn Berechiah, ma kamwai kojukdi nehn pwungen Umw Joarwiho apel pei joarwiho.
36 Ngoahi pwehng kamwai in mehlel pwa koaloklok in kojukdi armaj pwiai pirin aluhwoang armaj in rehn oauwe!”
En Jesus Ipwil oang Jerusalem
37 “O Jerusalem, Jerusalem! Koawoa ma kin kojukdi joukohp kan apel kasoahki sakai jounpakairrok ma Koahs kadardohng koawoa! Pehn doapoa Ngoahi nimen jupwurpene nihmw jerihkan doahr jummwa pein men kin kihpene nah pwinihk kan pehn poah, a koawoa joah nimen mweidoahng Ngoahi!
38 A doar, oamw Umw Joarwihn pirin soahnda johla sowoa.
39 A Ngoahi pwehng koawoa me, koawoa nen johpwa pwuroahng kapang Ngoahi oaroh koawoa en pwa ‘Koahs en kapaiahda Ih ma indoa in oadoan Koaunno.’ ”