Nihn Paul Kijilikoau oang Mwomwohdjohn
Rome
Oarlap in Kijilikoau oauwe
Nihn Paul Kijilikoau oang mihn Rome ne insingdi pwa en koaunopda sohn mwomwohdjo kan in Rome oang en Paul ah koajkoajoane en paj iparai. Ih koajoanehdi en wia doadoahk nehn pwungen joauloang kan nehn Rome ekij anjoau, a mwuhr ih pel pirin dauluhllahng Spain ki arai jauwaj. Ih insingehdi kijilikoau oauwe pwa en kawoahwoahda doahr ah lamlam oang pwojon in joauloang apel oang wihwia kan ma pirin injang in pwojon oauwe oang in mourin joauloang. Kijilikoau oauwe ioar keiou kajalehda unjekin en Paul padahk kan jang nehn nah kijilikoau kan ohroj.
Paul rahnmwahu oang sohn mwomwohdjohn Rome apel kajalehng irai doahr ah kin kapkapki irai; doari, ih ken oarlapihda audoapoan kijilikoau kije: “Rongmwehuwo kin kajalehda doahr Koahs Ah kin wiahda pwa armaj en pwungla Ipoa; jang in ahr pwojon jang in sapin lel in imwin. Doahr en Puk Joarwi pwa, ‘Emen ma pwungla ipen Koahs ki pwojon pirin mourla.’ ” (1.17).
Paul ken kawoahwoahda oarlap oauwe. Armaj ohroj, mihn Jew apel mihn likin kan, uhdahn anahne pwungla ipen Koahs, pwa ohroj minmine pehn manman in dihp. Armaj kin pwungla ipen Koahs jang in ahr pwojon Jesus Christ. Mwerin, Paul pel kawoahwoahda mour kapw nehn Christ. Emen ma kin pwojon Christ ne anki popohl ipen Koahs, apel Ngenin Koahs ne kapisla ih jang pehn manman in dihp apel mehdi. Paul pel sikoa nehn iroa koalik 5-8 kahrpoan Kojonned in Koahs, apel doahr manman en Ngenin Koahs nehn mour in joauloang. Mwuhr, Paul pel kajalehda ah lamlam doahr mihn Jew apel mihn likin kan ahr kak oaupene nehn koajoandihn Koahs oang sohn jampah kan. Ih ken kadoarihkihla ah sikoa doahr apkas nehn ah sikoahda ma en mihn Jew kan joikla Jesus, ioar kijehn koajoandihn Koahs pwa en kadokihpene armaj ohroj nehn en Koahs kalahngan ipen Jesus Christ; apel ih lemleme ma mihn Jew johpwa pirin joikla Jesus allaluhla. Doari, in imwin, Paul sikoa doahr mour in joauloang, a in mehlel doahr arai limpoakpene, ih pel sikoa doahr papah Koahs, pwukoahn joauloang oang wei, pwukoa nehn pwungarai, apel doahr iroahpwi ma pidda kadeik in loaloa. Ih ken kaimwjekkihla kijilikoau kije ah rahnmwahu oang koampoakpah kan wijahu apel lal in kapnga Koahs.
Audoapoa in oarlap
Kapehje apel oarlap in kijilikoau oauwe 1.1-17
En armaj anahn in koamoaurla 1.18—3.20
En Koahs koajoandi oang koamoaurlahn armaj 3.21—4.25
Mour kapw ipen Christ 5.1—8.39
Israel nehn en Koahs koajoandi 9.1—11.36
Mwomwen mour in joauloang 12.1—15.13
Kaimwjeklahn sikesik apel en Paul rahnmwahu kan 15.14—16.27
1
1 Jang Paul, lidu in Christ Jesus apel wahnpoaroan ma Koahs ne pilda apel pangin pwa en kalohkihjili Ah Rongmwehu.
2 Rongmwehu ma Koahs ne inoaukihoang armaj ohmehj ma Ih kioang Nah joukohppok apel ma ne insingdi nehn Puk Joarwi.
3 Rongmwehu oauwe ioar doahr Nah Iehrojjo, asai Koaun Jesus Christ, doahr in Ah wia armajla Ih noaisikdi jang kadaudok in David,
4 apel doahr in Ah joarwi unjek, Ih ne iejda jang mehdi kajalehda uhwen Ah manman en adanki nihn Koahs Iehroj laplap.
5 Doari, Koahs kioang ngoahi kalahngan oauwe jang ipen Christ apel ki Christ, ngoahi wiahla wahnpoaroan men, pwa ngoahi en kahlwa armaj in wei kan ohroj en kamehlele apel peikkoang.
6 Me pel pwilihkihla kamwai kan minmine Rome, ma Koahs ne pel pangin kamwai en wiahla nihn Jesus Christ.
7 Doari, ioar ngoahi insingkihwehng kamwai ohroj ma mine Rome, ma Koahs ipwilki apel pangin pwa en wiahla Nah armaj.
Kalahngan apel popohl jang Jamasai Koahs apel asai Koaun Jesus Christ oang kamwai.
Kapkap in Kapingkalahngan
8 Keiou ngoahi kapingkalahngankihoang oai Koahs in oadoan Jesus Christ ki kamwai ohroj, pwa jampah ohroj kin rongrongrong amwai pwojon.
9 Koahs oai jounkadehde mehlel in oai sikesikke, ma ngoahi kin papah nehn oai mohngiong jang in Rongmwehu in Nah Iehroj, ngoahi kin kapkap ki kamwai anjoau ohroj johpwa uhdi. Koahs kidal pwa ngoahi kin samsaman kamwai,
10 anjoau ohroj nehn oai kapkap kan. Ngoahi kin poaki ipen Koahs en kalahngan, kamoangoaioang pwa ngoahi en kak paj ipamwai anjoau oauwe.
11 Pwa ngoahi inenin nimen kapang kamwai pwa ngoahi en kak kioang kamwai kapai in Ngenno pwa en kioang kamwai sihkei.
12 Me woahwoahki pwa kisai nen oaloa jauwajpasai anjoau oauwoar, amwai pwojon en jeuweje ngoahi, a oai pwojon en jeuweje kamwai.
13 Rioai kan, ngoahi nimen kamwai en kidal pwa anjoau dir ngoahi kin koaukoaunop ngoahi en paj ipamwai, a mine mehkij ma kin kalap poaroa oai en alwe ipamwai. Ngoahi nimen oai doadoahk in Rongmwehu en pel uhwa mwehu ipamwai doahroar epwi mihn likin kan.
14 Ki pwa mine oai pwukoa oang pwihnin armaj kan ohroj, oang irai ma marain apel irai ma rosros, oang irai ma woahwoa apel irai ma jawoahwoa.
15 Ioar kahrehda ngoahi pel nimen kalohki Rongmwehu oang kamwai ma kin koaukoaujoan Rome.
Manman in Rongmwehu
16 Ngoahi uhdahn koapwoarpwoarki mehlel Rongmwehuwo; pwa ioar manman in Koahs ma kin koamoaurla ohroj ma kin pwojon, sapkihda mihn Jew‑ok apel oar mihn likin kan.
17 Rongmwehuwo kin kajalehda doahr Koahs Ah kin wiahda pwa armaj en pwungla Ipoa; jang in ahr pwojon jang in sapin lel in imwin. Doahr en Puk Joarwi pwa, “Emen ma pwungla ipen Koahs ki pwojon pirin mourla.”
Dipen Armaj kan
18 En Koahs lioas kin janjalda jang nehnloannge ki dihp apel joangoan nauna ohroj in armaj kan, ma arai mour juwed kan kin poaroahla armaj kan en kidalla me mehlello.
19 Koahs kin koalkoa irai, pwa joang kan ma irai kak kidalki doahr Koahs ne pwen janjal oang irai, pwa pein Koahs ne pwen kajalehioang irai.
20 Armaj johkak kapang Koahs; apwen jang in sapin en Koahs kapikda jampah, Ah manman unjek apel Ah Koahs Laplap, ne pwen inenin janjal; jang in mehk ma Ih wiahda ne kawoahwoahda. Doari, johpwa mehkij armaj kak akpwungki.
21 Doari, irai kidal doahr Koahs, a irai johkin kioang Ih woaun ma koanoahng Ih, irai pel johkin kaping kalahngan oang Ih. Arai lamlam audohdkihda me johkaspoa, apel arai mohngiong rosla.
22 Irai kin kihkihoang pwa irai loalkoang, a pwen pweipweipwi irai.
23 Irai johla kioang klori oang Koahs mehlello a wud pwongi janjal in armaj, apel mahnsang, apel mahn alu, apel limwahdek.
24 Doari, Koahs mweidoahng joangoan armaj pwiai en kin wia joangoan wihwia jamin kan ma mohngiongirai kan kin inoangki; doar irai ken wihwia joang kamehk kan nehn pwungarai.
25 Irai wiliankihda mehlel in Koahs me likamw. Irai kin pwongi apel papah mehkan ma Koahs pein kapikda apwen johpwa pwongi Jounkapikpikko, ma kaping en aluhwoang anjoau ohroj.
26 Nehn irai kin wia joang pwiai, Koahs mweidla irai oang nehn inoang kamehk pwi. Pel lihkan mweidla palwoaroarai oang siahk japwung kan nehn pwungarai.
27 Pel doahroar woal kan, irai kin kihdi arai inoang oang li, irai ken wiahpene pein arai inoang nehn pwungarai; doari, in imwla irai pirin oaloa koaloklok ma koanoahng arai wihwia nauna kan.
28 Nehn en armaj kan johla nimen lemleme mehlel in Koahs, Koahs ken mweidla arai lamlam oang lamlam japwung, doari irai ken wiahda joang kan ma johpwa koanoahng.
29 Irai ken dirkihla joangoan nauna kan ohroj; mwoarjuwed, noaroak, luwak, kojarmaj, pei, widing apel pihrin. Irai kin lipahned
30 apel koauwe emen emen, irai kin lioassoang Koahs, joah woaunki armaj, lehmwsik, lioajoahj; irai kin lemehda joang nauna dihrdir irai en wia; irai japeik oang arai nohno‑pahpa.
31 Johla arai lamlam oang dahkij pwung apel japwung; arai inoau joah mehlel, irai johkin ipwilki ke kadek oang armaj.
32 Irai kidal en Koahs kojonned ma pwa armaj kan ma kin mohmohmour nehn joangoan mour oauwe uhdahn koanoahng mehdi. A joah, pwa irai wihwiahr joang pwiai, apel kin pwungki irai kan ma kin pwili wia joang pwiai.