3
1 Mine kemwehu pohn mihn Jew kan koalik jang mihn likin kan? Ke mine kaspoan jorkomjaijla?
2 Mehlel douluhl, in joang ohroj! Keiou, Koahs likihoang mihn Jew kan Ah mahjan.
3 A imdoahr ma epwi irai pwen johpwa loalpwoas? Me pirin woahwoahki pwa Koahs pel johpwa loalpwoas?
4 Joah douluhl! Koahs uhdahn mehlel, mihndahr ma armaj ohroj likamw. Doahroar en Puk Joarwi pwahki Koahs:
“Oamw pwung uhdahn pirin janjalda in Oamw sikesik,
Koawoa uhdahn pirin pwoaida in anjoau in Oamw pirin koapwung.”
5 Doari, a ma asai wihwia japwung kan kajalehda doahroar mwehu in en Koahs pwung, kisai kak pwa Koahs wihwia japwung nehn Ah koalkoa kisai? (Me ioar peidek oau ma armaj kin wia.)
6 Joah douluhl! Ma Koahs joah mehlel, imdoahr Ih en kak kadeikda jampah?
7 A imdoahr, ma oai joah mehlello pirin kajalehda en Koahs klori apel Ah mehlello uhdahn janjalda mehlel? Dahkij kahrehda ngoahi pirin kadeikda doahr armaj dipan men?
8 Doari, amwda kisai joah pwa, “Kisai wiahda nauna pwa mwehu en janjalda?” Epwi armaj ne koauwehkihla ngoahi jang in ahr kin pwa ngoahi kin sikoa mehpwiai! Irai pirin kadeikda, in doahr ma koanoahng irai.
Joh Armaj Men Pwung
9 Doari da, kisai mihn Jew paimwehu jang mihn liki kan? Joah! Ngoahi ne kajalehda doari pwa mihn Jew apel mihn likin pwen ohroj doahroauwoar pehn manman en dihp.
10 Doahr en Puk Joarwi pwa!
“Joh armaj emen pwung,
11 Johpwa armaj men loalkoang
Ke kin joarwihoang Koahs,
12 Ohroj ma ne jipwoaljang Koahs;
irai ohroj ne japwungla,
johpwa armaj men ma kin wiahda mwehu; johpwa emen.
13 Arai sikesik kin dirin widing; likamwoar doari kin injang in loawoarai,
Lal keper ma doahr pwoaisin in sinek kin injang in oawoarai kan.
14 Arai sikesik kan dirin kariahk nauna,
15 Irai kin pispisin kamoadoakihla apel kojukdi armaj;
16 irai kin koauwehla wija ohroj ma irai kin inlahng.
17 Irai johpwa kidal ekij alin popohl;
18 Irai pel johpwa kidal dahkij mijik Koahs.”
19 Doari, kisai ne kidal pwa audoapoan Kojonneddo ohroj kin doakdoakoahr irai kan ma mohmohmour pehn Kojonneddo, pwa en kauhdihjang armaj ohroj in doaroa pein irai apel kioang jampah pwon pehn en Koahs kadeik.
20 Johpwa armaj emen ma kak pwungla mwohn Koahs ah kin kapwaihahda audoapoan Kojonneddo; a ioar ma Kojonneddo kin wia, ih kin kajalehng kisai armaj pwa kisai ne dipda.
Doahr en Koahs Ah kin Koapwungla Kisai
21 Doari, me Koahs kajalehng armaj kan doahr Ah kin koapwungla armaj Ipoa, Ih johpwa ekij pidda kojonned. A Kojonneddo apel joukohppok ne kadehdehda doahr:
22 Koahs kin koapwungla armaj mwohn Ih, jang in arai kin pwojon Jesus Christ. Koahs kin wia me oang irai ohroj ma kin pwojon Christ, pwa armaj ohroj doahroauwoar:
23 armaj ohroj ne wiahda dihp, doari, irai ohroj ne dohlahjang en Koahs klori.
24 Doari, jang in kalahngan apel japan in Koahs, armaj ohroj kin pwungla Ipoa ki Christ Jesus ma kin kajaldekihla irai.
25 Koahs koajoanehdi pwa Christ en meiroangkihla pein Ih pwa Ah insahu en wiahla meiroang oau mihn lapwadda dipen armaj kan, jang in arai kin pwojon. Koahs wiahda meiroang oauwe pwa en kajalehda doahr Ah kin koapwungla armaj mwohn Ih. Mehj, Koahs kin kanangma apel kin pohnjehjoa dipen armaj kan;
26 a anjoaukije, Ih kin soahk apel kajalehda dipen armaj kan pwa en kajalehda pwa pein Ih ma kin koapwungla armaj kan mwohn Ih. Jang in iroahioauwe Koahs kajalehda doahr Ah pwung apel doahr Ah kin koapwungla armaj ohroj ma kin pwojon Jesus.
27 Doari, mine mehkij kisai kak juweiki? Pwa joh! Dahkij kahrehda? Ki asai kin kapwaihahda Kojonneddo ma kahrehda? Joah, a jang in asai pwojon.
28 Kisai ne kidal pwa armaj kan kin pwungla ipen Koahs jang in pwojon, jaudi jang in ahr kapwaihahda Kojonneddo.
29 Ke imdoahr Koahs? Ih Koahs in mihn Jew kan oardoari? Jaudi Ih pel Koahs in mihn likin kan? Eh, Ih pel Koahs mihn likin kan.
30 Koahs men oar doari, Ih kin koapwungla mihn Jew kan mwohn Ih ki arai pwojon, apel mihn likin kan jang ki arai pwojon.
31 Me woahwoahki pwa kisai pirin kajohla Kojonneddo ki pwa pwojon oauwe? Joah, jehpirin, pwa kisai pirin kapwaihahda Kojonneddo.